Malifalensi ya Ndandanda ya utumiki na moyo wathu wachikhrisitu

1-7 MARÇO

CHUMA CHOGUMANIKA M’MAWU YA MULUNGU | NUMERI 7-8

‘Ko tinkupfunzira chani na nsasa wa Aizirayeli?’

it-1 tsa. 540

Mpingu

Wanthu womwe angatsogolera ndiwo angayankhula m’malo mwa Aizirayeli. (Eza 10:14) Ndipo ‘atsogoleri wa madzinza’ adadzoza chihema patsogolo pake nkuchipatulira. (Nu 7:1-11) Womwe angaimira kukhazikisiwa kwa ‘pangano yothembeka’ munthawe ya Nehemiya enze antsembe, Alevi na ‘atsogoleri.’ (Ne 9:38–10:27) Panthawe yomwe Aizirayeli angafamba mu chipululu penze ‘atsogoleri wa wanthu womwe angawaimira pamisonkhano womwe ni amuna wobvekera’ ndipo wose enzepo 250 womwe adabverana na Kora, Datani, Abiramu na Oni nkuyamba kukangana na Mose na Aroni. (Nu 16:1-3) Mobverana na malangizo ya Mulungu, Mose adasalula amuna 70 mwa akulu a Izirayeli womwe angawadziwa kuti ni wonyang’anira kuti amuthandize ‘kunyamula udindo wonyang’anira wanthu’ womwe yekha adakaukwanisalini. (Nu 11:16, 17, 24, 25) Pa Levitiko 4:15 pachafotokoza va ‘akulu wa gulu ya Aizirayeli’ ndipo vinkuwoneka kuti womwe angaimira wanthu enze atsogoleri wa Aizirayeli, akulu, woweruza na akapitawo.​—Nu 1:4, 16; Yos 23:2; 24:1.

it-3 tsa. 467

Rubeni

Mu nsasa wa Aizirayeli, wana wa Rubeni womwe enze wozunguliriwa na mbadwa za Simeoni na Gadi angakhala ku saidi ya ku sul ya chihema. Iwo akandonyamuka ulendo ambagawikana madzinza yatatu yotsogolerewa na Rubeni, yemwe yenze dzinza ya Yuda, Isakala na Zebuloni. (Nu 2:10-16; 10:14-20) Makonzedwe mwaya yadaphata soti basa pakupereka ntsembe panthawe yomwe angapatulira chihema.​—Nu 7:1, 2, 10-47.

w04 8/1 tsa. 25 ndi. 1

Mpfundo zikulu-zikulu za m’bukhu ya Numeri

Numeri 8:25, 26. Wanthu wachikulire angawuziwa kupumula pa basa yomwe angaiphata mwalamulo. Ambachita vimwevi pakuda kuwonesa kuti penze amuna woyenerera wophata basa za Alevi, ndipo pakuganizira nsinkhu wa wanthu wachikulire. Iwo angadzipereka kuti athandize Alevi anango. Podiya kuti ntsiku zino palibe wanthu womwe achapuma pabasa yolalikira va Ufumu, mpfundo ya lamulo mweyi inkutipasa pfunziro yodikana maninge. Peno Mkhrisitu angakwaniselini kuphata basa zinango ndawa ya kukalamba, iye angaphate basa zinango zomwe angazikwanise.

Mpfundo zothandiza

it-3 tsa. 328

Woyamba kubadwa

Wana amuna wa Aizirayeli woyamba kubadwa akakhala atsogoleri wa mabanja yosiyana-siyana ambaimira ntundu wose. Yahova adalewa ntundu moyu kuti ‘woyamba kubadwa,’ ndawa ya pangano yadachita na Abulahamu. (Eks 4:22) Pakuti iye adasunga moyo wawo, Yahova adalamula kuti ‘nipatulireni mwana aliyese mwamuna woyamba kubadwa, wa munthu na wa chipfuwo pakati pa wana Izirayeli’ akhale wopatulika kwa iye. (Eks 13:2) Ndipomwapa wana woyamba kubadwa ambaperekewa kwa Mulungu.

