1. Ko Yesu ni mbani?

Yesu ni mngelo wamphanvu maninge yemwe adakhalako kudzulu. Yahova akanati kusika chilichose, iye adayamba kulenga Yesu. Ndipomwapa iye achachemerewa kuti ‘woyamba kubadwa wa muchilengedwe chose.’ (Akolose 1:15) Baibolo ichanena pomwe kuti Yesu ni ‘mwana wobadwa yekha’ wa Mulungu, vimwevi vinkutanthauza kuti iye adachita kulengeweratu na Yahova. (Yohane 3:16) Yesu adaphata basa pabodzi na Ababa wake Yahova. Iye adathandiza Ababa wake kusika vinthu vinango vose. (Lewengani Miyambo 8:30.) Chikondi chomwe chilipo pakati pa Yesu na Yahova ni cholimba maninge. Yesu ni wokhulupirika ndipo ni woyankhulira wa Mulungu, panango kuti ndiye angayankhula ntontholo na malangizo yochokera kwa Mulungu. Ndipomwapa Baibolo ichachemera kuti Yesu ni ‘Mawu.’—Yohane 1:14.

Isepano tichachimwa, tichabonera ndipo tichafa ndawa ya banja yoyambirira ya Adamu na Hava yomwe ilibe kubvera Mulungu.a Koma isepano tinacho chidikhiro. Yahova adapereka njira yotipulumusira ku uchimo na impfa kudzera mwa Mwana wake Yesu Khrisitu. Baibolo ichatipfunzisa kuti kudzera mwa impfa yake, Yesu adapereka dipo. Dipo ni malipiro yomwe yachaperekewa kuti munthu munango amasuliwe. Yesu adachita kupereka moyo wake waungwiro kuti alipire dipo mweyi. (Lewengani Mateyu 20:28.) Pomwe Yesu adapereka moyo wake padziko yapasi pano, iye adafungula njira kwa ise kuti tigumane vinthu vose vomwe Adamu na Hava adaluza. Pakuchita vimwivi, Yesu adawonesa momwe iye na Yahova achatikondera. Pfunziro ino itithandize kukulisa kutembeja kwathu impfa ya Yesu.

1. Ko tingaphindule tani na impfa ya Yesu ntsiku zino?

Ndawa yakuti tose ndise wochimwa, tichachita vinthu vizinji vomwe vichakondweresalini Yahova. Podiya kuti viritene, tikakhala kuti tinkuzibvera ntsisi pa vomwe tichachita na kukumbira Yahova kudzera mwa Yesu Khrisitu kuti atikhululukire na kuchita vose vomwe tingakwanise kuti tilape pa vomwe taphonya, tingakwanise kukhala paushamwali wabwino maninge na Mulungu. (1 Yohane 2:1) Baibolo ichati: ‘Khrisitu adafera machimo kabodzi basi. Munthu wolungama moyu adafera wanthu wosalungama kuti akufikiseni kwa Mulungu.’—1 Petulo 3:18.

2. Ko kutsogolo tidzaphindule tani na impfa ya Yesu?

Yahova adatumiza Yesu kuti adzapereke moyo wake wangwiro kuti ‘aliyese wokhulupirira mwa [Yesu] aleke kudzongewa koma akhale na moyo wosapera.’ (Yohane 3:16) Tinkutembeja maninge ndawa ya vomwe Yesu adachita. Yahova manjemanje adzakonze vinthu vose voipa vomwe vidadzongeka ndawa ya kusabvera kwa Adamu. Vimwevi vinkutanthauza kuti tikawonesa chikhulupiriro muntsembe ya Yesu, tidzakhale na mwayi wokondwa mpaka kalekale mu paradaiso padziko yapasi!—Yesaya 65:21-23.

PFUNZIRANI VIZINJI

3. Impfa ya Yesu ichatimasula ku uchimo na impfa

VIDIYO: Ndawa chani Yesu adafa?—Mbali 1 (2:01)

• Ko ni mwayi uponi womwe Adamu adaluza pomwe adaleka kubvera Mulungu?

Lewengani Aroma 5:12, ndipo patsogolo pake kambiranani mbvunzo uyu:

• Ko uchimo wa Adamu uchakhudza tani moyo wanu?

Lewengani Yohane 3:16, ndipo patsogolo pake kambiranani mbvunzo uyu:

• Ndawa chani Yahova adatumiza Mwana wake padziko yapasi?

