Mungakhale na ntendere podiya kuti muli pabvuto

1. Ko ‘ntendere wa Mulungu’ nchani, ndipo tiphindula tani tikakhala nawo? (Afilipi 4:6, 7)

PALI khaindi ya ntendere womwe wanthu kudziko uku audziwalini. Umoyu ni ‘ntendere wa Mulungu’ womwe tikhala nawo peno tili paushamwali wolimba na Ababa wathu wakudzulu. Tikakhala na ntendere wa Mulungu, tidzibva kuti ndise otetezeka ndipo mtima wathu ukhala m’malo. (Lewengani Afilipi 4:6, 7.) Tikhala pomwe paushamwali wabwino na wanthu omwe amukondambo. Ndipo tikhala pomwe paushamwali wolimba na ‘Mulungu wantendere.’ (1 Ates. 5:23) Tikawadziwa bwino Ababa wathu wakudzulu, kuwabvera na kuwathemba, tikhala na ntendere womwe utikhazika moyo pasi tikambagumana na mabvuto.

2. Ko tinkutsimikiza tani kuti ni vokwanisika kukhala na ntendere wa Mulungu?

² Ko ni vokwanisikadi kukhala na ntendere wa Mulungu peno tinkudwala matenda yakulu, kugumana na matsoka yachilengedwe, nkhondo panango kudzudziwa? Mabvuto yose mwaya yangachitise kuti tikhale na mantha. Koma Yesu adakhazika mtima pasi wopfunzira wake pakuwauza kuti: ‘Mitima yanu osati ishupike panango kuchita mantha.’ (Yoh. 14:27) Ni vokomedza kuwona kuti abale na alongo azinji ankutewedza malangizo ya Yesu mwaya. Yahova nthawe zose awathandiza kukhala na ntendere podiya kuti ankugumana na mabvuto yakulu.

MWATINGAGUMANIRE NTENDERE PAMATENDA YAKULU

3. Ko ntendere wathu ungasokonezeke tani ndawa ya matenda yakulu panango muliri?

³ Muliri panango matenda yakulu vingachitise kuti moyo wathu ukhale woshupa maninge. Ndoganizani momwe wanthu azinji ankubonerera ndawa ya koronaviru. Matenda mwaya yaboneresa wanthu azinji ndipo anango ambachita kusowa tulo. Koronaviru idachitisa kuti azinji akhale na nkhawa, matenda ya m’maganizo, kumwa maninge mowa na kuphatisa basa mankhwala yosokoneza msolo, nkhanza za m’banja ndipo anango ambafuna kudzipha. Peno mudera yanu mwafika matenda yofalikira mwakankulumize, ko mungachite tani kuti muchepese nkhawa nkukhala na ntendere wa Mulungu?

4. Ko vomwe Yesu adalewa pankhani ya ntsiku zomalizira vitithandiza tani kukhala na ntendere?

⁴ Yesu adaleweratu kuti muntsiku zomalizira, kudzakhale matenda na miliri ‘m’madera yosiyanasiyana.’ (Luka 21:11) Ko kudziwa vimwivi kungatithandize tani kukhala na ntendere? Tidabwalini kukabwera matenda yofalikira mwakankulumize. Viri teno ndawa tidziwa kuti vinkukwanirisa mawu ya Yesu. Ndipomwapa titewedza malangizo yomwe Yesu adapereka kwa wanthu wokhala muntsiku zomalizira kuti: ‘Osati mudzachite navo mantha.’—Mat. 24:6.

5. (a) Mobverana na Afilipi 4:8, 9, ko tingafotokoze chani mpemphero tikagumana na matenda yakulu? (b) Ko kubvesera Baibolo yotepa kungakuthandizeni tani?

⁵ Matenda yofalikira mwakankulumize yangatisowese pophata ndipo tingakhale na nkhawa. Vimwevi ndivo vidachitikira mulongo munango dzina yake Desi.b Padawona kuti amalume, m’bale wake na anfulumero wake afa na koronaviru, wenze na mantha yakuti panango iye aphatiwembo nkupasa amayi wake okalamba. Wenze pomwe na nkhawa yakuti panango amalizire kuluza basa yake nkumbakangira kugula vakudya na kulipira nyumba. Nthawe zizinji ambasowa tulo ndawa yoganizira vimwevi. Koma Desi adakwanisa kukhala na ntendere. Ko nchani chidamuthandiza? Iye adapemphera kwa Yahova nkuchita kutomoleratu kuti ankufuna ntendere wa muntima kuti ambakwanise kuganiza bwino. (Lewengani Afilipi 4:8, 9.) Iye adawona momwe Yahova ‘angayankhulira’ naye pangabvesera Baibolo yochita kutepa. Iye adati: “Mawu yanidabvesera yadanikhazika moyo pasi ndipo yadanikumbusa kuti Yahova ni wachifundo maninge.”—Sal. 94:19.

