Mudziweni bwino Yahova

Ko muchawona kuti Yahova ali tani? Muchawona kuti iye ni wamphanvu maninge, koma nthawe ibodzibodziyo ali kutali na imwepo, ninge mwamuchawonera nyenyezi kudzulu? Panango imwepo muchawona kuti iye ni munthulini, koma ni mphanvu ya muchilengedwe ninge kaphaliwali? Ko Yahova ni mbani? Baibolo ichafotokoza makhalidwe yanango ya Mulungu ndipo ichati iye achakuganizirani.

1. Ndawa chani tichamuwonalini Mulungu?

‘Mulungu ni mzimu.’ (Yohane 4:24) Yahova alibe nyompfu na mabondzo. Iye ni mzimu uchakhala kudzulu ku malo yomwe tingakwaniselini kuyawona.

2. Ko nimakhalidwe yaponi yomwe Yahova anayo?

Nishuwadi kuti tingakwaniselini kumuwona Yahova, koma tikapfunzira maninge va iye, tichazindikira kuti iye ni chaiye, tikambawona makhalidwe yake yabwino. Baibolo ichati: ‘Yahova achakonda chilungamo ndipo adzasiyelini wale womwe ni wokhulupirika.’ (Salimo 37:28) Iye ‘anachifundo chikulu na kukoma moyo,’ panango kuti achabvera ntsisi maka-maka wale womwe ankubonera. (Yakobo 5:11) ‘Yahova ali pafupi na aliyese wa mtima wophwanyika ndipo achapulumusa wanthu wodzibvera chisoni mu mtima.’ (Salimo 34:18) Ko imwepo munkudziwa kuti vomwe tichachita vichakhudza Yahova? Vichamukhudza tani? Peno munthu wasalula kuchita vinthu voipa Yahova achawawiwa. (Salimo 78:40, 41) Koma Yahova achakhala wokondwa akawona munthu ankuchita vabwino.—Lewengani Miyambo 27:11.

3. Ko Yahova achawonesa tani kuti achatikonda?

Khalidwe ikulu ya Yahova ni chikondi, ndipo Baibolo ichati: ‘Mulungu ni chikondi.’ (1 Yohane 4:8) Tingawonse chikondi cha Yahova osati pa vinthu vatichalewenga m’Baibolo mokha, komasoti pa vinthu vomwe iye adasika. (Lewengani Machitidwe 14:17.) Onani chitsanzo cha momwe iye adatisikira. Iye adatilenga kuti timbakwanise kuwona mafololi yokhuza, kubvesera nyimbo zabwino na kudya chakudya chabwino. Iye achada kuti timbakhale okondwa na moyo.

PFUNZIRANI VIZINJI

4. Mzimu wakuchena ni mphanvu yomwe Mulungu achaiphatisira basa

Pakuphata basa tichaphatisira basa manja. Ko tanimbo Yahova? Ko iye achaphatsira basa chani? Iye achaphatisa basa mzimu wakuchena. Wanthu anango achaganiza kuti mzimu wakuchena ni munthu, koma Baibolo ichati mzimu wakuchena ni mphanvu yomwe Mulungu achaiphatisira basa pakuchita chilichose chomwe iye achada. Lewengani Luka 11:13 na Machitidwe 2:17, ndipo patsogolo pake kambiranani mibvunzo aya:

• Mulungu ʼadzakhutuleʼ mzimu wake wakuchena kwa wale omwe achaufagafaga. Manje, ko imwepo munkuganiza kuti mzimu wakuchena ni munthu panango ni mphanvu yomwe Mulungu achaiphatisa basa? Ndawa chani munkuganiza tene?

Yahova achaphatisa basa mzimu wakuchena kuti achite vinthu vodabwisa. Lewengani Salimo 33:6 na 2 Petulo 1:20, 21, ndipo patsogolo pake kambiranani mbvunzo uyu:

• Ko Yahova adaphatisira kale basa mzimu wakuchena pakuchita chani?

5. Yahova anamakhalidwe yodabwisa

Mose wenze mtumiki wokhulupirika wa Mulungu. Podiya venze tene iye angadekana kupfunzira vizinji va Mulengi. Ndipomwapa Mose adawuza Yahova kuti: ‘Pilizi nidziwiseni njira zanu kuti nikudziweni.’ (Ekisodo 33:13) Ndipo Yahova adawuza Mose yanango mwa makhalidwe yake yomwe anayo. Lewengani Ekisodo 34:4-6, ndipo patsogolo pake kambiranani mibvunzo aya:

• Ko Mose adapfunzira makhalidwe ya Yahova yaponi?

• Ko ni khalidwe ya Yahova iponi yomwe imwepo muchaikonda?

6. Yahova achawaganizira wanthu

Aheberi enze wanthu wa Mulungu kale-kale ndipo iwo adakhala akapolo ku Iguputo. Ko Yahova adabva tani padawona wanthu wake ankubonera? Bveserani AUDIO ndipo londolani pa kulewenga, panango lewengani Ekisodo 3:1-10. Ndipo patsogolo pake kambiranani mibvunzo aya.

AUDIO: Yahova adaganizira va mabvuto yawo (2:45)

• Ko Yahova achabva tani akambawona wanthu ankubonera?—Onani vesi 7 na 8.

• Ko imwepo muchaganiza kuti Yahova achada kuthandizadi wanthu? Ko munkuwona kuti iye anamphanvu yochitira vimwevi? Ndawa chani munkuganiza teno?

7. Chilengedwe chichatipfunzisa makhalidwe ya Yahova

Tingapfunzire makhalidwe ya Yahova tikambawona vomwe iye adasika. Wonesani VIDIYO. Patsogolo pake lewengani Aroma 1:20, ndipo kambiranani mibvunzo aya.

VIDIYO: Chilengedwe chichawonesa kuti Yahova achatikonda—Thupi ya munthu (1:57)

• Ko ni makhalidwe ya Yahova yaponi yomwe muchayawona mu vinthu vomwe adasika?

CHIGWATO

Tingakwaniselini kuwona Yahova ndawa iye ni mzimu. Iye anamakhalidwe yazinji, koma ikulu pa yose ni chikondi.

Kubwerezera

• Ndawa chani tichakwanisalini kuwona Yahova?

• Ko mzimu wakuchena ni chani?

• Ko yanango mwa makhalidwe ya Yahova ni yaponi?

KUTI MUDZIWE VIZINJI

Yahova anamakhalidwe yanayi yakulu-yakulu. Pfunzirani vizinji va makhalidwe mwaya mumsolo uno.

‘Ko Mulungu achawoneka tani?’ (Nsanja ya Olonda Na. 1 2019)

Onani vomwe vinkutsimikizira kuti Yahova alirini palipose.

‘Ko Mulungu ali palipose?’ (Nkhani ya pa intaneti)

Onani ndawa yake Baibolo ichanena kuti mzimu wakuchena uli ninge manja ya Mulungu.

‘Ko mzimu wakuchena ni chani?’ (Nkhani ya pa intaneti)

Munthu yemwe achawonalini adatsimikiza kuti Mulungu achamuwerengera. Onani momwe vidamuthandiza kuchinja maganizo yake.

‘Manje ninkudzibva kuti ningathandize anango’ (Nsanja ya Olonda, 1 Outubro, 2015)