2. Ko ni njira zinango ziponi zomwe tingakhalire woona moyo pa moyo wathu wa ntsiku na ntsiku?

Yahova achada kuti ‘timbayankhule chaivo kwa anzathu.’ (Zekariya 8:16, 17) Ko vimwevi vinkutanthauza chani? Tikakhala kuti tinkuyankhula na banja yathu, anzathu wakubasa, abale na alongo wathu wachikhrisitu panango akuluakulu waboma, tichadekanalini kunama panango kupereka nkhani zabodza. Wanthu woona moyo achaberalini anzawo panango kuwachita vinthu vachinyengo. (Lewengani Miyambo 24:28 na Aefeso 4:28.) Ndipo iwo achapereka misonkho yose yomwe achadekana kupereka. (Aroma 13:5-7) Mwa njira mweyi na njira zinango ‘tichakhala kuti tinkuchita vinthu vose moona moyo.’—Aheberi 13:18.

Yesu adapfunzisa wotewera wake kuti achadekanalini kukhala ‘kusaidi ya dziko.’ (Yohane 15:19) Mwevi vinkuthandauza kusakhala kusaidi ya dziko pa nkhani za ndale na nkhondo. Kulewa chaivo ni voshupa maninge kusakhala kusaidi ya dziko, ndawa yakuti tingambanyozewe. Ko tingachitetani kuti tileke kukhala kusaidi ya dziko na kupitiriza kukhala wokhulupirika kwa Mulungu?

1. Ko Akhrisitu chaiwo achayawonatani maboma ya wanthu?

Akhrisitu achalemekeza boma. Tichachita ninge vomwe Yesu adanena kuti: ‘Timbapereke kwa Kaisara vinthu va Kaisara’ vomwe vinkuthandauza kuti tichabvera malamulo ya m’dziko yathu, ninge kupereka misonkho yose. (Maliko 12:17) Baibolo ichanena kuti maboma yalipo ndawa yakuti Yahova wayabvuma kuti yakhalepo. (Aroma 13:1) Tichadziwa kuti maboma ya wanthu yanamalire yautongi wawo, isepano tichadikhira kuti Mulungu wathu pabodzi na boma yake yakudzulu adzamalise mabvuto yose ya wanthu.

2. Ko Tingawonese tani kuti tirilini kusaidi ya dziko?

Ninge Yesu tichangeneralini mu ndale. Pomwe wanthu adawona vodabwisa vomwe Yesu angachita iwo ambafuna kuti amuikhe kukhala mpfumu ya padziko yapasi, iye alibe kubvuma kuti vimwivi vichitike. (Yohane 6:15) Ndawa chani adalamba? Ndawa yakuti patsogolo pake iye adanena kuti, ‘Ufumu wangu ulilini kusaidi ino ya dziko.’ (Yohane 18:36) Ninge wopfunzira wa Yesu ise tichawonesa mu njira zizinji kuti tilirini kusaidi ya dziko. Mwakulinganiza tichayendalini ku nkhondo. (Lewengani Mika 4:3.) Tichalemekeza vizindikiro va dziko ninge bandera, koma tichavipemphereralini. (1 Yohane 5:21) Ndipo tichazondalini chipani chilichichose cha ndale panango kukhala mamemba yake. Mwanjira mweyi na zinango, tichawonesa kuti ndise wokhulupirika ku boma ya Mulungu na Ufumu wake.

PFUNZIRANI VIZINJI

3. Akhrisitu chaiwo achakhalalini kusaidi ya dziko

Yesu na wopfunzira wake adatisiyira chitsanzo chabwino maninge. Lewengani Aroma 13:1, 5-7 na 1 Petulo 2:13, 14. Patsogolo pake, wonesani VIDIYO patsogolo pake kambiranani mibvunzo aya.

VIDIYO: Akhrisitu chaiwo alilini kusaidi ya dziko—Mbali 1 (4:28)

• Ndawa chani tichalemekeza olamulira akuluakulu?