1. Adamu wenze munthu wangwiro ndipo alibe kubvera Mulungu, vimwevi vidachitisa kuti wanthu wose akhale wochimwa nakuti ambafe

2. Yesu wenze munthu wangwiro yemwe adabvera Mulungu ndipo adachitisa kuti wanthu wose adzakhale wangwiro na kudzatambira moyo wosapera

4. Impfa ya Yesu ingaphindulise wanthu wose

VIDIYO: Ndawa chani Yesu adafa?—Mbali 2 (2:00)

• Ko impfa ya munthu m’bodzi ingaphindulise tani wanthu wose?

Lewengani 1 Timoteyo 2:5, 6, ndipo patsogolo pake kambiranani mbvunzo uyu:

• Adamu wenze mwamuna wangwiro yemwe adachitisa kuti wanthu akhale wochimwa na kuti ambafe. Yesu nayembo wenze mwamuna waungwiro. Ninge momwe Adamu wenzere, ko ni mwanjira iponi yomwe iye adakaperekera ‘dipo yondendemerana’?

5. Dipo ni mphaso ya Yahova kwa imwepo

Azishamwali wa Yahova achawona dipo kuti ni mphaso yochokera kwa Yahova. Mwakulinganiza, lewengani Agalatiya 2:20, ndipo patsogolo pake kambiranani mbvunzo uyu:

• Ko mtumi Paulo adawonesa tani kuti iye angawona dipo ninge mphaso?

Adamu padachimwa, iye pabodzi na mbadwa zake zose adaweruziwa kuti afe. Koma Yahova adatumiza Mwana wake kuti adzatifere kuti imwepo mudzakhale na mwayi wodzakondwa na moyo wosapera.

Mukambalewenga mavesi aya, ganizirani momwe Yahova adabvera pomwe Mwana wake angabonera. Lewengani Yohane 19:1-7, 16-18, ndipo patsogolo pake kambiranani mbvunzo uyu:

• Ko imwepo muchabva tani mukaganizira vomwe Yahova na Yesu adakuchitirani?

CHIGWATO

Impfa ya Yesu ichapereka mwayi kuti Yahova atikhululukire machimo yathu ndipo ichatipasa pomwe mwayi wodzakhala na moyo mpaka kalekale.

Kubwerezera

• Ndawa chani Yesu adafa?

• Ko ni mwanjira yanyi moyo waungwiro wa Yesu udandendemerana na dipo?

• Ko impfa ya Yesu ichakuphindulisani tani imwepo?

KUTI MUDZIWE VIZINJI

Pfunzirani ndawa yake moyo waungwiro wa Yesu uchachemerewa kuti dipo.

‘‘Ko Yesu’ adapereka tani moyo ninge ‘dipo kwa wanthu azinji’?’ (Nkhani ya pa intaneti)

Dziwani vomwe tichadekana kuchita kuti tidzapulumuke.

‘Yesu achapulumusa—achapulumusa tani?’ (Nkhani ya pa intaneti)

Ko Yahova angatikhululukire olo machimo yakuluyakulu?

‘Mibvunzo yomwe Baibolo ichadawira’ (Nsanja ya Olonda ya 1 Maio, 2013)

Dziwani momwe Nkhrisitu munango adathandiziriwa kuchinja moyo wake padapfunzira nkhani ya ntsembe ya Yesu.

‘Ndinelini pomwe kapolo wa vinthu voipa’ (Nkhani ya pa intaneti)

1. Ko ni njira ibodzi iponi yatingawonesere kutembeja pa vomwe Mulungu na Khrisitu adatichitira?

Baibolo ichapolomisa kuti: ‘Aliyese wowonesa chikhulupiriro mwa [Yesu]’ angakhale nawo moyo wosapera. (Yohane 3:16) Ko kuwonesa chikhulupiriro kuchatanthauza chani? Kuchatanthauza vizinji osati kundokhulupirira chabe mwa Yesu? Tichadekana pomwe kuwonesa chikhulupiriro pa vomwe tichasalula na vomwe tichachita. (Yakobo 2:17) Tikambawonesa chikhulupiriro chathu pa vomwe tichayankhula na vomwe tichachita, tichalimbisa ushamwali wathu mwa Yesu na Ababa wake Yahova.—Lewengani Yohane 14:21.