6. Ko mungaphindule tani ndawa yopfunzira pamwekha na kugumanika pamisonkhano?

⁶ Kukabwera matenda yofalikira mwakankulumize, tingakwaniselini kumbachita vinthu vatingachita kalekale. Koma olo nteno, osati timbachite kukangiratu kupfunzira patekha na kuchita misonkhano. Mukanyang’anira mavidiyo na kuwerenga mabukhu, mungawone kuti abale na alongo wathu ankugumanambo na mabvuto ninge mwaya, koma ankupitiriza kukhala okhulupirika kwa Yahova. (1 Pet. 5:9) Mukagumanika pamisonkhano, mungabve mawu yolimbikisa ya m’Baibolo yomwe yangakuthandizeni kumbaganiza bwino. Mungakhale pomwe na mwayi wolimbikisa anzanu ndipo iwombo angakulimbikiseni. (Aro. 1:11, 12) Mukambaganizira momwe Yahova adathandizira atumiki wake panthawe yomwe angadwala, kuchita mantha panango kumbadziwona kuti ali okhaokha, chikhulupiriro chanu chidzalimbe ndipo mudzakhale wotsimikiza kuti akuthandizenimbo.

7. Ko mwapfunzira chani pa chitsanzo cha mtumi Yohane?

⁷ Yesesani kumbacheza na abale na alongo wanu. Matenda yofalikira mwakankulumize yangachitise kuti timbakhalirane patali na wanthu kuphatanidzapo abale na alongo wathu. Vikakhala tene, mungabve ninga mwadabvera mtumi Yohane. Iye ambafuna kuonana na shamwali wake Gayo maso na maso. (3 Yoh. 13, 14) Koma Yohane ambadziwiratu kuti papite nthawe kuti adzaonane na Gayo. Ndipomwapa Yohane adandomunembera kalata. Imwembo peno mungakwaniselini kugumana na abale na alongo wanu maso na maso, mbachezani nawo pa foni, kuwafonera na vidiyo panango kuwanembera mensaje. Mukambacheza nawo kawirikawiri, mukhala na ntendere na otetezeka. Mukakhala na nkhawa yonyanya, mumbawauze akulu ndipo adzakulimbikiseni maninge.—Yes. 32:1, 2.

MOMWE MUNGAKHALIRE NA NTENDERE MUKAMBAGUMANA NA MATSOKA YACHILENGEDWE

8. Ko matsoka yachilengedwe yangasokoneze tani ntendere wanu?

⁸ Peno imwepo mudashupikako kale ndawa yosefukira kwa madzi, kugunduzika kwa pasi panango moto, tinashuwa kuti vidakuwawani kwa nthawe itali. Peno mudaferewa wanthu wa m’banja mwanu panango kuluza katundu, ni vodziwikiratu kuti mudakwinyirira maninge, kusowa chochita ndipo vidakukalipisani. Vikakhala tene, osati mumbadziwone kuti ndimwe wokonda chuma panango munachikhulupiriro chochepa. Tinkulewa tene ndawa yakuti muli pabvuto ikulu ndipo anango angafune kuti muchite vinthu mosaganiza bwino. (Yobu 1:11) Koma mungakwanise kukhala na ntendere podiya kuti muli pabvuto ikulu. Ko mungachite tani?

9. Ko Yesu adatikonzekeresa tani kumatsoka yachilengedwe?

⁹ Kumbukirani vomwe Yesu adaleweratu kuti vidzachitike. Wanthu anango awona kuti mudera yawo mungachitikelini matsoka yachilengedwe. Koma ise tinkudziwa kuti yangachitike palipose olo mudera yathu chaimo. Yesu adauza opfunzira wake kuti mapeto yakanati kufika, kudzachitike ‘vivomezi vamphanvu.’ (Luka 21:11) Iye adalewa pomwe kuti ‘wanthu azinji ambadzabverelini malamulo.’ Vimwevi vinkuchitisa kuti wanthu ambachite vauchigananga, nkhanza na nkhondo. (Mat. 24:12) Yesu alibe kulewa kuti vimwivi vindodzachitikira wanthu osatumikira Yahova. Viri teno ndawa yakuti atumiki wa Yahova azinji ankubonerambo na mabvuto mwaya. (Yes. 57:1; 2 Akor. 11:25) Yahova atitetezalini modabwisa kumatsoka yachilengedwe, koma iye atipasa vodikana kuti tikhale na ntendere na wodekha.

