Yahova ni Mulungu wa dongosolo. (1 Akorinto 14:33) Ndipomwapa tingadikhire kuti wanthu wakembo akhalembo wadongosolo. Ko mpingu wachikhrisitu uchafambisiwa tani? Ko tingathandizire tani kuti vinthu vimbafambe bwino?

1. Ko msolo wa mpingo ni mbani?

‘Khrisitu ni msolo wa mpingo.’ (Aefeso 5:23) Ali kudzulu iye achanyang’anira basa yose ya Mboni za Yahova padziko yapasi. Yesu adayikha ‘kapolo wokhulupirika na wanzeru’ komwe ni kagulu kang’onong’ono ka abale wokhuma mwauzimu komwe kachadziwika kuti Bugwe Yotonga. (Lewengani Mateyu 24:45-47.) Ninge akulu na atumi wa ku Yerusalemu wakalekale, Bungwe Yotonga ichapereka malangizo ku mipingu yose padziko yapasi. (Machitidwe 15:2) Koma amuna mwawa sikuti ni atsogoleri wagulu yathu, iwo achatambira malangizo yochoka kwa Yahova kuti atitsogolere, ndipo achabvera Yesu ninge msolo.

2. Ko udindo wa akulu ni uponi?

Akulu ni Akhirisitu wokhuma mwauzimu omwe achapfunzisa kuchokera m’malemba na kubusa wanthu wa Yahova mwakuwapfunzisa na kuwalimbikisa. Iwo achalipiriwalini pa basa yomwe achachita, m’malo mwake iwo achatumikira ‘pamaso pa Mulungu osati ndawa yofuna kuphindula vinthu koma mofunisisa.ʼ (1 Petulo 5:1, 2) Akulu achathandiziwa na atumiki wothandiza omwe kuyenda kwa nthawe angafikanembo pakuyenerera nkukhala akulu.

Bungwe Yotonga ichasalula akulu anango kuti akhale wonyang’anira madera, iwo achakanzira mipingu yazinji, kuyapasa malangizo na kuyalimbikisa. Iwo achayikha akulu na atumiki wothandiza omwe ankukwanirisa viyenereso va m’Malemba.—1 Timoteyo 3:1-10, 12; Tito 1:5-9.

3. Ko Mboni iliyose inaudindo uponi?

Aliyese mu mpingu ‘achatamanda dzina ya Yahova’ mwa kugumanika pamisonkhano na kulalikira malingana na momwe vinthu viliri.—Lewengani Salimo 148:12, 13.

PFUNZIRANI VIZINJI

4.Yesu ni ntsogoleri wabwino

Yesu ankutichemera isepano. Lewengani Mateyu 11:28-30 ndipo patsogolo pake kambiranani mbvunzo uyu:

• Ko Yesu achada kuti isepano timbabve tani na utsogoleri wake?

VIDIYO: Akulu ankuthandiza komwe kudachitika chivomezi ku Nepal (4:56)

Baibolo ichaoneseratu bwinobwino momwe akulu angaphatire basa yawo.

Lewengani Yesaya 32:2 na 1 Petulo 5:1-3, ndipo patsogolo pake kambiranani mibvunzo aya:

• Ko muchabva tani kudziwa kuti ninge Yesu akulu achayesesa kuthandiza anango?

• Ko ni njira zinango ziponi zomwe akulu achatewedzerera Yesu?

5. Akulu achapfunzisa mwakupereka chitsanzo chabwino

VIDIYO: Akulu ankutsogolera! (7:39)

Yesu adakhazikisa malangizo kwa wale womwe ankutsogolera mu mpingu. Lewengani Mateyu 23:8-12, ndipo patsogolo pake kambiranani mbvunzo uyu:

• Ko ni chani chomwe chichakupasani chidwi imwepo pakati pa malangizo yogumanika m’Baibolo yoyenda kwa akulu na vomwe mwakhala munkuwona kwa azitsogoleri wa vipembedzo?

