MSOLO 10
Ko misonkhano ya Mboni za Yahova yangakuthandizeni tani?
Ko imwepo mudayendako kale kumisonkhano ya Mboni za Yahova? Peno neye, vingachitike kuti nkhani yakuyenda kumisonkhano ulendo woyamba ikuchitisani kumbakhala na nkhawa. Vingachitike kuti mungadzibvunze kuti: ‘Nchani chichachtika kumisonkhano mwaya? Ndawa chani iyo ni yodekana? Ndawa chani ni chadikana kuyenda?’ Mupfunziro mweino muone kuti misonkhano ingakuchitiseni kufenderera Mulungu na momwe yangakuthandizireni ntsiku na ntsiku.
1. Ko chakulinga chikulu cha misonkhano ya Mboni za Yahova ni chani?
Wonemba Baibolo munango adati: ‘Mu mpingo ukulu nidzatamande Yahova.’ (Salimo 26:12) Na mawu mwaya, iye adafotokoza chakulinga chikulu cha misonkhano chomwe ni kutumikira Mulungu. Chibodzibodzimbo Mboni za Yahova padziko yose zichasonkhana sondo iliyose kuti zitamande Mulungu, kuimba na kupemphera. Nthawe zinango pagole, iwo achasonkhana pamagulu yakulu-yakulu kuti atumikire Mulungu. Mboni za Yahova zichakonda kuenda kumisonkhano.
2. Nchani chomwe mudzapfunzire kumisonkhano yathu?
Kumisonkhano yathu, tichaikhira nzeru Baibolo. Isepano tichawelenga mawu ya Mulungu ‘kufotokozera Mawu yake bwino-bwino na kubvekesa thandauzo yake.’ (Lewengani Nehemiya 8:8.) Mumisonkhano imwepo mudzapfunzire va Yahova na makhalidwe yake yabwino. Mukambapfunzira maninge va chikondi cha Yahova mudzafune kumufenderera iye. Imwepo mudzapfunzire momwe Yahova angakuthandizireni kukhala na moyo wokondawa.—Yesaya 48:17, 18.
3. Mumisonkhano imwepo mudzadziwe wanthu anango vimwevi vidzakhale vabwino kwa imwepo
Yahova achati ‘timbaganizirane na kulimbikisana pachikondi na basa zabwino, ayi kuleka kusonkhano kwathu pabodzi.’ (Aheberi 10:24, 25) Kumisonkhano, mudzagumane wanthu omwe achaganizirana. Wanthu omwe ninge imwepo anachidwi pakupfunzira vizinji va Mulungu. Imwepo mudzawabve ankufotokoza mpfundo za m’Baibolo zolimbikisa. (Lewengani Aroma 1:11, 12.) Kuposha vose mudzadziwane na wanthu azinji, wolowola, wosalowola, omwe niwokondwa podia kuti ankugumana na mabvuto. Mwaona vinthu vizinji vomwe vinkugumanika kumisonkhano? Analazawu Yahova kutilimbkisa kusonkhana.!
PFUNZIRANI VIZINJI
Dziwani momwe yachachitikira misonkhano ya Mboni za Yahova ndipo onani kuti ndawa chani ni vodikana kugumanika pamisonkhano mwaya.
4. Misonkhano ya Mboni za Yahova
Mu nthawe za atumi wa Yesu Akhrisitu nthawe zose angasonkhana kuti atumikire Mulungu. (Aroma 16:3-5) Lewengani Akolose 3:16, ndipo patsogolo pake kambiranani mbvunzo uyu:
Mu nthawe za atumi, ko Akhrisitu angatumikira tani Yahova?
Ntsiku zinombo wa Mboni za Yahova achasonkhana kuti atumikire Mulungu. Kuti mudziwe momwe misonkhano mwaya yachachitikira, wonesani VIDIYO. Patsogolo pake, onani foto ya kumisonkhano ya mpingu ndipo kambiranani mibvunzo aya.
Mu vidiyo mwaona vomwe vichachitika ku Nyumba ya Ufumu. Ko ni viponi vomwe mwaona kuti nivolingana na vomwe mwalewenga pa Akolose 3:16?