10. Ndawa chani tingalewe kuti kukhaliratu wokonzeka ni chizindikiro chakuti tithemba Yahova? (Miyambo 22:3)

¹⁰ Timbakhale wokonzekakonzeka kuti tidzakwanise kukhala odekha kukadzachitika matsoka yachilengedwe. Ko manje tikambakonzekera, ndiye kuti tinkuthembalini Yahova? Neye ndivolini. Kukonzekera kuwonesa kuti tinkukhulupirira kuti Yahova adzatisamalire. Ndawa chani tinkulewa tene? Mawu ya Mulungu yatilimbikisa kuti timbakonzekere ngozi zadzidzidzi. (Lewengani Miyambo 22:3.) Ndipo gulu ya Mulungu yakhala inkutikumbusa mobwerezabwereza kuti timbakhaliretu okonzeka.c Tiuziwa vimwivi pamisonkhano, m’mabukhu na pa pavilengezo va panthawe yake. Ko imwepo muthemba Yahova? Peno mwadawira kuti inde, ndiye kuti muyesese kukhaliratu wokonzeka chivomezi chikanati kuchitika.

11. Ko mwapfunzira chani pachitsanzo cha Margaret?

¹¹ Onankoni vomwe vidachitikira mulongo wathu Margaret. Iye adauziwa kuti achoke mwakankulumize ndawa yakuti mudera yawo mudabwera moto wadzidzidzi. Pakuti wanthu azinji ambathawa kabodzi na kabodzi, m’misewu mudadzala makaro ndipo palibe adakakwanisa kufambisa kankulumize. Kwenze viutsi vizinji vipsipa ndipo Margaret ambakwanisalini kubula nkaro yake. Koma iye adakwanisa kupulumuka ndawa yakuti wenze adakonzekera. Iye wenze na mapa yomwe idakamuthandiza kuchinja msewu nkuyenda unango. Iye ambadziwa pomwe kwangathawire peno vinthu vashupiratu. Pakuti Margaret wenze adakonzeka, adapulumuka podiya kuti vinthu venze voshupa.

12. Ndawa chani tichadekana kubvera malangizo yoteteza moyo wathu?

¹² Pofuna kutiteteza na kutipulumusa, akuluakulu wa boma angatiuze kuti tichoke pamuyi panango kutiuza vinthu vinango. Wanthu anango ana chinono ndipo afunalini kumbauziwa vochita. Koma Baibolo ilangiza isepano Akhrisitu kuti: ‘Ndawa ya Ambuya, gonjerani dongosolo iliyose yokonzewa na wanthu. Vilibe basa peno yakonzewa na prezidente ndawa yakuti anaudindo ukulu, panango kukonzewa na magovernadoli yotumiwa na iye.’ (1 Pet. 2:13, 14) Gulu ya Mulungu itipasa pomwe malangizo yotithandiza kuti tipulumuke. Tiuziwa mobwerezabwereza kuti tikachinja namba ya foni timbawapase akulu kuti adzakwanise kutifonera vinthu vikashupa. Ko imwepo muchita vimwevi? Tiuziwa pomwe vatingachite kuti tipulumuke, titambire chithandizo na momwe tingathandizire anzathu. Peno tibveralini, tingaikhe moyo wathu pangozi ndipo tingabonerese akulu. Kumbukirani kuti amuna okhulupirika mwawa anyang’anira miyoyo yathu. (Aheb. 13:17) Margaret adati: “Ninkutsimikiza kuti kubvera malangizo ya akulu na ya gulu ndiko kudanithandiza kuti nipulumuke.”

13. Nchani chathandiza Akhrisitu azinji othawa kwawo kuti akhale okondwa na wantendere?

¹³ Abale na alongo azinji omwe adathawa kwawo ndawa ya matsoka yachilengedwe panango nkhondo, adayesesa kumbachita vizinji pakutumikira Yahova. Ninge mwevenzere kwa Akhrisitu oyambirira omwe adathawa kwawo ndawa yodzudziwa, abale na alongo wathu ankupitiriza ‘kulengeza ntontholo wabwino.’ (Mac. 8:4) Kulalikira kuwathandiza kuti aikhire nzeru pa Ufumu m’malo mwa kumbandoganizira mabvuto yawo. Vimwivi vawathandiza kuti apitirize kukhala okondwa na wantendere.

MWATINGAKHALIRE NA NTENDERE PODIYA KUTI TINKUDZUDZIWA

14. Ko kudzudziwa kungasokoneze tani ntendere wathu?

¹⁴ Kudzudziwa kuchitisa kuti tiluze vinthu vomwe vimbatithandiza kukhala pantendere. Tikhala okondwa maninge peno tinkukwanisa kusonkhana pabodzi, kulalikira momasuka na kuchita vinthu vinango va ntsiku na ntsiku mosaganizirako kuti ntsiku inango tidzathamingisiwe. Koma ufulu wose moyu ukatimalira, tingakhale na nkhawa ndawa yosadziwa vomwe vitichitikire. Ni vachibadwa kukhala na nkhawa yatene, koma tichadekana kusamala. Yesu adati kudzudziwa kungachitise kuti opfunzira wake asowe pophata. (Yoh. 16:1, 2) Koma ko tingapitirize tani kukhala na ntendere tikambadzudziwa?

