Thandizirani mpingu wanu

Padziko yose yapasi, wanthu azinji achatumikira Yahova mokondwa m’mipingu yazinji. Iwo achatembeja malangizo yomwe achatambira, ndipo achakhala na shungu yothandiza mumpingu wawo munjira zosiyanasiyana. Ko imwepo muchabvambo mwanjira mweyi na mpingu wanu?

1. Ko ninjira ziponi zinango zomwe imwepo mungaphatisire basa nthawe na mphanvu zanu kuti muthandizire mpingu?

Aliyese wa ise angakwanise kuthandizirako pa mpingu. Mwakulinganiza, ko alipo mumpingu wanu omwe ni wachikulire panango omwe achadwaladwala? Ko imwepo mungawathandize kuti akafike kumisonkhano? Panango mungawathandize munjira zinango, ninge kuwathandiza kugula vinthu na basa zapamuyi? (Lewengani Yakobo 1:27.) Tingadzipereke pomwe kuti tithandize na kukonzakonza Nyumba ya Ufumu yathu. Palibe yemwe achatikakamiza kuchita vimwivi. Chikondi kwa Mulungu na kwa abale wathu ndicho chomwe chichatikakamiza kuti ‘tidzipereke mwakufuna kwathu.’—Salimo 110:3.

Mboni zobatizika zingathandizire mpingu mu njira zosiyanasiyana. Abale woyenerera auzimu angatumikire ninge atumiki wothandiza ndipo nkuyenda kwa nthawe angatumikirembo ninge akulu. Ose abale na alongo angathandize mwakhama basa yolalikira mwakuchita upainiya. Mboni zinango zichathandiza mwakumanga malo yopempherera panango kufulukira kumalo komwe kuna mpingu omwe uchadekana chithandizo munjira zinango.

2. Ko tingaphatise tani basa vinthu vathu vakuthupi kuti vithandizire pa Nyumba ya Ufumu?

Tingakwanise ‘kulemekeza Yahova na vinthu vathu vodekana.’ (Miyambo 3:9) Ise tichawona kuti nimwayi ukulu maninge kuchita vopereka kuti vithandizire mpingu wathu na basa yapadziko yose. (Lewengani 2 Akorinto 9:7.) Vopereka vathu vichathandiza pomwe kukachitika ngozi. Azinji achawona kuti nivothandiza maninge ‘kusunga kathu pambali’ nthawe zose kuti ambachite vopereka. (Lewengani 1 Akorinto 16:2.) Tingachite vopereka vathu pakuphatisira basa kabokosi ka vopereka komwe kachakhala pamalo yathu yopempherera panango tingachita vopereka mwevi kudzera pa intaneti pa donate.jw.org. Yahova achatipasa mwayi wowonesa chikondi chathu kwa iye munjira yomwe tichasalulira kupereka vinthu vathu vakuthupi.

PFUNZIRANI VIZINJI

3. Tingaphatisire basa vinthu vathu vakuthupi

Yahova achakonda munthu wopereka na moyo wose. Mwakulinganiza, Yesu adaikhira nzeru nkazi wamasiye ndawa yopereka na moyo wake wose. Lewengani Luka 21:1-4, ndipo patsogolo pake kambiranani mibvunzo aya:

• Ko tichadekana kuchita vopereka vizinji kuti tikondwerese Yahova?

• Ko Yahova na Yesu achabva tani tikambachita vopereka vathu vochokera pasi pa moyo?

Kuti mudziwe momwe vopereka vathu vichaphatisiriwa basa, wonesani VIDIYO. Patsogolo pake kambiranani mbvunzo uyu.

VIDIYO: ‘Mphaso ya kwa Yahova’ (4:47)

• Ko vopereka vomwe tichapereka vichaphindulisa tani mimpingu padziko yose yapasi?

4. Isepano tingaperekembo chithandizo chathu

Mu nthawe za m’Baibolo, atumiki wa Yahova mwachangu adachita khama kuti akonze malo yawo yopempherera. Mwevi ni vizinji maninge kuposha kundopereka chabe mali. Lewengani 2 Mbiri 34:9-11, ndipo patsogolo pake kambiranani mbvunzo uyu:

• Ko mu Izirayeli aliyese adachitatani kuti asamalire nyumba ya Yahova panango kuti malo yomwe angapemphereramo?

Kuti muone momwe Mboni za Yahova zichatewedzerera chitsanzo chimwechi, wonesani VIDIYO. Patsogolo pake kambiranani mibvunzo aya.

VIDIYO: Kusamalira malo yathu yopempherera (3:31)

• Ko ndawa chani ni vodekana maninge kuchenesa Nyumba ya Ufumu yathu na kumbaikonzakonza pafupipafupi?

• Ko ni njira zinango ziponi zomwe imwepo mungathandizire?

5. Abale angakwanise kukhala na maudindo yazinji

Malemba yachalimbikisa Akhrisitu amuna kuti ambachite vose vomwe angakwanise kuti ambathandizire mpingu. Onani chitsanzo, wonesani VIDIYO. Patsogolo pake kambiranani mbvunzo uyu.

VIDIYO: Abale ankuyesayesa kuphata basa yabwino (5:19)

• Mu vidiyo, ko Ryan adachitatani kuti akwanise kuthandiza mpingu mwakukwana?

Baibolo ichafotokoza va viyenereso va wanthu omwe achada kutumikira ninge atumiki othandiza panango akulu angachite. Lewengani 1 Timoteyo 3:1-13, ndipo patsogolo pake kambiranani mibvunzo aya:

• Ko ni chani chomwe chichadikhiriwa kwa abale omwe achatumikira ninge atumiki othandiza panango akulu?

• Ko ni chani chomwe chichadikhiriwa ku mabanja yawo?—Onani vesi 4 na 11.

• Abale akambayesesa kuti akhale na viyenereso mwevi, ko vichathandiza tani mpingu?

CHIGWATO

Yahova achatembeja khama yomwe tichachita kuti tithandizire mpingu na nthawe yathu, mphanvu zathu pabodzi na vinthu vathu vakuthupi.

Kubwerezera

• Ko tingaphatise tani basa nthawe yathu na mphanvu zathu kuti tithandizire mpingu?

• Ko tingaphatise tani basa vinthu vathu vakuthupi kuti tithandizire mpingu?

• Ko ni njira ziponi zomwe imwepo mungaphatise basa kuti muthandizire mpingu?

KUTI MUDZIWE VIZINJI

Onani kuti ndawa chani Mulungu achalimbikisalini pomwe atumiki wake kuti ambapereke chakhumi.

‘Ko Baibolo ichalewa chani pankhani ya chakhumi?’ (Nkhani ya pa intaneti)

Baibolo ipereka basa zinango kwa amuna obatiziwa. Manje tani kwa akazi obatiziwa?

“Mbazindikirani msolo wa mpingu” (Ntsanja ya Ulonda Fevereiro, 2021)

Onani Mboni zomwe molimba mtima zimbatakula mabukhu kuti akapereke kwa wokhulupirira anzawo.

Kupereka mabukhu yopfuzisa Baibolo ku Congo (4:25)

Onani momwe basa yathu ichafambira na vopereka vomwe nivosiyana maninge na momwe vipembedzo vinango vichachitira.

‘Ko mali zomwe Mboni za Yahova zichafambisira basa yawo achazigumana kuponi?’ (Nkhani ya pa intaneti)