Kudzera mu Ufumu wake, Yahova adzachose mabvuto yose yomwe tinkugumana nayo. Moyu ni ntontholo wabwino maninge moti tichadekana kuuzambo anango. Yesu ambafuna kuti ateweri wake ambafotokozerembo anango va ntontholo moyu. (Mateyu 28:19, 20) Ko Mboni za Yahova zichabvera tani lamulo mweyi ya Yesu ntsiku zino?

1. Ko lemba ya Mateyu 24:14 inkukwanisika tani ntsiku zino?

Yesu adati: ‘Ntontholo wabwino wa Ufumu moyu udzalalikiriwe padziko yose yapasi komwe kuna wanthu.’ (Mateyu 24:14) Mboni za Yahova zichakhala zokondwa maninge kuphata basa yodikana mweyi. Tichalalikira ntontholo moyu wabwino padziko yose yapasi mu viseweredwe voposha 1.000. Basa ikulu mweyi ichadikana ngwirizano na khama. Ndipo palibe thandizo ya Yahova basa mweyi ingakwanisikelini.

2. Ko ni khama iponi yomwe tichachita kuti tikwanise kulalikira wanthu azinji?

Isepano tichalalikira kulikose komwe kuchagumanika wanthu. Ninge Akhrisitu woyambirira isepano tichalalikira ‘nyumba na nyumba.’ (Machitidwe 5:42) Njira mweyi ichatithandiza maninge kuti timbagumane wanthu azinji gole iliyose. Pakuti nthawe zose wanthu achagumanikalini pamuyi, tichalalikira pomwe malo yogumanika wanthu azinji. Ndipo nthawe iliyose tichafagafaga mpata wakuuza anango va Yahova na chakulinga chake.

3. Ko ni mbani anaudindo wolalikira ntontholo wabwino?

Akhrisitu wose chaiwo anaudindo wakulalikira ntontholo wabwino kwa anango. Ndipo tichautengera siliyasi udindo wathu moyu. Tichachita vilivose vomwe tingakwanise kuti tilalikire wanthu ndawa yakuti tichadziwa kuti moyo wa wanthu uli pangozi. (Lewengani 1 Timoteyo 4:16.) Tichalipiriwalini mali pakuphata basa mweyi, ndawa yakuti Baibolo ichati: ‘Mudatambira kwa fovolo perekani kwa fovolo.’ (Mateyu 10:7, 8) Sikuti aliyese achabvesera ntontholo wathu. Koma olo kuti viritene tichapitiriza kulalikira ndawa yakuti ni mbali ya kutumikira kwathu, ndipo vichachitisa kuti Yahova akhale wokondwa.

PFUNZIRANI VIZINJI

4. Isepano tichaphata basa mwakhama kuti tilalikire wanthu wose

VIDIYO: Kulaikira mpakana ‘kumamaliziro kwa dziko yapasi’ (7:38)

• Ko ni chani chomwe chichakupasani chidwi mukawona khama yomwe Mboni za Yahova zichachita pakulalikira?

Lewengani Mateyu 22:39 na Aroma 10:13-15, ndipo patsogolo pake kambiranani mibvunzo aya:

• Ko utumiki wathu uchawonesa tani kuti tichakonda anzathu?

• Ko Yahova achabvatani na wale womwe achalalikira ntontholo wabwino?—Onani vesi 15.

5. Ndise anyabasa anzake wa Mulungu

Vochitika vizinji vichawonesa kuti Yahova ankutsogolera basa yathu. Mwakulinganiza, ku Nova Zelandia, m’bale munango wochemerewa kuti Paul adagumana na nkazi munango pomwe angalalikira muyi na muyi masikati. Kumachibese nkazi moyu adapemphera kwa Mulungu, pakuphatisa basa dzina ya Mulungu yakuti Yahova, ndipo adakumbira Yahova kuti achemere munthu munango kuti adzamupfunzise Baibolo. Paul adalewa kuti: ‘Maola yatatu patsogolo pake nidafika pa msuwo pake.’

Lewengani 1 Akorinto 3:9, ndipo patsogolo pake kambiranani mbvunzo uyu:

• Ko vochita vomwe vidachitika ku Nova Zelandia vinkuwonesa tani kuti Yahova achatsogolera basa yake?

Lewengani Machitidwe 1:8, ndipo patsogolo pake kambiranani mbvunzo uyu:

• Ko ndawa chani tichadekana thandizo ya Yahova kuti tikwanise utumiki wathu?

