2. Ko nivochitika viponi na makhalidwe yaponi yomwe yakhala yankuwoneka kuchokera mu gole ya 1914?

Wopfunzira wa Yesu adabvunza kuti: ‘Ko chizindikiro cha mapeto na kukhalapo kwanu chidzakhale chani?’ (Mateyu 24:3) Pakudawira, Yesu adawauza vinthu vizinji vomwe vikadadzachitika pomwe iye adakayamba kulamulira ninge Mpfumu mu Ufumu wa Mulungu. Vinthu vimwevi vikuphanidzapo nkhondo kusowa kwa chakudya matsoka ya chilengedwe. (Lewengani Mateyu 24:7.) Baibolo idaleweratu pomwe kuti vochitika va wanthu ‘mu ntsiku zomalizira’ vidzachitise kuti moyo udzakhale ‘woshupa maninge.’ (2 Timoteyo 3:1-5) Makhalidwe mwaya na vochitika vimwevi vakhala vinkuwoneka maninge kuchokera mu gole 1914.

3. Ko ndawa chani mu dziko vinthu vakhala vikuipiraipira kuyambira pomwe Ufumu wa Mulungu udayamba kutonga?

Yesu padandoti khaleni Mpfumu kudzulu mu Ufumu wa Mulungu, iye adayamba kumenya nkhondo na Satana na viwanda vake. Satana adaluza nkhondo mweyi. Baibolo ichati: ‘Iye adathusiwa pasi padziko yapasi, ndipo iye pabodzi na angelo wake adathusiwa wose pabodzi.’ (Chivumbulutso 12:9,10,12) Satana anaukali maninge ndawa yakuti ankudziwa kuti iye adzadzongewe. Iye ndiye ankuchitisa kuti wanthu ambabonere padziko yose yapasi. Ndipomwapa tidabwalini kuti vinthu padziko yapasi vinkuyenda vinkuipiraipira. Koma Ufumu wa Mulungu udzachose mabvuto yose mwaya.