8-14 MARÇO

CHUMA CHOGUMANIKA M’MAWU YA MULUNGU

‘Momwe Yahova achatsogolerera wanthu wake’

it-1 tsa. 39

Nsasa

Kufuluka-fuluka kwa wana wa Aizirayeli (ninge mwayafotokozerewa madera 40 na Mose pa Numeri 33) kwenze soti chibodzi chowonesa dongosolo. Ntambo ukaima padzulu pa chihema, Aizirayeli wose angakhala m’malo yawo. Koma ntambo ukanyamuka Aizirayeli anganyamukiratu. ‘Yahova akalamula, Aizirayeli ambanyamuka ndipo Yahova akalamula, Aizirayeli ambamanga nsasa.’ (Nu 9:15-23) Malipenga yawiri yokonzewa na sando ndiyo yambathandizira pakudziwisa Aizirayeli kuti anyamuke.​—Nu 10:2, 5, 6.

w11 4/15 tsa. 4-5

Ko munkuwona chizindikiro chakuti Yahova ankutsogolera?

Ko tingawonese tani kuti tinkutembeja Yahova ndawa yotitsogolera? Mtumi Paulo adati: ‘Bverani womwe ankutsogolera pakati panu ndipo mumbawagonjere.’ (Aheb. 13:17) Koma nthawe zinango tingashupike kuchita vimwevi. Kuti mubvese, tilinganize kuti imwepo ndimwe Muizirayeli muntsiku za Mose. Pamwandofambako pang’ono, ntambo unkuima. Imwepo nkumbadzibvunza kuti: Manje ntambo moyu ukhale mwapa ntsiku ibodzi, umale sondo panango minyezi yanganani? ‘Kuti nichite kumasula vombo vose?’ Panango imwepo mungandomasula vodikana maninge. Ntsiku pang’ono, imwepo nkumasuliratu wose, mwati ndawa munkushupika kuwalagula. Koma pamwandosala pang’ono kumaliza kumasula, munkuwona ntambo ule wanyamuka ndipo ati longedzani timbayenda. Imwepo mudakalongedza? Aizirayeli tsono ‘ambanyamukiratu nthawe mweyo.’​—Num. 9:17-22.

Manje imwepo muchita tani Yahova akakupasani malangizo? Muchayatewedza na moyo wose ‘nthawe mweyo’? O panango mupitiriza muchita vinthu mwamudadjairira? Mu munkudziwa bwino-bwino malangizo ya manje-manje ya momwe tingachitisire mapfunziro ya Baibolo, kulalikira wanthu wa chiseweredwe chinango na mwatingachitire pfunziro ya banja sondo na sondo? Ko munkudziwa bwino malangizo yolewa va kuchita vinthu mobverana na Makomiti yoyankhula na wakushipitali na yolewa momwe tingachitire misonkhano ikulu-ikulu? Mungawonese kuti munkukondwa kutsogolerewa na Mulungu mwa kuchinja mukatsuuliwa. Mukafuna kusalula vochita pankhani zikulu-zikulu, mumbathembe nzeru za Yahova osati zanu. Mumbafufuze soti malangizo ya gulu. Kukakhala nvula ya tuphaliwali, mwana achathawira kwa ababa wake. Isembo timbathawire kwa Yahova tikagumana na mabvuto yolingana na nvula ya tuphaliwali.

