‘Alirini saidi yadziko’

‘Dziko inkuwazonda ndawa alirini saidi ya dziko.’​—YOHANE 17:14.

Ko mawu mwaya yachatanthauza chani?: Pakuti Yesu wenzelini saidi ya dziko, ambangenereralini ndale komasoti vochitika va munthawe yake. Iye adalewa kuti: ‘Ufumu wangu udakakhala kusaidi ya dziko ino, atumiki wangu adakamenya nkhondo kuti nileke kuperekewa kwa Ayuda. Koma Ufumu wangu ni wochokeralini pasi pano neye.’ (Yohane 18:36) Iye adawalangiza soti wapfunzira wake kuti ambapewe maganizo, kayankhulidwe ndiposoti makhalidwe yomwe mawu ya Mulungu yachalambiza.—Mateyu 20:25-27.

Momwe Akhrisitu woyambirira ambachitira vimwevi: Munthu munango yemwe achalemba nkhani zamatchechi, dzina yake Jonathan Dymond, adanemba kuti Akhrisitu woyambirira “ambamenya nawolini nkhondo podiya kuti kuchita vimwevi kungawabweresere mabvuto ninge kunyozewa, kuikhiwa mudjeri panango kupeweratu.” Iwo ambabvuma kuboneresewa kusiyana na kungenerera nkhani za ndale. Ndipo khalidwe yawo imbachitisa kuti ambasiyane na wanthu anango. Akhrisitu adawuziwa kuti: ‘Ndawa yakuti munkupitirizalini kuthamanga nawo pabodzi mu chithaphwi cha makhalidwe yoipa, wanthu wa mudziko iyi abvesalini ndipo achakunyozani.’ (1 Petulo 4:4) Munthu munango wonemba mbiri yakalekale dzina yake Durant, adanemba kuti: “Wanthu wakunja womwe ambakonda maninge vinthu vokondweresa, ambawona kuti Akhrisitu ambawashupisa ndawa Akhrisitu mwawo ambatewedza maninge chikhulupiriro chawo komasoti ambagunduzikalini pa nkhani ya makhalidwe yabwino.”

Mbani ankuchita vimwevi ntsiku zino? Pa nkhani ya Akhrisitu kusangenerera mundale, bukhu inango idalewa kuti: “Mpfundo yakuti Mkhrisitu ayi kuti ambapfunzire usocha ndawa ya chikhulupiriro chake ni yosabveka.” (New Catholic Encyclopedia) Komasoti nkhani yomwe idanembewa mu nyunzipepa inango idalewa kuti lipoti yomwe bungwe inango yowona va ufulu wa wanthu ku Africa idapereka idawonesa kuti matchetchi yose yadamenya nawo nkhondo ku Ruanda mu gole ya 1994, “ kusiyapo Mboni za Yahova zokha.” Reformierte Presse.

Pakunena va kupha wanthu mwankhanza komwe kudachitika mu utongi wa Nazi, mpfunzisi munango adadandaula kuti: “Palibe gulu ya wanthu panango bungwe iliyose mu dziko mweyo yomwe idafotokozako chilichose chowonesa kukhumudwa na mabodza yambafotokozewa komasoti na nkhanza zomwe zimbachitika mu nthawe mwiyo.” Koma mpfunzisi mwaule padayenda kumalo yanango yosungirako vinthu vakale, komwe adasungirako vinthu vomwe vidachitika pa utongi wa Nazi, iye adanemba kuti: “Koma manjeuno nadziwadi chaivo.” Mpfunzisi muyo adazindikira kuti Mboni za Yahova zidapitiriza kukhala zolimba mu chikhulupiriro podiya kuti zimbadzudziwa.”

Ko tani va makhalidwe ya Akhrisitu? Magazini inango ya ku Estados Unidos idalewa kuti: “Alumbwana azinji wa mu tchetchi wa katolika ambabveranalini na vomwe chipembedzo mwechi chimbapfunzisa pa nkhani yakuti mwamuna na nkazi ayi kuti ambakhale pabodzi akanati kulowolana [komasoti] ayi kuti ambagonane akanati kulowolana.” (U.S. Catholic) M’magazini mweyi mwenze mawu ya m’busa wa tchetchi mweyi yakuti: “Alumbwana na atsikana azinji akambalowolana achakhala kuti wayamba kale kukhala pabodzi.” Koma bukhu inango idafotokoza kuti Mboni za Yahova “zichayesesa kukhala na makhalidwe yabwino.” The New Encyclopædia Britannica.”