“Udzakhale na ine m’Paradaiso”

1. Ko Yesu padasala pang’ono kufa, adachipolomisa chani chigananga chenze kusaidi kwake? (Luka 23:39-43)

YESU na vigananga viwiri vomwe venze m’mbalim’mbali mwake ambabva kuwawa maninge uku achimbadziwa kuti afe manjemanje. (Luka 23:32, 33) Pakuti vigananga vimwevi venzelini wopfunzira wa Yesu, vidayamba kumunyoza maninge. (Mat. 27:44; Maliko 15:32) Koma chigananga chibodzi chidachinja. Icho chidati: ‘Yesu, mudzanikumbukireko mukadzangena mu Ufumu wanu.’ Pamwapo Yesu adamudawira kuti: ‘Shuwa ninkukuuza lero, iwepo udzakhale na ine m’Paradaiso.’ (Lewengani Luka 23:39-43.) Palibe pankuonesa kuti panthawe yomwe Yesu angalalikira padziko pano chigananga chimwechi chenze chidabvuma ntontholo wa ‘Ufumu wakudzulu.’ Ndipo Yesu alibe kuuzako mwamuna moyu kuti adzangene mu Ufumu. (Mat. 4:17) Yesu adamupolomisa kuti adzakhale m’Paradaiso pano padziko yapasi. Ndawa chani tinkulewa tene?

2. Nchani chinkuonesa kuti chigananga chile chenze Myuda?

² Vinkuwoneka kuti chigananga chomwe chidalapa chile chenze Myuda. Icho chidauza chigananga chinzake kuti: ‘Ko iwepo ugopalini Mulungu pakuwona kuti unkutambirambo chilango ninge cha munthu moyu?’ (Luka 23:40) Ayuda angatumikira Mulungu m’bodzi, koma wanthu anango angatumikira milungu yazinji. (Eks. 20:2, 3; 1 Akor. 8:5, 6) Adakati chigananga chimwechi chenzelini Myuda, chidakabvunza kuti: ‘Ko iwepo ugopalini milungu kani?’ Ndipo Yesu alibe kutumiziwa kwa wanthu wa khaindi inango, koma kwa ‘nkhosa zosokera za mnyumba ya Izirayeli.’ (Mat. 15:24) Ndipo Mulungu adauza Aizirayeli wokha kuti adzamukise wakufa. Panango chigananga cholapa chimwechi chimbadziwa vimwevi. Tinkulewa teno ndawa yakuti chimbatsimikizira kuti Yahova adzamukise Yesu kuti akatonge mu Ufumu wa Mulungu. Mwamuna moyu ambatsimikizira pomwe kuti Mulungu angadzamumukise.

3. Ko chigananga chile chidaganizira chani pachidabva Yesu ankufotokoza va Paradaiso? Fotokozani. (Genesis 2:15)

³ Pakuti chigananga chimwechi chenze Myuda, panango chimbadziwa bwinobwino mbiri ya Adamu na Hava nakuti Yahova wenze adawaikha m’Paradaiso. Ndipomwapa chimbadziwa bwinobwino kuti Paradaiso womwe Yesu ankufotokoza, yadzakhale malo yabwino pano padziko yapasi.—Lewengani Genesis 2:15.

4. Ko vomwe Yesu adauza chigananga chile vichadekana kutilimbikisa kuchita chani?

⁴ Mawu yomwe Yesu adauza chigananga yachadekana kutilimbikisa kuganizira momwe moyo udzakhalire m’Paradaiso. Pakalipano tingapfunzirepo kanthu pa nkhani ya Paradaiso tikaganizira ntendere womwe wenzepo panthawe yomwe Mpfumu Solomo ingatonga. Tinashuwa kuti Yesu yemwe aposha Solomo, akadzayamba kutonga pabodzi na omuthandizira adzabwerese ntendere padziko yapasi. (Mat. 12:42) Ndipomwapa, wa ‘nkhosa zinango’ achadekana kudziwa bwino vangachite kuti ayenerere kudzakhala na moyo wosapera m’Paradaiso.—Yoh. 10:16.

KO MOYO UDZAKHALE TANI M’PARADAISO?