1. Akulu achadzidyesa mwauzimu na kuthandiza mabanja yawo kuti yakhale yolimba mwauzimu

2. Akulu achasamalira aliyese mu mpingu

3. Akulu achalalikira mwakhama

4. Akulu achapfunzisa. Ndipo achathandiza pomwe kuchenesa mu Nyumba za Ufumu na basa zinango

6. Timbawabvere akulu

M’baibolo tichagumana vifukwa vizinji vokhalira wobvera kwa akulu. Lewengani Aheberi 13:17, ndipo patsogolo pake kambiranani mibvunzo aya:

• Ko nivobveka Baibolo ikambatilimbikisa kuti timbabvere wale omwe ankutsogolera pakati pathu? Peno teno ndawa ya chani?

Lewengani Luka 16:10, ndipo patsogolo pake kambiranani mbvunzo uyu:

• Ndawa chani nivodikana kubvera akulu olo pavinthu ving’onoving’ono?

CHIGWATO

Yesu ni msolo wa mpingu. Tichakhala wokondwa kubvera akulu womwe achatumikira motsogolerewa na Yesu ndawa iwo achatilimbikisa na kupfunzisa mu vitsanzo vawo vabwino.

Kubwerezera

• Ko msolo wa mpingu mbani?

• Ko akulu achathandiza tani mpingu?

• Ko mtumiki aliyese wa Yahova anaudindo uponi?

KUTI MUDZIWE VIZINJI

Onani nkhawa ikulu yomwe Bungwe Yotonga na akulu anango anayo kwa Akhrisitu ntsiku zino.

Kulimbikisa abale panthawe ya chidzudzo (4:22)

Dziwani basa yomwe wonyang’anira madera achachita.

Moyo wa wonyang’anira dera kumadera ya kumuyi (4:51)

Lewengani va udindo womwe akazi anawo mu mpingu.

‘Ko akazi womwe ni Mboni za Yahova achapfunzisa mawu ya Mulungu?’ (Nsanja ya Olonda, 1 Setembro, 2012)

Onani momwe akulu ankuphatira basa mwakhama kuti alimbikise abale na alongo.

‘Akulu wachikhrisitu—‘Ni anyabasa anzathu wotipasa chimwemwe’’ (Nsanja ya Olonda ya 15 Janeiro, 2013)

1. Ko ni malangizo yaponi yomwe Baibolo ichapereka kwa amuna?

Yahova adayikha amuna ninge msolo wa banja. (Lewengani Aefeso 5:23.) Yahova achadikhira kuti mwamuna ambachite vosalula vomwe vingathandize banja yake. Baibolo ichauza amuna kuti: ‘Pitirizani kukonda akazi wanu.’ (Aefeso 5:25) Ko vimwivi vichathandauza chani? Mwamuna wachikondi achachita vinthu na nkazi wake mwanjira yachikondi, akakhala pamuyi olo pagulu. Achamuteteza ku vinthu voipa ndipo achachita vomwe angakwanise kuti amusamalire mwakuthupi na m’maganizo. (1 Timoteyo 5:8) Vakudekana maninge pa vose iye achatsogolera pa vinthu vauzimu. (Mateyu 4:4) Mwakulinganiza, iye angambapemphere na kulewenga Baibolo pabodzi na nkazi wake. Ndipo mwamuna akakhala kuti ankuchita vinthu mwachikondi na nkazi wake, iye achakhala paushamwali wabwino maninge na Yahova.—Lewengani 1 Petulo 3:7.

Yesu ndiye Msolo wampingu Wachikhrisitu. (Aefeso 5:23) Ndipo ntsiku zino ali kudzulu achatsogolera atumiki wake wa padziko yapasi kudzera mwa ‘kapolo wokhulupirika na wanzeru.’ (Lewengani Mateyu 24:45.) Ndawa yakuti adapasiwa na Yesu udindo moyu, ‘kapolo’ anaulamuliro, koma olo kuti viritene ankupitiriza kukhala kapolo wa Khrisitu na kutumikira Akhrisitu anango. Ko kapolo moyu ni mbani? Ndipo ko kapolo moyu achatisamalira tani?