“Mumbasunge mawu yangu nthawe zose”
‘Mukambasunga mawu yangu nthawe zosea, ndiye kuti ndimwedi wopfundira wangu. Mudzadziwe chonadi, ndipo chonadi chidzakumasuleni.’—Yohane 8:31, 32.
Vomwe mawu mwaya yachatanthauza: “mawu” ya Yesu yomwe lemba mweyi ichanena ichatanthauza vomwe iye adapfunzisa, vomwe ni vochokera kwa Mulungu. Yesu adati: “Ababa womwe adanituma adanipasa lamulo pa vomwe nichadekana kunena komasoti kuyankhula.” (Yohane 12:49) Pomwe Yesu angapemphera kwa Ababa wake kudzulu, Yahova Mulungu, iye adati: “Mawu yanu ndiyo chonadi.” Ndipo mwapa nthawe zizinji akakhala kuti akupfunzisa, ambatomola vomwe mawu ya Mulungu yambanena pakutsimikizira kuti vomwe achapfunzisa ni chaivo. (Yohane 17:17; Mateyu 4:4, 7, 10) Ndawa ya vimwevi Akhrisitu chaiwo, ‘achasunga mawu yake nthawe zose,’ kutanthauza kuti iwo achaona kuti mawu ya Mulungu, Baibolo, ni “chonadi.” Vinthu vose vomwe achakhulupirira panango kuchita vichakhala vobverana na vomwe Baibolo ichapfunzisa.
Momwe Akhrisitu woyambirira ambachitira vimwevi: Naye soti mtumi Paulo ambalemekeza mawu ya Mulungu. Iye adalemba kuti: “Malemba yose yadawuziriwa na Mulungu, ndipo ni yophindulisa.” (2 Timoteyo 3:16) Amuna womwe ambasaluliwa kuti ambapfunzisa Akhrisitu anzawo ambadekana ‘kuyaphata mwa mphamvu mawu yokhulupirika ya Mulungu.’ (Tito 1:7, 9) Akhrisitu woyambirira adalangiziwa kuti ambapewe kutewedzera ‘nzeru za wanthu na chinyengo chilibe na basa, ninge na makhalidwe ya wanthu ninge soti na mpfundo zomwe ziri mumaziko ya moyo wa mudziko iyi, osati malinga na Khrisitu.’—Akolose 2:8.
Ko ni mbani ankuchita vimwevi ntsiku zino?: Mobverana na Katekisimu wa Akatolika womwe uchanena kuti: “Vinthu vomwe tchetchi [ya Katolika] ichakhulupirira vichachokeralini m’Malemba Yochena yokha. Ndipo mwapa, peno mpfundo ni yochokera m’miyambo panango m’Malemba Yochena, ichadekana kulemekezewa komasoti kutewedzewa.” Komasoti nkhani ya m’magazini inango yaku Toronto ku Canada, mwenze mawu ya m’busa munango yemwe adabvunza kuti: “Ndawa chani tichadekana kutewedza maganizo ya munthu yemwe adakhala na moyo papita kale magole 200 kumbuyo? Isepano patekha tinanzeru zothandiza maninge, koma nthawe zizinji zichaoneka ngati nizosathandiza ndawa yakuti tichazichinja kuti zibverane na mpfundo za Yesu komasoti za m’Malemba.”
Pakulewa va Mboni za Yahova bukhu inango idalewa kuti: “Vose vomwe achakhuluprira na kutewedza pa moyo wawo vichachokera m’Baibolo.” (New Catholic Encyclopedia) Chamanjemanjepa ku Canada, pomwe wa Mboni za Yahova munango ambafuna kunena kuti ndine wa Mboni, munthu munango adamugwata mawu nkulewa kuti: “Nadziwakale kuti ndiwe wa Mboni ndawa ya Baibolo iyo. Wanthu wa Mboni wokha ndiwo achakonda kuphatisira basa Baibolo.”