MSOLO 58
Pitirizani kukhala wokhulupirika kwa Yahova
Akhrisitu chaiwo ni wotsimikiza kusabvuma kuti aliyese panango kuti chilichose chiwakangise kutumikira Yahova. Mosakaika imwepombo muchabvambo tene. Yahova achalemekeza kukhulupirika kwanu. (Lewengani 1 Mbiri 28:9.) Ko ni vochitika viponi vomwe vingayese kukhulupirika kwanu kwa iye, ndipo mungavipirire tani?
1. Ko anango angayese tani kukhulupirika kwathu kwa Yahova?
Wanthu anango adzayesese kutikangisa kutumikira Yahova. Ko ni mbani yemwe angachite vinthu vimwivi? Wanthu anango omwe adasiya chonadi achalewa vabodza vokhudza gulu yathu na chakulinga chakuti afowokese chikhulupiriro chathu. Iwo achachemerewa kuti ampatuko. Kuingizira pamwapa, azitsogoleri anango wavipembedzo achalewa mabodza yolewa va ise, na chakulinga chakuti wale omwe ankukaikira asiye chonadi. Ni ngozi ikulu maninge kwa ise kumbakambirana na wanthu mwawa wotsutsa, mwakulewenga mabukhu yawo, kuyenda m’mawebusayaiti yawo panango kunyang’anira mavidiyo yawo. Pakulewa va wale omwe achayesesa kufokesa anango kutumikira Yahova, Yesu adati: ‘Asiyeni. Iwo ni atsogoleri wa alombe. Ndipomwapa, peno munthu mulombe ankutsogolera mulombe munzake wose awiri adzagwere muchidindo.’—Mateyu 15:14.
2. Ko ni vosalula viponi vomwe aliyese angachite vomwe nthawe zinango vingayese kukhulupirika kwathu kwa Yahova?
Chikondi chathu kwa Yahova chidzatithandize kuti timbapewe kumbabverana na wanthu omwe ali muchipembedzo chabodza. Gulu yomwe tili panango basa yomwe tichaphata ichadikanalini kukhala yobverana na chipembedzo chabodza. Yahova achatichenjeza kuti: ‘Bulani mwa iye [Babulo nkulu], wanthu wangu.’—Chivumbulutso 18:2, 4.
PFUNZIRANI VIZINJI
Onani momwe imwepo mungapewere kusabvuma kuti aliyese panango chilichose chifowokese kukhulupirika kwanu kwa Yahova. Onani pomwe momwe imwepo mungawonesere kukhulupirika kwanu kwa Yahova mwakuchoka mu Babulo nkulu.
3. Khalani tcheru na vipfunziso va bodza
Ko tichadekana kuchita chani tikabva vinthu vosalimbikisa volewa va Mboni za Yahova? Lewengani Miyambo 14:15, ndipo patsogolo pake kambiranani mbvunzo uyu:
Ndawa chani tichadekana kukhala wosamala maninge kuti tileke kumbakhulupirira vilivose vomwe tabva?
Lewengani 2 Yohani 9-11, ndipo patsogolo pake kambiranani mibvunzo aya:
Ko tichadekana kuchitatani vinthu na wanthu wa mpatuko?
Olo kuti tinkuchezanawolini maso na maso wanthu wa mpatuko, ko ni mwanjira yanyi yomwe tingagumanirane nawo muvipfunziso vawo?
Ko munkuganiza kuti Yahova achabva tani tikakhala kuti isepano tinkuikhira nzeru ku mawu yawo yosalimbikisa yolewa iye pabodzi na gulu yake?
4. Pitirizani kukhala wokhulupirika kwa Mulungu m’bale akachimwa
Tikadziwa vakuti munthu munango mu mpingu wachita chimo ikulu, tichadekana kuchitatani? Onani mpfundo zochokera m’Mawu ya Mulungu kwa Aizirayeli. Lewengani Levitiko 5:1.
Ninge mwavafotokozerewa mu vesi mweyi, tikadziwa kuti munthu munango wachita chimo ikulu, tichadekana kuwuza akulu vomwe tinkudziwa. Koma tikanati tachita vimwivi, mokoma moyo tichadekana kulimbikisa wochimwa ule kuti akafotokoze yekha va chimo yake kwa akulu. Koma iye akaleka kuchita vimwivi, kukhulupirika kwathu kwa Yahova kuchadekana kutilimbikisa kuti tiyende tikawauze akulu vomwe tinkudziwa. Ko vochita ninge vimwivi vichawonesa tani kukhulupirika kwathu kwa . . .
Yahova Mulungu?
munthu yemwe wachita chimo?
anango mu mpingu?
Wokhulupirira mwanzanu akakhala pabvuto muthandizeni!
5. Khalani kutali na Babulo nkulu
Lewengani Luka 4:8 na Chivumbulutso 18:4, 5, ndipo patsogolo pake dawirani mibvunzo aya:
Ko dzina yangu idakapitiriza kukhala mu chipembedzo chabodza?
Ko nililini mu gulu inango yomwe niyobverana maninge na chipembedzi chinango?
Ko basa yangu ichathandizira chipembedzo chabodza munjira zinango?
Ko pamoyo wangu panambali zinango zomwe nichadekana kuti nifutukane maninge na chipembedzo chabodza?
Peno pamibvunzo yose mwaya panamunango yemwe nadawira kuti inde, ni chani chomwe nichadekana kuti nichinje?
Pavochitika vose chitani vosalula vomwe vingakuchitiseni kukhala na chikhumbumtima chabwino chomwe chichawonesa kukhulupirika kwanu kwa Yahova.
Ko imwepo mungachite tani peno mwakumbiriwa kuti muthandizire basa zachipembedzo zothandiza wanthu?
WANTHU ANANGO ACHATI: ‘Nichada kubva vomwe wanthu mwawa ampatuko achanena va Mboni za Yahova kuti nikwanise kuwafotokozera chonadi.’
Ko kuchita vimwivi kungakhale nzeru yabwino? Peno neye ndawa chani?
CHIGWATO
Kuti tipitirize kukhala wokhulupirika kwa Yahova, tichadekana kupewa kubverana kulikose na wale omwe niwosakhulupirika.
Kubwerezera
Ndawa chani tichadekanalini kubvesera maganizo ya wanthu wa mpatuko?
Tikabva kuti mʼbale wasaina kuleka kukhala wa Mboni, ko tichita chani?
Ko tingabvere tani chenjezo yakuti bulani mu vipembedzo va bodza?
KUTI MUDZIWE VIZINJI
Onani vomwe mungachite peno anango ankufalisa mabodza yolewa va Mboni za Yahova
‘Ko imwepo munamaumboni yose?’ (Nsanja ya Olonda ya Agosto, 2018)
Ko imwepo mungazindikire tani gulu panango basa yomwe ichathandizira Babulo nkulu?
Ko azondi wathu akhala ankuchita chani kuti afokese chikhulupiriro chathu?
Onani momwe wantsembe munango Shinto vadachita kuti agwate mbverano na chipembedzo chabodza mu nkhani yakuti: ‘Kuyambira nili mwana ningafagafaga maganizo yabwino.’
‘Baibolo ichachinja moyo’ (Nsanja ya Olonda ya 1 Julho, 2011)