Ko kapolo wokhulupirika na wanzeru ni mbani?

Padandosala pang’ono kufa, Yesu adakhala na macheza na wopfunzira wake anayi omwe ni: Petulo, Yakobo, Yohane na Andereya. Pakufotokoza vomwe vidzachitike mu ntsiku zomalizira, Yesu adapereka mbvunzo wakudikana maninge wakuti: ‘Ko ni mbani chaiye yemwe ni kapolo wokhulupirika na wanzeru, yemwe ambuya wake adamuyikha kuti ambanyang’anire vinthu vake vapamuyi na kupereka chakudya pa nthawe yakudikana?’ (Mateyu 24:3, 45; Maliko 13:3, 4) Yesu pakukhala ‘mbuya’ wa wopfunzira wake, iye adawatsikizira kuti adzayikhe kapolo yemwe ambadzapereke chakudya chawuzimu kwa ateweri wake mu ntsiku zakumalizira. Ko kapolo moyu ni mbani?

Ni kagulu kadiki-diki ka ateweri wodzozewa wa Yesu. ‘Kapolo’ moyu achadziwika ninge Bungwe yotonga ya Mboni za Yahova. Iye achakonzera chakudya chawuzimu atumiki wa Yahova panthawe yakudikana. Isepano tichathemba kapolo wokhulupirika moyu kuti ambatipase ‘chakudya chakukwana panthawe yake.’ —Luka 12:42.

Iye achasamala atumiki wa Mulungu. (1 Timoteyo 3:15) Yesu adapereka udindo ukulu kwa kapolo wonyang’anira basa yomwe inkuphatiwa na gulu ya Yahova padziko yapasi, yomwe ni kusamala katundu, kunyang’anira basa yolalikira na kutipfunzisa pakuphatisa basa mipingu yathu. Kuyingizira pa kupereka vomwe tichada panthawe yake, ‘kapolo wokhulupirika na wanzeru’ achapereka chakudya chawuzimu pakuphatisa basa mabukhu yomwe tichayaphatisa basa mu umboni na pologalama ya misonkhano ya mpingu na misonkhano ikulu-kulu.

Kapolo moyu ni wokhulupirika pa chowonadi cha m’Baibolo na kudzipereka pa basa yakulalikira ntontholo wabwino, ndipo ni wanzeru pakusamala vomwe Khrisitu achada padziko yapasi. (Machitidwe 10:42) Yahova ankudalisa basa mweyi pakuyingizira chakudya chizinji chawuzimu. —Yesaya 60:22; 65:13.

• Ko ni mbani adapasiwa udindo na Yesu kuti ambapereke chakudya chawuzimu kwa opfunzira wake?

• Ko kapolo ni wokhulupirika na wanzeru mu njira ziponi?