5. Ko munkudikhira chani m’Paradaiso?

⁵ Ko nchani chichabwera m’maganizo yanu mukambaganizira momwe moyo udzakhalire m’Paradaiso? Panango muganizira malo yabwino yolingana na munda wa Edeni. (Gen. 2:7-9) Panango muganizira pomwe mwati udzakwanirisikire ulosi wa Mika wakuti mtumiki wa Mulungu ‘aliyese adzakhale pasi pa muti wa mpesa na pasi pa muti wa nkuyu.’ (Mika 4:3, 4) Apo neye, muganizira pomwe vomwe Baibolo ichafotokoza kuti kudzakhale chakudya chizinji. (Sal. 72:16; Yes. 65:21, 22) Muganizira kuti muli khale pa malo yabwino ndipo pameza pana chakudya chizinji chabwino. Panango muganizira pomwe kuti munkupuma kamphepo kabwino kochokera m’miti na mafololi yokhuza. Panthawe ibodzibodzi mweyo nkumbabva mawu ya azibale, azishamwali na anango omwe amukisiwa. Vose vimwevi vidzachitikedi padziko yapasi pano. Kuthimizira pamwapa, m’Paradaiso tidzakhale pomwe na basa yabwino.

6. Ko timbadzachite chani m’Paradaiso? (Onani foto.)

⁶ Yahova adatikonza kuti timbakondwe na basa yathu. (Mla. 2:24) Tidzakhale wotangwanika maninge na basa nkati mwa magole 1000 ya utongi wa Yesu. Wanthu womwe adzapulumuke pa chisautso chikulu na anango azinji womwe adzamukisiwe, adzafunike kuwagumanira chakudya, vovala na malo yokhala. Tikadzayesesa kuwagumanira vinthu vimwevi, tidzadalisiwe maninge! Pakuti Adamu na Hava ambalima m’munda wa Edeni, isembo tidzakhale na mwayi wosamalira Paradaiso padziko pano. Ndoganizani mwati vidzakhalire vokomedza kupfunzisa wanthu azinji womwe adafa Yesu akanati kubwera ndipo alibe kuwonako momwe Yahova adakwanirisira cholinga chake.

7. Ko tinashuwa kuti moyo udzakhale tani m’paradaiso, ndipo ndawa chani?

⁷ Tinashuwa kuti m’Paradaiso tidzakhale na moyo wabwino maninge, wantendere, wadongosolo ndipo tidzakhale na vinthu vizinji. Ndawa chani tinkulewa tene? Ndawa yakuti vomwe Yahova wachitako kale vinkuwoneseratu momwe adzafambisire vinthu akadzayamba kutonga. Tinkulewa tene ndawa ya momwe adathandizira Mpfumu Solomo potonga wanthu.

UTONGI WA SOLOMO UDAWONESA MOMWE MOYO UDZAKHALIRE M’PARADAISO

8. Ko mawu ya pa Salimo 37:10, 11, 29 yadakwanirisika tani payadanembewa na Mpfumu Davide? (Onani “Mibvunzo yochokera kwa olewenga” mu ntsanja mwaino.)

⁸ Mpfumu Davide adauziriwa kunemba momwe moyo udzakhalire ikadzayamba kutonga mpfumu yokhulupirika. (Lewengani Salimo 37:10, 11, 29.) Tikonda kuphatisa basa lemba ya Salimo 37:11 pakufotokozera anango va Paradaiso. Vimwevi vidzachitikedi ndawa yakuti Yesu adaphatambo mawu mwaya pa Ulaliki wa Paphiri ndipo adawonesa kuti vidzakwanirisike kutsogolo. (Mat. 5:5) Koma mawu ya Davide yangawonesa pomwe mwati udzakhalire utongi wa Mpfumu Solomo. Iye pangatonga Aizirayeli, atumiki wa Mulungu ambakhala mwantendere mudziko yabwino ‘yofamba mkaka na uchi.’ Mulungu adapolomisa kuti: ‘Mukapitiriza kutewedza malamulo yangu . . . , Nidzakupaseni ntendere mudziko ndipo mudzagone pasi palibe munthu wokugopsani.’ (Lev. 20:24; 26:3, 6) Mulungu adawachitiradi vimwevi munthawe ya utongi wa Solomo. (1 Mbiri 22:9; 29:26-28) Ndipo adapolomisiwa pomwe kuti wanthu oipa ‘adzakhalekolini pomwe.’ (Sal. 37:10) Mawu ya pa Salimo 37:10, 11, 29 yadakwanirisika kalekale ndipo yadzakwanirisike pomwe kutsogolo.

9. Ko mpfumukazi ya ku Sheba idafotokozako chani pa nkhani ya utongi wa Mpfumu Solomo?

⁹ Aizirayeli vingawafambira bwino maninge pangatongewa na Mpfumu Solomo ndipo mpfumukazi ya ku Sheba idabvambo vimwevi. Podiya kuti mpfumukazi mweyi ingakhala kutali maninge na ku Yerusalemu, idachita ulendo kuti ikachite kuona yokha. (1 Maf. 10:1) Mpfumukazi mweyi paidamaliza kuyesa Solomo, idati: ‘Nidandouziwa hafu chabe. . . . Odala wanthu wanu ndipo ni odala atumiki wanu awa womwe achatumikira pamaso panu nthawe zose nkumbabva nzeru zanu.’ (1 Maf. 10:6-8) Momwe vinthu vingafambira panthawe ya utongi wa Solomo vikundoonesa vomwe Yahova adzachite mu utongi wa Mwana wake Yesu.

