MSOLO 54
Udindo womwe ‘kapolo Wokhulupirika na wanzeru anawo’
Yesu ndiye Msolo wampingu Wachikhrisitu. (Aefeso 5:23) Ndipo ntsiku zino ali kudzulu achatsogolera atumiki wake wa padziko yapasi kudzera mwa ‘kapolo wokhulupirika na wanzeru.’ (Lewengani Mateyu 24:45.) Ndawa yakuti adapasiwa na Yesu udindo moyu, ‘kapolo’ anaulamuliro, koma olo kuti viritene ankupitiriza kukhala kapolo wa Khrisitu na kutumikira Akhrisitu anango. Ko kapolo moyu ni mbani? Ndipo ko kapolo moyu achatisamalira tani?
1. Ko ‘kapolo wokhulupirika na wanzeru’ ni mbani?
Nthawe zose Yahova wakhala ankuphatisa basa amuna panango kagulu ka amuna kuti apereke malangizo kwa wanthu wake. (Malaki 2:7; Aheberi 1:1) Pomwe Yesu adafa, atumi pabodzi na akulu wa ku Yerusalemu adapitiriza kutsogolera. (Machitidwe 15:2) Mwakutewedzera chitsanzo chimwechi, ntsiku zinombo kagulu ka akulu komwe ni Bungwe Yotonga ya Mboni za Yahova kachapereka chakudya chauzimu na malangizo pa basa yolalikira. Ka gulu mwaka ni ‘kapolo wokhulupirika na wanzeru yemwe Mbuya wake [Yesu] adamuikha.’ (Mateyu 24:45a) Aliyese yemwe ali mu Bungwe Yotonga, ni Nkhrisitu wodzodzewa na mzimu, yemwe anachidikhiro chodzatonga pabodzi na Yesu Khrisitu mu Ufumu wakudzulu moyo wawo padziko yapasi ukadzamala.
2. Ko ni chakudya chauzimu chiponi chomwe kapolo wokhulupirika na wanzeru achapereka?
Yesu adalewa kuti kapolo wokhulupirika na wanzeru ‘ambadzapereke chakudya chauzimu kwa Akhrisitu panthawe yake.’ (Mateyu 24:45b) Ninge mwavichakhalira kuti chakudya chichatithandiza kuti tikhale wamphanvu na wathanzi, chakudya chauzimu chomwe ni malangizo yochokera m’Mawu ya Mulungu, chichatipasa mphanvu yomwe tichadekana kuti tipitirize kukhala wokhulupirika kwa Yahova na kupitiriza kuphata basa yomwe Yesu adatipasa kuti tichite. (1 Timoteyo 4:6) Tichatambira chakudya mwechi chauzimu kudzera pamisonkhano yampingu, misonkhano yadera, misonkhano yachigawo pabodzi na mabukhu yofotokoza va Baibolo na mavidiyo vomwe vichatithandiza kubvesesa vomwe Mulungu achada na kulimbisa ushamwali wathu na iye.
PFUNZIRANI VIZINJI
Onani kuti ndawa chani tichadekana kapolo wokhulupirika na wanzeru yemwe ni Bungwe Yotonga.
Wa m’Bungwe Yotonga achapereka chakudya chauzimu, malangizo yabwino maninge yomwe niyothandiza kwa Mboni za Yahova padziko yose yapasi
3. Gulu ya Yahova ichadekana kukhala yadongosolo
Mwakubvera malangizo ya Yesu, Bungwe Yotonga ichalongosola basa ya Mboni za Yahova. Dongosolo mweyi yenzembo tene kwa Akhrisitu woyambirira. Wonesani VIDIYO.
Lewengani 1 Akorinto 14:33, 40, ndipo patsogolo pake kambiranani mbvunzo uyu:
Ko vesi mweyi ichawonesa tani kuti Yahova achada kuti Mboni zake zimbakhala zadongosolo?
