7 Ko Mulungu achabva na kudawira mapemphero?

WANTHU azinji afuna kudziwa n’dawiro wa mbvunzo moyu. Baibolo iwonesa kuti Yahova abveseradi mapemphero ntsiku zino. Koma vochita vanu ndivo vingachitise kuti akubvesereni panango neye.

Yesu adatsuula atsogoleri wachipembedzo omwe ambapemphera na volinga voipa. Iwo ambandofuna kudzionesera kuti ni olungama. Iye adati wanthu mwawa ‘angatambiriratu malipiro yawo yose.’ Vimwevi vikutanthauza kuti Mulungu alibe kudawira mapemphero yawo, koma adandotambira ulemu kuchokera kwa wanthu basi. (Mateyu 6:5) Ntsiku zinombo wanthu azinji apemphera pakundofuna kukwanirisa vofuna vawo, osati va Mulungu. Mulungu angabvelini mapemphero yawo ndawa yakuti alekera dala kutewedza mpfundo za m’Baibolo zatakambirana izi.

Ko imwepo munkuganiza tani? Ko munkuwona kuti Mulungu angabve na kudawira mapemphero yanu? Kuti Mulungu abve na kudawira mapemphero yanu, viliralini ntundu wanu, dziko yanu panango kuti peno ndimwe wolemera panango wosauka. Baibolo ititsimikizira kuti: ‘Mulungu alibe tsankho. Iye atambira munthu wochokera mu ntundu uliwose, yemwe amugopa na kuchita chilungamo.’ (Machitidwe 10:34, 35) Ko imwepo mumugopa Mulungu ndipo muchita chilungamo? Peno mumugopa Mulungu, ndiye kuti mumulemekeza maninge ndipo mufunalini kumukalipisa. Ndipo peno muchita chilungamo, ndiye kuti muyesesa kuchita vomwe Mulungu achati ni volungama m’malo mwakundochita vofuna vanu panango va wanthu anango. Ko mufunadi kuti Mulungu ambabve mapemphero yanu? Baibolo ingakuthandizeni kuti vimwevi vikwanisike.a

Wanthu azinji afuna kuti Mulungu ambadawire mapemphero yawo modabwisa. Koma olo panthawe yomwe Baibolo imbanembewa, Mulungu ambachita vodabwisa mwa apo na apo. Kalekale pakachitika chodabwisa, pambapita nthawe itali maninge kuti chichitike chinango. Ndipo Baibolo iwonesa kuti nthawe yochita vodabwisa idamala pomwe atumi wose adafa. (1 Akorinto 13:8-10) Ko vimwivi vinkutanthauza kuti Mulungu adawiralini mapemphero ntsiku zino? Neye ntenolini. Ndowonankoni mapemphero yanango yomwe iye ayadawira.

Mulungu apereka nzeru. Yahova ndiye Munichiro wa nzeru chaizo. Iye apereka nzeru zimwezi mosaumira kwa wanthu omwe ankufuna kudziwa malangizo yake na kuyatewedza pamoyo wawo.—Yakobo 1:5.

Mulungu apereka mphanvu ya nzimu wake pabodzi na madaliso yomwe nzimu moyu upereka. Nzimu wakuchena ni mphanvu yomwe Mulungu aiphatisa basa. Palibe pomwe mphanvu inango yoposha nzimu moyu. Nzimu moyu ungatithandize kuti tipirire mayesero. Ungatithandize pomwe kugumana ntendere wa muntima tikagumana na mabvuto. Ndipo ungatithandize kukhala na makhalidwe yabwino yomwe yangachitise kuti wanthu ambatikonde. (Agalatiya 5:22, 23) Yesu adatsimikizira opfunzira wake kuti Mulungu apereka mphatso mweyi mosaumira.—Luka 11:13.

Mulungu athandiza wanthu omwe ankufuna kumudziwa. (Machitidwe 17:26, 27) Padziko yose, panawanthu azinji omwe ankufuna kudziwa chonadi. Iwo ankufuna kudziwa dzina ya Mulungu, cholinga chake pokonza dziko yapasi na wanthu na vomwe angachite kuti akhale naye paushamwali. (Yakobo 4:8) Kazinjikazinji, wa Mboni za Yahova agumana na wanthu watene, ndipo akondwa akambakambirana nawo midawiro ya mibvunzo yawo kuchokera m’Baibolo.

Ko imwepo mwatambira ntsanja ino kuti mudziwe nkhani zimwezi? Ko munkufunisisa kumudziwa Mulungu? Panango imweyi ni njira yomwe Mulungu ankudawirira mapemphero yanu.