MSOLO 14
Ko tichadikana kuchita chani kuti Mulungu abvume kupemphera kwathu?
Ninge mwatawonera mu pfunziro yapita, Mulungu achabvumalini vipembedzo vose. Koma ise tingakwanise kumbatumikira Mlengi wathu mu njira yomwe iye achawona kuti ni yabwino. Ko ni njira iponi yomwe isepano tingamutumikirire panango chipembedzo chomwe iye achabvuma? (Yakobo 1:27) Naboni tione vomwe Baibolo ichapfunzisa.
1. Ko tichadekana kuphatisa basa chani pakumutumikira?
Kutumikira kwathu kuchadekana kuchokera m’Baibolo. Yesu pakulewa va Mulungu adati: ‘Mawu yanu ni chonadi.’ (Yohane 17:17) M’malo motewedza vomwe Mawu ya Mulungu yachanena, vipembedzo vizinji vichayikhira nzeru pamiyambo yomwe wanthu achakhazikisa. Koma Yahova ‘achakondwalini na aliyese yemwe achayikha kumbali malamulo yake.’ (Lewengani Maliko 7:9.) Koma tichakondweresa mtima wa Yahova tikambabvera vomwe Baibolo ichanena.
2. Ko timbamutumikire tani Yahova?
Tichadekana kutumikira Yahova yekha basi ndawa yakuti iye ni Mulengi. (Chivumbulutso 4:11) Ndipomwapa tichadekanalini kuphatisira basa mafano panango wanthu wochena moyo pakutumikira Yahova.—Lewengani Yesaya 42:8.
Kutumikira kwathu kuchadekana kukhala ‘kochena na kobvumizika’ kwa Yahova. (Aroma 12:1) Vimwevi vinkuthandauza kuti tichadekana kubvera malamulo yake na kumbayakonda. Mwakulinganiza, wanthu omwe achabvera Yahova achabvera malamulo yake pankhani ya ukwati, ndipo iwo achachitalini pomwe vinthu vinango ninge kupepa kuphatisa basa mankhwala yosokoneza msolo panango kumwa maninge.a
3. Ndawa chani tichadekana kutumikira Yahova na anzathu?
Misonkhano yathu ya mpingu yomwe tichachita sondo iliyose yachatipasa mwayi ‘wotamanda Yahova . . . mu mpingu.’ (Salimo 111:1, 2) Njira ibodzi yochitira vimwivi ni kuimba nyimbo zotamanda Mulungu. (Lewengani Salimo 104:33.) Nyimbo zichatipasa mwayi wotamanda Yahova mu mpingu. Komasoti tikambayenda kumisonkhano ise tichalimbikisa anango ndipo iwombo achatilimbikisa.
PFUNZIRANI VIZINJI
Dziwani ndawa yake Yahova achafunalini kuti timbaphatise basa mafano pakumutumikira. Ndipo onani njira yodikana yomwe tingambatumikirire Mulungu.
4. Ayi kuti timbaphatise basa mafano pakutumikira Mulungu
Ko tidziwa tani kuti Mulungu akondwalini tikambaphatisira basa mafano pakumutumikira? Wonesani VIDIYO, ndipo patsogolo pake kambiranani mbvunzo uyu.
Ko nchani chidachitikira wanthu wa Mulungu mu nthawe za m’Baibolo pomwe ambayesa kumutumikira pakuphatisa basa mafano?
Wanthu anango achayesesa kuphatisira basa mafano kuti afenderere kwa Mulungu. Koma ko mweyi ni njira yabwino yofenderera kwa Mulungu? Lewengani Ekisodo 20:4-6 na Salimo 106:35, 36, ndipo patsogolo pake kambiranani mibvunzo aya:
Ko ni vinthu viponi panango mafano yomwe imwepo mudawonako kale wanthu ankuviphatisira basa pakupemphera kwawo?
Ko Yahova achakondwa akambawona wanthu ankuphatisa basa mafano pakumutumikira?
Ko Munkuganiza tani pankhani yophatisira basa mafano pakutumikira Mulungu?
5. Kutumikira Yahova yekha kuchatimasula kuvipfunziso vabodza
Onani momwe kutumikira Yahova munjira yabwino kuchatimasulira kuvipfunziso vabodza. Wonesani VIDIYO.
Lewengani Salimo 91:14, ndipo patsogolo pake kambiranani mbvunzo uyu:
Ise tichaonesa kuti tichakonda Yahova tikambatumikira iye yekha basi, ko Yahova ankutipolomisa kudzatichitira chani tikachita vimwivi?
6. Tichatamanda Mulungu ku misonkhano ya mpingu
Tichatamanda Yahova na kulimbikisana mwa kuimba nyimbo na kupereka ndemanga ku misonkhano ya mpingu. Lewengani Salimo 22:22, ndipo patsogolo pake kambiranani mibvunzo aya: Ko imwepo muchakomedzewa na kubva ndemanga pamisonkhano?
Ko imwepo mungakonde kukonzekerambo kuti mukapereke ndemanga?
7. Yahova achakondwa tikambauza anango vomwe tikupfunzira
Pananjira zizinji zomwe tingambauzire anango chonadi cha m’Baibolo. Lewengani Salimo 9:1 na 34:1, ndipo patsogolo pake kambiranani mbvunzo uyu:
Ko mwapfunzira chani m’Baibolo chomwe muchada kufotokozerambo anango?
WANTHU ANANGO ACHATI: ‘Nivosakwanisika kukondweresa Mulungu.’
Ko munkuganiza tani?
CHIGWATO
Tichatamanda Mulengi wathu tikambatumikira iye yekha, tikamutamanda pa misonkhano ya mpingu na tikambafotokozera anango vomwe tapfunzira.
Kubwerezera
Ko tingamutumikire tani Mulungu mobvumizika?
Ndawa chani tichadekana kumbatumikira Yahova yekha?
Ndawa chani tichadikana kumbatumikira na anango womwe achada kukondweresa Mulungu?
KUTI MUDZIWE VIZINJI
Lewengani momwe nkazi munango adakhalira womasuka pakutumikira mafano mu nkhani yakuti: ‘Nidaleka kukhala kapolo wotumikira mafano.’
‘Baibolo ichachinja wanthu’ (Nsanja ya Olonda, 1 Julho, 2011)
Pfunzirani vomwe vingakuthandizeni imwepo kuti mumbaperekerembo ndemanga pa misonkhano.
‘Timbatamande Yahova mu mpingu’ (Nsanja ya Olonda, Janeiro 2019)
Wonani momwe mulumbwana munango adagumanira phindu kuyenda kumisonkhano ya mpingu olo kuti kuchita vimwevi kwenze koshupa.
Wanthu azinji achakhulupirira kuti ntanda ni chizindikiro cha Chikhrisitu, koma ko tichadekana kuphatisa basa ntanda pakutumikira?
a Tidzawone nkhani mwezi m’misolo yanango.