10. Ko Yesu aposha Solomo mu njira ziponi?

¹⁰ Yesu aposha Solomo mu njira zizinji. Solomo wenze wochimwa ndipo adachita machimo yakuluyakulu yomwe yadachitisa kuti atumiki wa Mulungu agumane na mabvuto yazinji. Koma Yesu ni wangwiro ndipo aphonyesalini vinthu. (Luka 1:32; Aheb. 4:14, 15) Yesu adagumana na viyeso voshupa vochokera kwa Satana. Koma olo kuti venze teno, iye alibe kuphonyesa panango kuchita vinthu vomwe vidakachitisa kuti atumiki wokhulupirika agumane na mabvuto. Ndipomwapa ni mwayi ukulu kwa ise wotongewa na iye.

11. Ko Yesu adzathandize tani wanthu?

¹¹ Yesu adzathandizane na wa 144 000 pakusamalira wanthu na kukwanirisa chifuniro cha Yahova padziko yapasi. (Chiv. 14:1-3) Amuna na akazi mwawa adabonera na mabvuto yazinji, ndipomwapa adzatitonge mwachifundo maninge. Koma ni basa iponi yomwe adzaphate makamaka?

KO WODZOZEWA ADZAPHATE BASA YANYI?

12. Ko wa 144 000 adzapasiwe basa iponi na Yahova?

¹² Basa yomwe Yesu na wodzozewa adzaphate ni ikulu maninge kuposha yomwe Solomo adaphata. Mpfumu Solomo ambasamalira wanthu azinji wa mudziko ibodzi basi. Koma wodzozewa adzasamalire wanthu azinji maninge kuzungulira dziko yose. Tingalewe kuti wa 144 000 adapasiwa mwayi ukulu maninge.

13. Ko wodzozewa adzakhale na basa iponi?

¹³ Wa 144 000 adzaphate basa ya wantsembe ninge Yesu. (Chiv. 5:10) Panthawe yomwe Aizirayeli angadekana kubvera Chilamulo cha Mose, wantsembe ambawathandiza kuti akhale na moyo wabwino nakuti akhale paushamwali na Yahova. Chilamulo ‘chimbandowonesa vinthu vabwino vomwe vingabwera.’ Ndipomwapa tingalewe kuti Yesu na womuthandizira adzakhale na basa yothandiza wanthu kukhala na moyo wabwino nakuti akhale paushamwali na Mulungu. (Aheb. 10:1) Pakali pano tinkudziwalini kuti wantsembe mwawa ambadzayankhule nawo tani wanthu padziko pano omwe adzatongewe na Ufumu wa Mulungu. Podiya kuti tinkudziwalini makonzedwe yomwe Yahova adzachite, ndise otsimikiza kuti m’Paradaiso, wanthu adzatsogolerewe bwino.—Chiv. 21:3, 4.

KO ‘WANKHOSA ZINANGO’ ANGACHITE CHANI KUTI ADZANGENE M’PARADAISO?

14. Nchani chinkuwonesa kuti wa ‘nkhosa zinango’ ni wobverana na wodzozewa?

¹⁴ Yesu adati wanthu omwe adzatonge naye pabodzi ni ‘kagulu ka nkhosa.’ (Luka 12:32) Iye adalewa pomwe kuti gulu yachiwiri ni ya ‘nkhosa zinango.’ Magulu yose yawiri mwaya ni gulu ibodzi. (Yoh. 10:16) Magulu yawiri mwaya yankuphatira kale basa pabodzi ndipo yadzapitirize kuphatira pabodzi dziko yose ikadzakhala Paradaiso. Koma panthawe mweyo, wa ‘kagulu ka nkhosa’ adzakhale kuti ayenda kudzulu ndipo wa ‘nkhosa zinango’ adzakondwe na moyo wosapera padziko yapasi mpakana kalekale. Koma kuti wa ‘nkhosa zinango’ mwawa ayenerere kudzakhala m’Paradaiso, pali vomwe achadekana kuchita.

15. (a) Ko wa ‘nkhosa zinango’ ankuthandiza tani wodzozewa? (b) Ko mungamutewedzere tani m’bale yemwe ankulalikira m’banka? (Onani foto.)