Mpfundo zothandiza

it-1 tsa. 253

Nsonkhano

Phindu ya kusonkhana. Kusonkhana pabodzi nkumbaphindula na makonzedwe ya Yahova ni kobverana maninge na kuchita chikumbuso cha gole na gole cha Phasika. Munthu yemwe wenzelini paulendo ndipo ni wosapsipiziwa, koma nkulekera dala kuchita Phasika, angadekana kuphewa. (Nu 9:9-14) Mpfumu Hezekiya padachemera wanthu wose kuti achite Phasika, adawauza kuti: ‘Imwe Aizirayeli, bwererani kwa Yahova . . . ayi kuumisa khosi yanu ninga momwe azibereki wanu adachitira. Gonjerani Yahova, yendani kunyumba yake yopatulika yomwe waichenesa mpakana kale-kale ndipo tumikirani Yahova Mulungu wanu kuti ukali wake uleke kukugakirani. . . . Yahova Mulungu wanu ni wabwino na wachifundo ndipo iye adzanyang’anelini kumbali mukabwerera kwa iye.’ (2Mb 30:6-9) Kulekera dala kuyenda kumisonkhano mwaya kwenze kupandukira Yahova. Podiya kuti ntsiku zino akhrisitu achachitalini chikondwerero cha Phasika, Paulo adafotokoza kuti timbaikhire nzeru misonkhano. Iye adati: ‘Naboni tiganizirane pa chikondi na basa zabwino. Ayi kuleka kusonkhana ninge momwe anango adadjairira kulova kumisonkhano, koma naboni timbalimbikisane ninge mwamunkudziwira kuti ntsiku ikufendera.’​—Ahe 10:24, 25; wonani pakuti MPINGU.

15-21 MARÇO

CHUMA CHOGUMANIKA M’MAWU YA MULUNGU | NUMERI 11-12

Ndawa chani tichadekana kupewa khalidwe yodandawula?

w01 6/15 tsa. 17 ndi. 20

Ayi kukhala wakubva nkuyebwa

Akhrisitu azinji agonjeralini chilako-lako chawo chakuti achite chigololo. Koma podiya kuti viri tene, timbasamale kuti tileke kukhala na chizolowezi chodandaula-dandaula ndawa vingachitise kuti Yahova akalipe nase. Paulo adachenjeza kuti: ‘Panango osati tiwayese Ambuya ninga momwe anango [mwa Aizirayeli] adamuyesera achidzongewa mwa kuchita kulumiwa na nyoka. Osati tikhale pomwe odandaula, ninga momwe anango mwa iwo angadandaulira mpakana wocheneka ule nkuwacheneka wose.’ (1 Akorinto 10:9, 10) Aizirayeli ambadandaula nkumbatsutsana na Mose na Aroni, ndipo tingalewe kuti ambatsutsana na Mulungu chaiye. Iwo ambaderera mana yomwe Yahova ambawapasa modabwisa. (Numeri 16:41; 21:5) Ko kudandaula kwadachita yenze nkhani ing’ono pakulinganiza na tchimo yachigololo ire? Nkhani ya m’Baibolo ichawonesa kuti womwe adaphewa na nyoka ni azinji maninge. (Numeri 21:6) Nthawe yoyamba ire, womwe adaphewa ndawa yodandaula enzepo 14.700. (Numeri 16:49) Ndipomwapa osati timbasenzekese kuleza moyo kwa Yahova mwa kupwaja vomwe iye watipasa.

w06 7/15 tsa. 15 ndi. 7

‘Pewani kudandaula’

Maganizo ya Aizirayeli yenze yadachinjiratu! Pakuyamba iwo adatembeja Yahova mwa kumuimbira nyimbo panthawe yadamasuliwa ku Iguputo na kupulumusiwa pa nyanja ifuwira. (Ekisodo 15:1-21) Ndawa ya mabvuto yomwe angagumana nayo muchipululu na kugopa Akanani, kutembeja kose kwa wanthu wa Mulungu kudapera, ndipo adakhala na mzimu wosakhutira. M’malo motembeja Mulungu ndawa ya ufulu wawo, iwo adayamba kumuimba mulandu nkumbati ankuwamana vinthu. Ndipomwapa kudandawula kudawonesa kuti alibe kutembeja vinthu vomwe Yahova adawapasa. Ndawa ya vimwevi iye adati: ‘Ko gulu ya wanthu woipa mwawa idandaule motsutsana na inepano mpakana lini?’—Numeri 14:27; 21:5.

it-1 tsa. 100

Kukangana

Kung’ung’udza. Kudandaula kuchakhumudwisa na kukalipisa. Aizirayeli padandoti chokeni ku Iguputo adayamba kudandaulira Yahova, nkumbanyoza atsogoleri enze pakati pawo omwe ni Mose na Aroni. (Eks 16:2, 7) Patsogolo pake, kudandaula kwawo kudakhumudwisa Mose ndipo iye adakumbira kuti andofa. (Nu 11:13-15) Kudandaula kungaikhe moyo pangozi wa munthu yemwe ankudandaula. Yahova adawona wanthu womwe angang’ung’udzira Mose kuti angapandukira utongi wake. (Nu 14:26-30) Azinji adafa ndawa ya kudandaula kumuku.

