Ndawa chani tichavala bwino pakuyenda kumisonkhano yathu?

Ko mwawona mafoto nkabulosha kano momwe Mboni za Yahova zichavalira pakuyenda kumisonkhano? Ko ndawa chani tidzikhuzisa teneuyu na kuvala bwino?

Kuti tilemekeze Mulungu wathu. Ni shuwadi kuti Mulungu anabasa maninge na moyo wa munthu osati mawonekedwe. (1 Samueli 16:7) Koma tikambasonkhana kuti timupempherere, chakulinga chathu ni kulemekeza Yahova na abale. Tilinganize kuti imwepo mwachemerewa ku tiribunali. Vinkuchita kuwonekeratu kuti mungaikire nzeru kavalidwe na momwe munkuwonekera. Mwakulingana na mwevi, kavalidwe kathu pakuyenda kumisonkhano kachadekana kuwonesa kuti tinkulemekeza Yahova Mulungu, yemwe ni ‘Woweruza wa dziko yose’ na kulemekeza soti malo yathu yomupempherera. —Genesis 18:25.

Kuti tiwonese kuti tinkutewedzadi vomwe tichapfunzira. Baibolo ichatilimbikisa kuti ‘timbavale mwawulemu.’ (1 Timoteyo 2:9, 10) Kuvala ‘mwawulemu’ kuchathandawuza kupewa kuvala vovala vothina, vogwerewera, vifupi panango vikulu maninge na vowonesa kudziwonesera. Malangizo mwaya sikuti ni yopanikiza. Ubwino ni wakuti kuli vovala vabwino vakhaindi na khaindi vomwe tingasankhule. Kuchita vinthu ‘mwanzeru’ ndiko kungatithandize kuti tisambavale motairira. Mavalidwe na mawonekedwe yathu ‘yangakomesere chipfunziso cha Mpulumusi wathu’ ndipo ‘yangalemekeze Mulungu’ olo tilibe kenena chinthu. (Tito 2:10; 1 Petulo 2:12) Tikambabvala bwino pakuyenda kumisonkhano, tichathandiza wanthu kukhala na maganizo yabwino pankhani yotumikira Yahova.

Podi kuti mulibe vovala vabwino, ayi kusiya kuyenda ku Nyumba ya Ufumu. Sikuti vovala vathu vitofunika kukhala vodula, koma chakudekana nkuvala vovala vowatcha bwino.

• Ndawa chani tichadekana kuvala bwino tikhala pamisonkhano?

• Ko ni mpfundo ziponi zomwe zichatithandiza kuti timbavale bwino?