4. Kapolo wokhulupirika na wanzeru achalinganiza basa yolalikira
Kulalikira yenze basa yodikana maninge yomwe Akhrisitu woyambirira angaichita. Lewengani Machitidwe 8:14, 25, ndipo patsogolo pake kambiranani mibvunzo aya:
Pakati pa Akhrisitu woyambirira ko ni mbani omwe angatsogolera basa yolalikira?
Ko Petulo na Yohane angaphatisa tani basa malangizo ya atumi anzawo?
Kulalikira ni basa yodekana maninge yomwe ichakonzewa mwadongosolo na Bungwe Yotonga. Wonesani VIDIYO.
Yesu adatsindika kudikana kwa basa mweyi. Lewengani Maliko 13:10, ndipo patsogolo pake kambiranani mibvunzo aya:
Ko ndawa chani basa yolalikira ni yodekana maninge kwa m’Bungwe Yotonga?
Ko ndawa chani tichadekana ‘kapolo wokhulupirika na wanzeru’ kuti ambaikonze mwadongosolo basa mweyi?
5. Kapolo wokhulupirika na wanzeru achapereka malangizo
Bungwe Yotonga ichapereka malangizo padziko yose yapasi. Ko iwo achadziwa tani malangizo yodekana kupereka? Onani momwe Bungwe Yotonga ya Akhrisitu woyambirira ingachitira vimwevi. Lewengani Machitidwe 15:1, 2, ndipo patsogolo pake kambiranani mibvunzo aya:
Ko ni nkhani iponi yomwe yenze yoshupa pakati pa Akhrisitu woyambirira?
Ko Paulo na Baranaba adayenda kwa mbani kuti akakambirane va nkhani mweyi?
Lewengani Machitidwe 15:12-18, 23-29, ndipo patsogolo pake kambiranani mbvunzo uyu:
Akanati asalula vochita, ko Akhrisitu wa m’Bungwe Yotonga yoyambirira angachita chani kuti atewedze malangizo ya Mulungu pakukambirana nkhani?—Onani mavesi 12, 15, na 28.
Lewengani Miyambo 15:30, 31 na 16:4, 5, ndipo patsogolo pake kambiranani mibvunzo aya:
Ko Akhrisitu woyambirira angachita tani na malangizo yomwe angapasiwa na Bungwe Yotonga?
Ko Yahova angadalisatani kubvera kwawo?
Lewengani 2 Timoteyo 3:16 na Yakobo 1:5, ndipo patsogolo pake kambiranani mbvunzo uyu:
Ko Bungwe Yotonga ikafuna kusalula vochita ntsiku zino ichatenga kuponi malangizo?
WANTHU ANANGO ACHATI: ‘Ukambabvera Bungwe Yotonga uchakhala unkubvera wanthu basi.’
Ko ni chani chomwe chikukutsimikizirani imwepo kuti Yesu ankutsogolera Bungwe Yotonga?
CHIGWATO
Bungwe Yotonga ni ‘kapolo wokhulupirika na wanzeru’ yemwe adayikhiwa na Khrisitu. Achapereka malangizo na chakudya chauzimu kwa Akhrisitu padziko yose yapasi.
Kubwerezera
Ko ni mbani yemwe adayikha ‘kapolo wokhulupirika na wanzeru’?
Ko Bungwe Yotonga ichatisamalira tani?
Ko imwepo muchakhulupirira kuti Bungwe Yotonga ni ‘kapolo wokhulupirika na wanzeru’?
KUTI MUDZIWE VIZINJI
Onani momwe Bungwe Yotonga iliri yadongosolo kuti iphate basa yake.
‘Ko Bungwe Yotonga ya Mboni za Yahova ni mbani?’ (Nkhani ya pa intaneti)
Onani momwe Bungwe Yotonga ichatsimikizirira kuti tinkutambira chakudya chauzimu chomwe ni chothembeka.
Ko wa Bungwe Yotonga achabva tani na basa yomwe Yesu adawapasa kuti ambachite?
Ko misonkhano yathu ya mpingu na misonkhano yathu ikuluikulu, ichawonesa tani kuti Yahova ankutsogololera Bungwe Yotonga?