Mpfundo zothandiza

it-2 tsa. 748

Mana

Momwe mana yambawonekera. Mana yenze ‘yachena ninge ntchere ya coentro’ ndipo yambawoneka ‘yong’anima’ ninge golide. Yenze yotapira ninge ‘mabulasha yoikha uchi’ panango ninge ‘mabolo yoikha uchi.’ Mana akayagaya pamphero panango kuyadera m’banda, ambayaphika, panango kutenga ufa wake nkukonzera mabolo.​—Eks 16:23, 31; Nu 11:7, 8.

22-28 MARÇO

CHUMA CHOGUMANIKA M’MAWU YA MULUNGU | NUMERI 13-14

‘Momwe chikhulupiriro chichatichitisira kukhala olimba moyo’

w06 10/1 tsa. 16-17 ndi. 5-6

Kulimba moyo ndawa ya chikhulupiriro na kugopa Mulungu

Yoswa na Kalebe womwe enze mthumi, enze na shungu yakuti angene mu Dziko yopolomisiwa. Iwo adalewa kuti: ‘Ayi kuwagopa Akanani ndawa iwo kwa ise ali ninge mikate.’ (Numeri 14:9) Ko Yoswa na Kalebe ambandodzinamiza? Neye! Ndawa iwo na ntundu wose adachita kuwona wokha momwe Yahova adachitisira manyazi Aiguputo wamphanvu na milungu yawo pakuphatisa basa Miliri khumi. Patsogolo pake adawona Farao na gulu yake yankhondo ankumira mu Nyanja ifuwira. (Salimo 136:15) Ndipomwapa tingalewe kuti mantha ya anango wale 10 yenze yosathandiza. Ndawa yowawiwa moyo, Yahova adati: ‘Nilini pati adzayambe kunithemba, pa vinthu vose vanawachitira ivi shuwa?’​—Numeri 14:11.

Yahova adafotokoza kuti bvuto ya wanthu mwawa yenze kusowa chikhulupiriro. Vimwevi vidawonekera pa mantha yawo. Inde, chikhulupiriro na kulimba moyo vichafambira pabodzi, mpakana mtumi Yohane adanemba kuti: ‘Tagonjesa dziko na chikhulupiriro chathu.’ (1 Yohane 5:4) Ntsiku zino, chikhulupiriro chathandiza kuti ntontholo wabwino wa Ufumu ulalikiriwe padziko yose na Mboni za Yahova zoposha 6 midyawu. Mboni zimwezi zinkuphatanidzapo wana, akulu-akulu, wodwala na wamphanvu. Palibe m’dani yemwe wakwanisa kufunga pakamwa pa gulu yamphanvu na yolimba moyo mweyi.​—Aroma 8:31.

Mpfundo zothandiza

it-1 tsa. 644

Dziko yomwe Mulungu adapasa Aizirayeli

DZIKO yomwe Mulungu adapasa Aizirayeli yenze yabwino maninge. Pomwe Mose adatumiza nthumi kuti zikawone mwairiri Dziko yopolomisiwa na kukatengako vipaso vake, iwo adabweresa nkhuyu, makangaza (panango chimanga chachizungu), na uva uzinji, vomwe vidatakuliwa na amuna awiri mwa kuchita kutandalika kantanda paphewa. Podiya kuti pakubwerera angabvambo mantha, adafikira kupereka lipoti yabwino yakuti: ‘Ni dziko yofamba nkaka na uchi.’​—Nu 13:23, 27.