Mu vidiyo panango pa foto, mwaonako vinthu vinango vomwe vakukomedzani kumisonkhano?
Lewengani 2 Akorinto 9:7, patsogolo pake kambiranani mibvunzo aya:
Ndawa chani wa Mboni za Yahova achakumbiralini mali pamisonkhano yawo?
Pabodzi na pfunzisi wanu, onani ndandanda ya misonkhano ya sondo ino.
Ni mbali iponi ya misonkhano yomwe mwaona kuti ingakuthandizeni?
Ko munkudziwa?
Pa jw.org, pamwapa imwepo mungagumane nthawe na malo yomwe misonkhano yachachitika padziko yose yapasi
Kumisonkhano yathu kuchakhala nkhani, vitsanzo, na mavidiyo. Misokhano yachayamba na kumala na nyimbo na pemphero
Mbali zinango za misonkhano yathu wanthu achaperekera ndemanga peno achada
Aliyese ni wotambiriwa—mabanja, wosalowola, achikulire, na wana
OKumisonkhano ya Mboni za Yahova kulibe yemwe achakumbira mali
5. Muchadikana kuchita khama kuti muyende kumisonkhano
Onani chitsanzo cha banja ya Yesu. Kuti agumanike pamisonkhano yapagole iwo adafamba makilomita yokwana 100 (panango ntsiku zitatu) njira za m’mapiri kuchokera ku Nazareti kuyenda ku Yerusalemu. Lewengani Luka 2:39-42, ndipo patsogolo pake kambiranani mibvunzo aya:
Ko imwepo mwakwanisa kuona kuti pangadikana khama kuti akagumanike pasonkhano?
Ndawa chani mukuona kuti pachadikana khama kuti imwepo mugumanike pamisonkhano?
Ko munkuona kuti ni vothandiza? Ndawa chani munkuganiza tene?
Baibolo ichati timbasonkhane na anzathu kuti titumikire Yahova. Lewengani Aheberi 10:24, 25, ndipo patsogolo pake kambiranani bvunzo uyu:
Ndawa chani nthawe zose tichadekana kuenda kumisonkhano?
WANTHU ANANGO ACHATI: ‘Imwepo muchadikanalini kuchoka pamuyi kuti mukatumikire Mulungu. Kulewenga Baibolo pamwekha ni vokwanira.’
Ko ni lemba iponi panango chitsanzo cha m’Baibolo chomwe chichaonesa momwe Yahova achaonera nkhani mweyi?
CHIGWATO
Kuenda kumisonkhano kudzakuthandzeni kupfunzira vizinji va Yahova na kulimbisa ushamwali wanu na iye. Kuingizira mwapa misonkhano yakuthandizeni imwepo kukhala na mwayi wotumikira Mulungu pabodzi na wanthu.
Kubwerezera
Ndawa chani Yahova achada kuti timbaende kumisonkhano?
Ko kumisonkhano ya Mboni za Yahova mukapfunzire chani?
Ko mukukwanisa kuganizira njira zinango zomwe misonkhano ingakuthandizireni imwepo?
KUTI MUDZIWE VIZINJI
Ko nkhani yakuenda kumisonkhano ichakuchitisani kukhala na nkhawa? Vimwevi ndivo vomwe vidachitikira mwamuna munango. Onani momwe iye adayambira kukonda misonkhano.
Onani momwe mulumbwana munango adakondera misonkhano ndipo onanai vomwe adachita kuti apitirize kumbagumanika.
Onani momwe wanthu anango achaonera misonkhano.
‘Ndawa chani ni vabwino kuenda ku Nyumba za Ufumu?’ (Nkhani ya pa intaneti)
Dziwani mwamuna munanago yemwe wenze chigananga ndipo onani momwe moyo wake udachinjira ndawa yakuenda kumisonkhano ya Mboni za Yahova.
‘Kulikose kwaningaenda ningafamba na mpfuti yangu’ (Nsanja ya Olonda, 1 Julho, 2014)