Ko munkudziwa?

Sondo iliyose m’misonkhano yathu ya nkati mwasondo tichatambira thereni yomwe ichatithandiza pakulalikira. Peno imwepo mudagumanikako kale pa misonkhano ninge mwaya, ko munkuganiza chani va mathereni mwaya?

6. Tichabvera lamulo ya Mulungu ya kulalikira

M’magole yoyambirira, wanthu wotsutsa adayesesa kuimisa kulalikira ateweri wa Yesu. Akhrisitu woyambirira adaikhira kumbuyo ufulu wawo wolalikira mwakuchita ‘kukhazikisa mwalamulo basa yolalikira ntontholo wabwino.’ (Afilipi 1:7) Mboni za Yahova zinkuchitambo vibodzibodzi ntsiku zino.a

VIDIYO: Kukhazikisa chonadi mwalamulo (2:28)

Lewengani Machitidwe 5:27-42, ndipo patsogolo pake kambiranani mbvunzo uyu:

• Ndawa chani tichalekalini kulalikira?—Onani mavesi 29, 38, na 39.

CHIGWATO

Yesu adawuza wotewera wake kuti ambalalikire ntontholo wabwino kwa wanthu wose. Ndipo Yahova ankuthandiza wanthu wake kuphata basa mweyi.

Kubwerezera

• Ko ntontholo wabwino unkulalikiriwa tani padziko yose yapasi?

• Ko utumiki wathu uchawonesatani kuti tichakonda azinzathu?

• Ko imwepo munkuwona kuti kulalikira ingakhale basa yokondweresa? Ndawa chani?

KUTI MUDZIWE VIZINJI

Onani momwe Mboni za Yahova zichalalikirira wanthu azinji m’mathaundi yakuluyakulu.

Ulaliki wapadera ku Paris (5:11)

Ko Mboni za Yahova zichagumana tani wanthu wothawa kwawo kuti awalalikire?

Kukwanirisa nyota yauzimu ya wanthu wothawa kwawo (5:59)

Bvani momwe mungakhalire wokondwa mukambaphata basa mweyi kwa nthawe ikulu.

Ndine wokondwa kuti nidasalula basa mweyi (6:29)

Onani momwe mulandu udawiniriwa ku terebunari vomwe vidachitisa kuti basa yolalikira ipitirize kuchitika.

‘Alaliki wa Ufumu adatenga nkhani yawo nkuiyendesa ku telebunari’ (Ufumu wa Mulungu Ukulamulira!, msolo 13)

Yesu adapfunzisa kuti ubatizo ni wakudikana maninge kwa Akhrisitu. (Lewengani Mateyu 28:19, 20.) Koma ko ubatizo ni chani? Ndipo ni chani chomwe munthu angachite kuti akwanirise chakulinga chimwechi?

1. Ko ubatizo ni chani?

Mawu yakuti ‘ubatizo’ yadachokera ku mawu ya chigiriki yomwe yachathandauza kuti ‘kudibisa’ m’madzi. Pomwe Yesu adabatizika iye adamiziwiratu m’kamadzi ka Yorodano, ndipo patsogolo pake iye ‘adavuwuluka m’madzi mule.’ (Maliko 1:9, 10) Mwakulingana na vimwevi Akhrisitu chaiwo achabatiziwa mwakudibisiwa m’madzi panango kumira m’madzi.

2. Ko ubatizo uchathandauza chani?

Munthu akabatizika achakhala ankuwonesa kuti wadzipereka kwa Yahova Mulungu. Ko munthu achadzipereka tani? Akanati wabatizika, iye payekha m’pemphero achawuza Yahova kuti kuposha vose achada kumutumikira mpakana kalekale. Iye achasalula ‘kudzilamba yekha . . . na kupitiriza kutewedza’ vomwe Yesu adapfunzisa na chitsanzo chake. (Mateyu 16:24) Kudzipereka kwake na kubatizika kuchachitisa kuti iye akhale paushamwali wakulimba na Yahova pabodzi na wanthu womwe achatumikira naye pabodzi.