29 MARÇO–4 ABRIL

CHUMA CHOGUMANIKA M’MAWU YA MULUNGU | NUMERI 15-16

‘Chenjerani na kumeka pabodzi na kudzithemba maninge’

w11 9/15 tsa. 27 ndi. 12

Ko imwepo ndimwe wodziwika kwa Yahova?

Ali paulendo woyenda ku Dziko yopolomisiwa, Kora adayamba kuwona njira yomwe Yahova angaphatisa basa pakutsogolera Aizirayeli yenze yophonyeka. Amuna 250 adabverana naye pakuganiza kuti angakwanise kuchinja vinthu. Apa Kora moyu na anzake ambaganiza kuti ali paushamwali wolimba na Yahova. Iwo adauza Mose kuti: ‘Taneta namwe manje! Gulu yose iyi ni yochena, ndipo Yahova ali pakati pawo.’ (Num. 16:1-3) Munkuwonambo kuti wanthu mwawa enze wodzikuza na wodzithemba? Mose adawauza kuti: ‘Yahova awonese kuti wake ni mponi.’ (Lewengani Numeri 16:5.) Mangwana yake maulo, Kora na anzake wopanduka wale adadzaphewa.​—Num. 16:31-35.

w11 9/15 tsa. 27 ndi. 11

Ko imwepo ndimwe wodziwika kwa Yahova?

Takambirana vitsanzo va wanthu awiri womwe adachita vinthu mosiyana maninge pa nkhani ya kulemekeza vomwe Yahova adasalula kuchita. Wanthu mwawa ni Mose na Kora. Vomwe adachita vinkuwonesa momwe Yahova achatiwonera tikambalemekeza panango kupwaja vomwe wasaina kuchita. Kora wenze wa m’banja ya Kohati mudzinza ya Levi ndipo wenze na maudindo yazinji. Iye adawona momwe Yahova adapulumusira Aizirayeli pa Nyanja ifuwira, mpakana adathandizira panthawe yomwe Yahova angapereka chiweruzo kwa Aizirayeli wosabvera paphiri ya Sinai. Iye ambaphatambo basa yotakula likasa ya pangano. (Eks. 32:26-29; Num. 3:30, 31) Vinkuwoneka kuti kwa magole yazinji Kora wenze wokhulupirika kwa Yahova ndipo Aizirayeli azinji mu nsasa ambamulemekeza.

Mpfundo zothandiza

w98 9/1 tsa. 20 ndi. 1-2

Tsimikizirani kuti munkuikha vodikana pamalo yoyamba

Yahova adaitengera siriyasi nkhani mweyi. Baibolo ichati: ‘Yahova adauza Mose kuti: ‘Munthu muyo aphewe basi!” (Numeri 15:35) Ko ndawa chani Yahova adaipidwa na vomwe munthu moyu adachita? Wanthu mwawo enze na ntsiku 6 zakuti angateme nkhuni, kufaga vakudya, vovala na kukonza malo yogona. Ntsiku ya 7 angadikana kuipatula kuti ambachite vinthu vauzimu. Podiya kuti kwenzelini kuphonya kutema nkhuni, kuphatisa basa nthawe yomwe angadikana kuipatula kuti atumikire Yahova ndiko kwenze kuphonya. Podiya kuti Akhrisitu achaphatisalini basa Chilamulo cha Mose, ko nkhani mweyi inkutipfunzisalini kuti tichadikana kumbaikha vinthu vodikana pa malo yakuyamba?—Afilipi 1:10.

5-11 ABRIL

CHUMA CHOGUMANIKA M’MAWU YA MULUNGU | NUMERI 17-19

‘Ine . . . ndine cholowa chanu’

w11 9/15 tsa. 13 ndi. 9

Ko munkubvuma kuti Yahova akhale cholowa chanu?

