-
Ndawa chani vinthu voipa vichachitika ndipo ndawa chani tichabonera?Kondwani na moyo mpaka kalekale!—Kosi yokambirana va m’Baibolo
-
-
Ko mukadziwa?
Pomwe Satana adanena bodza yakuyamba iye adapsyipiza dzina ya Yahova. Iye adachita vimwivi mwa kuchitisa wanthu kuwona kuti Yahova ni wotongalini wabwino, alibe chilungamo ndipo alibe chikondi. Manjemanje Yahova adzamalise kubonera kose ndipo adzawonese kuti Utongi wake ni wabwino maninge. Iye adzachenese dzina yake ku mabodza yose mwaya. Mweyi ndiyo nkhani yodikana maninge muchilengedwe chose.—Mateyu 6:9, 10.
-
-
Ko Ufumu wa Mulungu udzachite chani?Kondwani na moyo mpaka kalekale!—Kosi yokambirana va m’Baibolo
-
-
MSOLO 33
Ko Ufumu wa Mulungu udzachite chani?
Ufumu wa Mulungu unkutonga kale manjeuno. Ndipo manjemanje udzachite kuchinja kukula padziko yapasi. Naboni tikambirane za vinthu vinango vabwino vomwe tingadzaviwone mu Ufumu wa Mulungu.
1. Ko Ufumu wa Mulungu udzabwerese tani chilungamo na ntendere padziko yapasi?
Yesu yemwe ni Mpfumu ya Ufumu wa Mulungu adzachose wanthu woipa wose pabodzi na maboma pa nkhondo ya Arumagedo. (Chivumbulutso 16:14, 16) Panthawe mweyi, mapolomimsi aya ya Mulungu yadzakhale yakwanirisiwa bwinobwino: ‘Kasala kanthawe kadikidiki, woipa adzakhalekolini pomwe.’ (Salimo 37:10) Kudzera mu Ufumu moyu, Yesu adzatsimikizire kuti ntendere na chilungamo vakwanirisika padziko yapasi.—Lewengani Yesaya 11:4.
2. Ko moyo udzakhale tani chikadzati cholinga cha Mulungu chakwanirisika padziko yapasi?
Mu Ufumu wa Mulungu, ‘wolungama adzatambire dziko yapasi ndipo adzakhale mumo mpakana kalekale.’ (Salimo 37:29) Ndoganizani kukhala mudziko yomwe aliyese achachita vinthu vachilungamo ndipo achakonda Yahova. Palibe yemwe adzadwale! Ndipo aliyese adzakhale na moyo wosapera.
3. Ko Ufumu wa Mulungu udzakwanirise chani akadzati wanthu woipa adzongewa?
Patsogolo pakuti wanthu woipa adzongewa, Yesu adzatonge ninge Mpfumu kwa magole yokwana 1000. Panthawe yose mweyi, iye pabodzi na wa 144 000 adzathandize wanthu padziko yapasi kuti akhale wangwiro na alibe uchimo. Kumapeto kwa nthawe mweyi, dziko yapasi yose idzakhale paradaiso wokhuza, ndipo idzadzale na wanthu wokondwa womwe adzaphindule ndawa yakubvera malamulo ya Yahova. Patsogolo pake Yesu adzapereke utongi kwa Ababa wake wakudzulu Yahova. Ndipo panthawe mweyi ‘dzina ya Yahova [idzakhale kuti] yachenesewa.’ (Mateyu 6:9, 10) Pamwapa vidzakhale kuti vatsimikizika kuti Yahova ni ntongi wabwino yemwe achasamalira wanthu wake. Patsogolo pake Satana adzadzongewe pabodzi na viwanda vake na aliyese yemwe adzaphindukire utongi wa Yahova. (Chivumbulutso 20:7-10) Madaliso yabwino yomwe Ufumu wa Mulungu udzabwerese yadzamalelini mpakana kalekale.
PFUNZIRANI VIZINJI
Dziwani kuti ndawa chani Mulungu adzaphatisire basa Ufumu kuti akwanirise mapolomimsi ya m’Baibolo yakutsogolo.
4. Ufumu wa Mulungu udzamalise maboma ya wanthu
‘Munthu achadzonga munthu munzake pakumutonga.’ (Mlaliki 8:9) Kudzera mu Ufumu wake moyu, Yahova adzachose vinthu vose vomwe viribe chilungamo.