• Ko ni njira ziponi zomwe tingawonesere kuti tinkuwabvera?

Pa nthawe ya nkhondo, wanthu achalewa kuti alilini mbali ya dziko, koma iwo achathandizira mbali zose. Ko kusakhala ku saidi ya dziko nkutani? Lewengani Yohane 17:16. Patsogolo pake, wonesani VIDIYO patsogolo pake kambiranani mbvunzo uyu.

VIDIYO: Akhrisitu chaiwo alilini kusaidi ya dziko—Mbali 2 (3:11)

• Ko kusakhala ku saidi ya dziko kuchathandauza chani?

Manje tani peno wolamulira akuluakulu alewa vinthu vomwe vichabveranalini na mpfundo za Mulungu? Lewengani Machitidwe 5:28, 29. Patsogolo pake, wonesani VIDIYO patsogolo pake kambiranani mibvunzo aya.

VIDIYO: Akhrisitu chaiwo alilini kusaidi ya dziko—Mbali 3 (1:18)

• Peno pali kusiyana pa malamulo yomwe tichada kusalula pakati pa malamulo ya wanthu na malamulo ya Mulungu ni malamulo yaponi yomwe tichadekana kubvera?

• Ko munkuganizirako vochitika vinango vomwe Akhrisitu achadekanalini kubvera olamulira waboma?

4. Ayi kukhala kusaidi ya dziko m’maganizo na vochita

Lewengani 1 Yohane 5:21. Patsogolo pake, wonesani VIDIYO patsogolo pake kambiranani mibvunzo aya.

VIDIYO: Ndawa chani akhrisitu chaiwo achadekana kulimba moyo—Kuti apitirize kusakhala kusaidi ya dziko (2:49)

• Mu vidiyo, ndawa chani Ayenge adasalula kusakhala nawo ku mbali yandale mwakuchita nawo miyambo yadziko ninge kugwadira bandera?

• Ko munkuganiza kuti iye adasalula mwanzeru?

Ko nivochitika viponi vomwe vingayese kusakhala kwathu kusaidi ya dziko? Wonesani VIDIYO, patsogolo pake kambiranani mibvunzo aya.

VIDIYO: Vomwe tapfunzira kuchokera mu Ntsanja ya Ulonda—Pitirizani kusakhala kusaidi ya dziko mu dziko yogawanikana (5:16)

• Ko tingapitirize tani kusakhala ku saidi ya dziko tikakhala kuti tinkunyang’anira vochitika va padziko yose?

• Ko tingapitirizetani kusakhala kusaidi ya dziko olo peno kuti isepano patekha takhudziwa maninge na vochitika va ndale?

• Ko noticia zomwe tichabva na wanthu womwe tichakhala nawo vichakhudza tani kusakhala kwathu ku saidi ya dziko?

CHIGWATO

Akhrisitu achachita khama maninge kuti aleke kungenera mu ndale m’maganizo m’mawu na vochita vawo.

Kubwerezera

• Ko isepano tichabvera tani maboma ya wanthu?

• Ndawa chani tichadekana kupitiriza kusakhala kusaidi ya dziko?

• Ko ni vochitika viponi vomwe vingayese kusakhala kwathu kusaidi ya dziko?

KUTI MUDZIWE VIZINJI

Ko ni vinthu viponi vomwe tichadekana kucita kuti tipitirize kusakhala kusaidi ya dziko?

Yahova alibe kutisiya (3:14)

Ko banja ingachitetani kuti ikonzekere chiyeso chakusakhala kusaidi ya dziko?

Pitirizani kusakhala kusaidi ya dziko mukakhala pagulu 4:25

Ndawa chani kukonda maninge dziko ni chinthulini chabwino chomwe munthu angachite?

‘Vose ni vokwanisika na Mulungu’ (5:19)

Onani momwe mungapitirizire kusakhala kusaidi ya dziko mukambachita vosalula pankhani ya basa.

‘Aliyese adzatakule mtolo wake’ (Nsanja ya Olonda ya 15 Março, 2006)