3. Ko munthu angapite tani patsogolo mpakana kufika pakubatizika?

Imwepo mungakonzekere kubatizika mwa kupfunzira va Yahova na kulimbisa chikhulupiriro chanu kwa iye. (Lewengani Aheberi 11:6.) Pomwe chidziwiso chanu na chikhulupiriro chanu chinkukula chikondi chanumbo na Yahova chidzakule. Mosakaika imwepo mudzafune kuti mumbalalikire va iye na kukhala na moyo mobverana na makhalidwe yake yabwino. (2 Timoteyo 4:2; 1 Yohane 5:3) Munthu akachita vimwevi iye achakhala, ankuchita vinthu ‘mobverana na vomwe Yahova achafuna kuti mumbamukondwerese pa chilichose,’ iye achasaina kupereka moyo wake kwa Mulungu na kubatizika.—Akolose 1:9, 10.a

PFUNZIRANI VIZINJI

4. Tingapfunzire vizinji na ubatizo wa Yesu

Lewengani Mateyu 3:13-17 kuti mudziwe vizinji va ubatizo wa Yesu. Ndipo patsogolo pake kambiranani mibvunzo aya:

• Ko Yesu adabatiziwa pomwe wenze mwana?

• Ko iye adabatizika tani? Ko iye adandowaziriwa madzi basi?

Yesu adayamba basa yabwino maninge yomwe adapasiwa na Mulungu padziko yapasi pomwe adabatizika. Lewengani Luka 3:21-23 na Yohane 6:38, ndipo patsogolo pake kambiranani mbvunzo uyu:

• Ko pomwe Yesu adabatizika, ni basa iponi yomwe iye adaikha pa malo yakuyamba pa moyo wake?

5. Ubatizo ni chakulinga chomwe mungachikwanilise

Mukaganizira va kubatizika panango mungawone kuti ni voshupa maninge pakuyamba, koma podiya viritene, imwepo mungakwanise kupita patsogolo mpakana kufika panthawe yomwe mudzabve kuti mungakwanise kuchita chosalula chimwechi. Kuti mudziwe wanthu womwe adachita vimwevi, wonesani VIDIYO.

VIDIYO: Kulimbisa ushamwali na Yahova (1:11)

Lewengani Yohane 17:3 na Yakobo 1:5, ndipo patsogolo pake kambiranani mbvunzo uyu:

• Ko ni chani chingathandize munthu kuti akhale wokonzeka kubatizika?

1. Isepano tichadzipereka kwa Mulungu mwa nkumuuza Yahova kuti tichada kumutumikira mpaka kalekale

2. Pa ubatizo wathu, tichawonesa kwa wanthu kuti tidadzipereka kwa Mulungu

6. Ubatizo uchatanthauza kukhala mbali ya banja ya Yahova

Tikabatizika, tichakhala mbali ya banja yobverana padziko yose yapasi. Podiya kuti ndise wa m’madziko na makhaindi yosiyanasiyana, tose tichakhulupirira vinthu vibodzi ndipo tichakhala na makhalidwe yolingana. Lewengani Salimo 25:14 na 1 Petulo 2:17, ndipo patsogolo pake kambiranani mbvunzo uyu:

• Ko ubatizo uchakhudza tani ushamwali wa munthu na Yahova na anango womwe achatumikira naye pabodzi?

CHIGWATO

Yesu adapfunzisa kuti Akhrisitu achadekana kubatizika. Kuti akwanirise chakulinga chimwechi, munthu achadekana kulimbisa chikhulupiriro chake mwa Yahova na kumbakhala na makhalidwe yomwe Iye achafuna na kudzipereka kwa Iye.

Kubwerezera

• Ko ubatizo ni chani, ndipo ndawa chani ni wakudikana?

• Ko kudzipereka na ubatizo ni kobverana tani?

• Ko ni masitepi yaponi yomwe munthu angachite kuti abatizike?

KUTI MUDZIWE VIZINJI

Pfunzirani kuti ubatizo uchatanthauza chani.

‘Ko ubatizo ni chani?’ (Nkhani ya pa intaneti)

Wonani njira zomwe munthu angachita kuti afike pakubatizika.

‘Kukonda kwathu Yahova kuchatichitisa kuti tibatizike’ (Nsanja ya Olonda ya Março, 2020)

Wonani momwe mwamuna munango adasainira kuchokera pasi pa moyo kuti abatizike.

‘Iwo ambafuna kuti inepano niwonese chonadi pa ine nekha’ (Nsanja ya Olonda ya 1 Fevereiro, 2013)

Wonani kuti ndawa chani ubatizo ni cholinga chabwino na momwe imwepo mungakhalire wokonzeka kuti mubatizike.

‘Ko nichafunikadi kubatizika?’ (Mayankho a Zimene Achinyamata Amafunsa—Buku Lachiwiri, msolo 37)