Lewengani Danieli 2:44 na 2 Atesalonika 1:6-8, ndipo patsogolo pake kambiranani mibvunzo aya:
Ko Yahova na Mwana wake Yesu adzachite chani na mautongi ya wanthu pabodzi na omwe achayathandizira?
Ko pa vomwe mwapfunzira polewa va Yahova na Yesu, ni chani chichakutsimikizirani kuti vochita vawo vidzakhale vachilungamo na vabwino?
5. Yesu ni Mpfumu yabwino maninge
Ninge Mpfumu ya Ufumu wa Mulungu, Yesu adzachite vizinji maninge kuti aphindulise wanthu padziko yapasi. Wonesani VIDIYO kuti muwone momwe Yesu adawonesera kuti iye anashungu pabodzi na mphanvu yopasiwa na Mulungu yothandiza wanthu.
Pomwe wenze padziko yapasi, Yesu adapereka chitsanzo chomwe Ufumu udzachite. Pamadaliso yomwe yandandalikiwa nyantsi aya, ko nidaliso iponi yomwe imwepo munashungu kuwona kukwanirisika kwake? Lewengani malemba yomwe yankhubverana na madaliso mwaya.
POMWE YESU WENZE PADZIKO YAPASI . . .
ALI KUDZULU, YESU . . .
ambanyang’anira mphanvu zamuchilengedwe.—Maliko 4:36-41.
adzachose mabvuto yose yobwera ndawa ya matsoka ya chilengedwe.—Yesaya 35:1, 2.
adadyesa wanthu azinji modabwisa.—Mateyu 14:17-21.
adzamalise njala padziko yapasi.—Salimo 72:16.
adachirisa wodwala.—Luka 18:35-43.
adzawonesese kuti aliyese anathanzi yabwino.—Yesaya 33:24.
adamukisa wanthu wakufa.—Luka 8:49-55.
adzamukise wakufa na kumalisa impfa.—Chivumbulutso 21:3, 4.
6. Ufumu wa Mulungu udzabwerese tsogolo yabwino
Ufumu wa Mulungu udzakwanirise chakulinga cha Yahova choyambirira kwa wanthu. Iwo adzakhale na moyo wosapera m’paradaiso padziko yapasi. Wonesani VIDIYO kuti muwone vomwe Yahova wakhala ankuchita pabodzi na Mwana wake Yesu kuti akwanirise chakulinga chimwechi.
Lewengani Salimo 145:16, ndipo patsogolo pake kambiranani mbvunzo uyu:
Ko muchabva tani kudziwa kuti Yahova ‘adzakwanirise shungu ya chamoyo chilichose’?
WANTHU ANANGO ACHATI: ‘Tose tikaphatana manja bwinobwino tingamalise mabvuto yose padziko yapasi.’
Ko nimabvuto yaponi yomwe Ufumu wa Mulungu udzamalise yomwe maboma ya wanthu yangamaliselini?
CHIGWATO
Ufumu wa Mulungu udzakwanirise chakulinga chake. Ufumu moyu udzachinje dziko yapasi kukhala paradaiso ndipo idzadzale na wanthu wabwino wokhawokha womwe adzatumikire Yahova mpakana kalekale.
Kubwerezera
Ko Ufumu wa Mulungu udzachenese tani dzina ya Yahova?
Ndawa chani tingakhulupirire kuti Ufumu wa Mulungu udzakwanirise mapolomimsi yose ya m’Baibolo?
Ko ni madaliso yaponi yomwe Ufumu Mulungu udzabwerese yomwe imwepo munayo shungu kuti mudzayawone?
KUTI MUDZIWE VIZINJI
Dziwani vomwe Arumagedo ichathandauza.
Onani vomwe vidzachitike panthawe yomwe Yesu adanena kuti ‘chitsautso chikulu.’—Mateyu 24:21.
Wonani momwe banja ingaganizirire pabodzi vamadaliso yomwe Ufumu wa Mulungu udzabwerese kutsogolo.
Wonani momwe munthu munango wandale adagumanira chinthu chomwe angafagafaga mu nkhani yakuti ‘ningashupika na mibvunzo yazinji’
‘Baibolo ichachinja moyo’ (Nsanja ya Olonda, 1 Janeiro, 2012)
-