¹⁵ Chigananga cholapa chile chidaferamo chikanati kukhulupirira ntsembe ya Khrisitu. Koma ise wa ‘nkhosa zinango’ tinanjira zizinji zowonesera kutembeja pa vomwe Yesu adatichitira. Mwakulinganiza, tiwonesa kuti tikonda Yesu pakuthandizira wodzozewa. Yesu adati adzaweruze wanthu mobverana na vomwe adachitira odzozewa. (Mat. 25:31-40) Tingawonese kuti tinkuthandiza wodzozewa tikambaphata basa yolalikira na kupfunzisa wanthu mwakhama. (Mat. 28:18-20) Kuti tikwanise kupfunzisa wanthu, timbaphatise basa mokwana bukhu yopfunzisira wanthu yakuti Kondwani na moyo mpaka kalekale! Peno mukalibe kuyamba kupfunzira Baibolo na munthu, mungachite bwino kudziikhira cholinga chakuti muyambe kupfunzira Baibolo na wanthu azinji.

16. Ko tingachite chani kuti tidzakhale m’Paradaiso?

¹⁶ Tinkufunikalini kudikhira kuti tidzangeneretu m’Paradaiso nkuyamba bwino kuchita vinthu vokondweresa Yahova. Olo manjeuno tingachite bwino kuyesesa kukhala wachilungamo pa voyankhula, vochita na kupewa makhalidwe yoipa. Timbakhale pomwe okhulupirika kwa Yahova, kwa munzathu wa m’banja na kwa Akhrisitu anzathu. Tikambayesesa kutewedza mpfundo za Yahova mudziko yoipa ino, tidzashupikelini kuwonesa makhalidwe yabwino m’Paradaiso. Tingachite pomwe bwino kukulisa maluso kuti tidzayaphatise basa mudziko inyowani. Onani mu ntsanja mwaino nkhani yakuti “Ko ndimwe wokonzeka ‘kudzatambira dziko yapasi’?”

17. Ko timbadziimbe mulandu ndawa ya machimo yatidachita kalekale? Fotokozani.

¹⁷ Timbapewe pomwe kudziimba mulandu maninge ndawa ya machimo yakuluyakulu yatidachita kalekale. Koma osati ‘timbachitire dala machimo,’ ndawa tikachita teno ndiye kuti tinkusenzekesa ntsembe ya dipo. (Aheb. 10:26-31) Koma peno tinkudziringa ndawa ya machimo yakuluyakulu yatidachita nkuyesesa kuchinja, timbatsimikize kuti Yahova adatikhululukira na moyo wose. (Yes. 55:7; Mac. 3:19) Kumbukirani mawu yomwe Yesu adauza Afalisi kuti: ‘Nilibe kubwera kudzachemera wanthu olungama, koma ochimwa.’ (Mat. 9:13) Ntsembe ya Yesu inamphanvu ikulu yopfudza machimo yathu yose.

IMWEPO MUNGADZAKHALE NA MOYO WOSAPERA M’PARADAISO

18. Ko munkufuna kudzachezako nkhani zanyi na chigananga chenze kusaidi ya Yesu?

¹⁸ Ganizirani kuti muli m’Paradaiso ndipo munkuyankhula na chigananga chile chingayankhula Yesu! Tinashuwa kuti mungakambirane momwe ntsembe ya dipo inkutiphindulisira. Panango mungamuuze kuti akusimbireni vinango vomwe vidachitikira Yesu padasala pang’ono kufa na momwe iye adabvera padauziwa kuti adzangene m’Paradaiso. Ndipo panango iye angadzafunembo kuti mumusimbire mwevenzere vinthu muntsiku zomalizira zotongewa na Satana. Udzakhale mwayi ukulu maninge kupfunzira Mawu ya Mulungu na wanthu watene.—Aef. 4:22-24.

19. Ndawa chani moyo wa m’Paradaiso udzatikolelini? (Onani foto ya pakhava.)

¹⁹ Moyo wa m’Paradaiso udzatikolelini neye. Viri teno ndawa yakuti nthawe zose timbadzagumane na wanthu wabwino ndipo timbadzaphate basa yokomedza. Ndipo chokomedza maninge nchakuti ntsiku na ntsiku timbadzamudziwe bwino Yahova nkumbakondwa na vinthu vomwe watipasa. Tidzapfunzire vizinji va iye ndipo tidzavidziwe bwino vinthu vadalenga. Nkuyenda kwa nthawe, tidzapitirize kumukonda maninge. Ndipomwapa tinkutembeja maninge Yahova na Yesu ndawa yotipasa mwayi wodzakhala m’Paradaiso na moyo wosapera!