MSOLO 37
Ko Baibolo ichalewa chani pa nkhani ya basa na mali?
Ko nthawe zinango mudakhalako kale woneta ndawa ya nkhawa pankhani ya basa panango mali? Vingakhale voshupa maninge kusamalira vosowa vathu uku tinkutumikira Yahova munjira yabwino. Baibolo ichapereka malangizo yabwino maninge yomwe yangatithandize.
1. Ko Baibolo ichanena chani pa nkhani ya basa?
Mulungu achada kuti timbakondwe na basa. Baibolo ichati ‘kwa munthu palibe chabwino koposha kuti . . . akondwerese mtima wake ndawa yakuti waphata basa mwakhama.’ (Mlaliki 2:24) Yahova achaphata basa mwakhama. Tingamutewedzere iye mwakuphata basa modzipereka. Tichamulemekeza ndipo tichakhala wokondwa maninge.
Basa ni yakudikana. Koma tichadikanalini kubvuma kuti ikhale yakudikana maninge kuposha kutumikira kwathu Yahova. (Yohane 6:27) Iye achatipolomisa kuti tikamuikha pa malo yakuyamba adzatisamalire pa vosowa vathu vakuthupi.
2. Ko kuwona mali mwachikatikati kuchatanthauza chani?
Baibolo ichabvumikiza kuti ‘mali ichatetezera,’ koma ichatiuza pomwe kuti mali payokha ingatichitiselini kukhala wokondwa. (Mlaliki 7:12) Ndipomwapa, ayi kuti timbakonde maninge mali koma ‘timbakhale wokhutira na vinthu vomwe tinavo.’ (Lewengani Aheberi 13:5.) Tikambapitiriza kukhala wokondwa na vomwe tinavo tichakhala womasuka ku nkhawa zofuna vinthu vizinji. Tichapewa pomwe vikwerete mwachisawawa. (Miyambo 22:7) Ndipo tichapewa pomwe ngozi yogwera mu nsampha wa njuga na kuchita vinthu vinango na chakulinga chakuti tilemere mwakankulumize.
3. Ko mali zingaphatisiwe tani basa pakuwonesa kupasa?
Yahova ni Mulungu wopasa, ndipo tingamutewedzere iye tikakhalambo ‘wopasa wokonzeka kupasambo anango.’ (1 Timoteyo 6:18) Tingaphatisire basa mali zathu munjira yabwino mwakuthandizira mpingu na kuthandiza anango womwe ni wakudikana, makamaka anzathu womwe tichapemphera nawo pabodzi. Yahova achaikhira nzeru maninge osati pa kuwanda kwa vomwe tichapereka, koma chakulinga chomwe tichaperekera. Tikambapereka na mtima wose kuchokera pasi pa moyo, tichakhala wokondwa ndipo tichatamanda Yahova.—Lewengani Machitidwe 20:35.
PFUNZIRANI VIZINJI
Onani ubwino woikha mali pa malo yake na kukhala wokhutira.
4. Lemekezani Yahova munjira yomwe tichaphatira basa
Tichadekanalini kuwona basa kukhala yodikana maninge kuposha ushamwali wathu na Yahova. Wonesani VIDIYO, ndipo patsogolo pake kambiranani mibvunzo aya.
Mu vidiyo, ni chani chakupasani chidwi pa vomwe Jason wachita ali kubasa?
Ko nchani chomwe iye wachita kuti aikhe basa pa malo yake?
Lewengani Akolose 3:23, 24, ndipo patsogolo pake kambiranani mbvunzo uyu:
Ndawa chani vochita vathu pa basa ni vakudikana?
Basa ni yakudikana. Koma tichadekanalini kuti ikhale yodikana maninge kuposha kutumikira kwathu Yahova
5. Kukhala wokhutira kuchatiphindulisa
Wanthu achayesesa kuunjika mali zizinji zomwe angakwanise. Koma Baibolo ichapereka mpfundo zosiyana pankhani mweyi. Lewengani 1 Timoteyo 6:6-8, ndipo patsogolo pake kambiranani mbvunzo uyu:
Ko ni chani chomwe Baibolo ichatilimbikisa kuchita?
Olo kuti tilibe vinthu vizinji tingakwanise kukhala wokondwa. Wonesani VIDIYO, ndipo patsogolo pake kambiranani mbvunzo uyu.
Olo kuti enze na mali zidikidiki, ko nchani chidachitisa banja ile kukhala yokondwa?
Manje ko tani peno isepano tinavokale vizinji ndipo tinkufuna vinango basi? Yesu adaperekera chitsanzo pa ngozi mweyi. Lewengani Luka 12:15-21, ndipo patsogolo pake kambiranani mbvunzo uyu:
Ko ni chani chomwe imwepo mwapfunzira kuchokera pa chitsanzo cha Yesu? —Onani vesi 15.
Lewengani ndipo linganizani Miyambo 10:22 na 1 Timoteyo 6:10. Ndipo patsogolo pake kambiranani mibvunzo aya:
Ko munkuwona kuti chakudikana maninge nchani? Kukhala paushamwali wabwino na Yahova panango kukhala na mali zizinji? Ndawa chani?
Ko bvuto ni iponi Tikambakhala tinkufagafaga mali basi?
6. Yahova adzasamalire vosowa vathu
Tikakhala kuti tinkusowa mali na basa vimwevi vingayese chikhulupiriro chathu kwa Yahova. Wonesani VIDIYO kuti muwone momwe mungagwebanirane na chiyeso chimwechi cha chikhulupiriro, ndipo patsogolo pake kambiranani mibvunzo aya.
Mu vidiyo, ko m’bale ule wagumana na bvuto iponi?
Ko ni chani chomwe iye wachita kuti apirire bvuto mwaire mwanjira yabwino?
Lewengani Mateyu 6:25-34, ndipo patsogolo pake kambiranani mbvunzo uyu:
Ko Yahova ankupolomisa chani kwa wale womwe achamuikha pa malo yakuyamba?
WANTHU ANANGO ACHATI: ‘Nichadekana kuphata basa mwakhama kuti nikwanise kusamalira banja yangu. Ndipo nimbakwaniselini kuyenda kumisonkhano sondo iliyose.’
Ko ni lemba iponi yomwe ichakutsimikizirani imwepo kuti kuikha kutumikira Yahova pa malo yakuyamba nthawe zose ni chosalula chabwino?
CHIGWATO
Basa na mali ni vinthu vodikana maninge, koma tichadikanalini kubvuma kuti vitisokoneze pakutumikira kwathu Yahova.
Kubwerezera
Ko ni chani chomwe chingakuthandizeni imwepo kukhala na chikatikati pankhani ya basa?
Ko kukhala wokhutira kuchakuthandizani tani imwepo?
Ko imwepo mungawonese tani kuthemba Yahova pa polomisi yakuti adzasamalire wanthu wake?
KUTI MUDZIWE VIZINJI
Onani peno Baibolo ichanena kuti mali niyoipa.
‘Mali ni muzu wa vowawa va khaindi iliyose’ (Nkhani ya pa intaneti)
Pfunzirani kupasa komwe kuchalemekeza Mulungu.
‘Ko Baibolo ichalewa chani pa nkhani yopasa?’ (Nkhani ya pa intaneti)
Ko kutchaiya njuga ni koipa?
‘Vomwe Baibolo ichanena pa nkhani ya njuga’ (Galamukani! ya Março, 2015)
Onani chomwe chidalimbikisa munthu yemwe wenze wa njuga na wakuba kuti achinje moyo wake.
‘Ningakonda maninge kukwera kavalo’ (Nsanja ya Olonda ya 1 Novembro, 2011)