15. Ndawa chani tifunikalini kugopa kudzudziwa? (Yohane 15:20; 16:33)

¹⁵ Mawu ya Mulungu yatiuza kuti: ‘Wose wofuna kukhala na moyo wochita chifuniro cha Mulungu mobverana na Khrisitu, adzadzudziwe.’ (2 Tim. 3:12) M’bale munango dzina yake Andrei ambatsimikizalini kuti wose angadzudziwedi paidalambiziwa basa yathu yolalikira mudziko yawo. Iye adayamba kuganiza kuti: ‘Pakuti mudziko ino muli Mboni zizinji, ko boma ingakwanise tani kutithamingisa tose?’ Koma kumbandoganizira vimwivi kudachitisa kuti Andrei akhale na nkhawa ikulu m’malo mwakuti akhale na ntendere. Abale na alongo anango adasiya vose m’manja mwa Yahova m’malo moona kuti adzakwanise kudziteteza okha. Iwo ambadziwa kuti angathamingisiwe, koma enze alibe nkhawa ikulu ninge ya Andrei. Ndipomwapa nayembo adawona kuti angachite bwino kuchinja kaganizidwe kake nkuyamba kuthemba Mulungu. Padandochita vimwevi, adakhala na ntendere ndipo ni wokondwa podiya kuti ali pamabvuto. Isembo tingakwanise kukhala okondwa. Yesu padatichenjeza kuti nthawe iliyose tingadzudziwe, adatitsimikizira pomwe kuti tingakwanise kupitiriza kukhala okhulupirika.—Lewengani Yohane 15:20; 16:33.

16. Ko timbayesese kubvera malangizo yochokera kuponi panthawe yomwe tinkudzudziwa?

¹⁶ Peno basa yathu yalambiziwa panango atiimisa kuchita vinthu vinango, tingatambire malangizo yochokera ku ofesi ya nthambi na kwa akulu. Malangizo mwayo yangakhale yofotokoza vatingachite kuti tipitirize kukhala paushamwali na Yahova, kuti tikhale otetezeka na momwe tingapitirizire kulalikira mwatingakwanisire. Mukayatambira malangizo mwayo, mbayesesani kubvera podiya kuti munkubvesalini kuti ndawa chani yaperekewa. (Yak. 3:17) Ndipo ayi kumbaulula kwa wanthu osayenerera madzina ya abale na alongo wathu, momwe tinkuchitira misonkhano na njira zolalikirira.—Mla. 3:7.

17. Ninge atumi wa kalekale, ko isembo ndise otsimikiza kuchita chani?

¹⁷ Satana ankudzudza maninge atumiki wa Yahova ndawa yakuti iwo ‘ankulalikira ntontholo wabwino wolewa va Yesu.’ (Chiv. 12:17) Koma ayi kubvuma kuti Satana na wanthu wake akuchitiseni mantha. Viri teno ndawa yakuti kulalikira na kupfunzisa wanthu ndiko kungatithandize kuti tikhale wokondwa na wantendere. Kalekale atumi padauziwa na atsogoleri wachiyuda kuti aleke kulalikira, iwo adawona kuti viri bwino kubvera Mulungu. Iwo adapitiriza kulalikira ndipo basa mwiyi idawathandiza kukhala okondwa. (Mac. 5:27-29, 41, 42) Boma ikatilambiza kulalikira, tingafunike kumbalalikira mosamala maninge. (Mat. 10:16) Tikayesesa kuchita vatingakwanise, tidzakhale na ntendere womwe ubwera ndawa yokondweresa Yahova na kupfunzisa wanthu kuti adzapulumuke.

‘MULUNGU WANTENDERE ADZAKHALE NAMWE’

18. Ko ni mbani angatipase ntendere?

¹⁸ Khalani otsimikiza kuti podiya vinthu vishupe tani, ni vokwanisika kukhala na ntendere. Panthawe yoshupa, timbakumbire ntendere wa Mulungu ndipo iye adzatipase. Mbamuthembani Yahova kukabwera matenda yofalikira mwakankulumize, matsoka yachilengedwe panango kudzudziwa. Yesesani kukhala pafupi na gulu ya Yahova. Mbaganizirani maninge vinthu vabwino vatinkudikhira kutsogolo. Mukachita vimwevi, ‘Mulungu wa ntendere adzakhale namwe.’ (Afil. 4:9) Munkhani inkubwera, tidzakambirane momwe tingathandizire abale na alongo omwe ankugumana na mabvuto kuti akhale na ntendere wa Mulungu.