Ganizirani va Alevi womwe alibe kutambira cholowa cha malo. Pakuti kupemphera chaiko kwenze kodikana maninge kwa iwo, angadikana kutsimikiza kuti Yahova awagumanire vodikana pa moyo wawo. Yahova adawauza kuti: ‘Ine ndine cholowa chanu.’ (Num. 18:20) Podiya kuti isepano tichadikanalini kachisi chaiye ninge momwe antsembe na Alevi angachitira, tingawatewedzere pakutsimikizira kuti Yahova adzatisamalire. Patiri nkati chaimo mwa ntsiku zomalizira, tichadekana kuthemba maninge Mulungu kuti atipase vodikana pamoyo wathu.​—Chiv. 13:17.

w11 9/15 tsa. 7 ndi. 4

Yahova ni cholowa changu

Ko Yahova adakhala cholowa kwa Alevi pomwe adawasalula kuti amutumikire pa udindo moyu? Pomwe Yahova adalewa kuti akhale cholowa chawo ambathandawuza kuti m’malo mowapasa malo ninge cholowa, awapase utumiki wakudikana maninge. Cholowa chawo chenze ‘untsembe kwa Yahova.’ (Yos. 18:7) Nkhani ya pa Numeri 18:20, ichatithandiza kudziwa kuti iwo ambasowadilini chinthu. (Lewengani Numeri 18:19, 21, 24.) Alevi angadikana kupasiwa ‘chakhumi chilichose mu Izirayeli ninge cholowa chawo ndawa ya utumiki wawo.’ Angadikana kutambira gawo ibodzi pa magawo 10 ya vokolola na vipfuwo va Aizirayeli. Nawombo Alevi angadikana kupereka gawo ibodzi ‘yabwino maninge’ pa magawo 10 ya vomwe angatambira na chakulinga chakuti asamalire wantsembe. (Num. 18:25-29) Antsembe angapasiwa soti ‘vopereka vose vopatulika’ vomwe Aizirayeli angapereka kwa Mulungu kumalo yake yopempherera. Ndipomwapa, penze vifukwa vobveka kuti wantsembe ambakhulupirire kuti Yahova awasamalire.

Mpfundo zothandiza

g02 6/8 tsa. 14 ndi. 2

Munyu ni wabwino maninge

Munyu ungaimira chinthu cholimba na chokhalisa. Ndipomwapa, m’Baibolo pangano yokhalisa ichachemerewa kuti ‘pangano ya munyu.’ Pakukhazikisa pangano mweyi, angadyera pabodzi chakudya chomwe aikhako munyu. (Numeri 18:19) Chilamulo cha Mose chingalewa kuti ntsembe zomwe zoperekewa paguwa zimbakhale na munyu uzinji. Nivosachita kubvunza kuti angachita vimwevi pakuwonesa kuti ntsembe alibe kuigumana mwachinyengo ndipo ni yosawola.

12-18 ABRIL

CHUMA CHOGUMANIKA M’MAWU YA MULUNGU | NUMERI 20-21

‘Khalani wodekha mukayambiwa’

w19.02 tsa. 12 ndi. 19

Khalani wopfatsa kuti mukondwerese Yahova

Tidzapewe kuphonyesa vinthu. Ndoganizani va Mose. Kwa magole yazinji, iye wenze wopfatsa ndipo ambakondweresa Yahova. Koma kumamaliziro kwa magole 40, iye adakangira kukhala wopfatsa. Panthawe mweyi, mulongosi wake yemwe vinkuwoneka kuti ndiye adamuthandiza kuti aleke kuphewa ku Iguputo, wenze adafa nkuikhiwa ku Kadesi. Aizirayeli adayamba soti kudandaula kuti Mose ankuwasamaliralini bwino. Iwo adayamba ‘kupiringana na Mose’ ndawa ambasowa madzi. Wanthu mwawa adayamba kudandaula podiya kuti adawona momwe Yahova angaphatisira basa Mose pakuchita vodabwisa vizinji. Ndipo Mose wenze adawonesa kwa nthawe itali kuti ni m’tsogoleri woganizira wanthu, osati wodzikonda. Wanthu podandaula sikuti ambandoganizira va madzi yokha, koma ambatsutsa pomwe Mose kukhala ninge kuti iye ndiye adawachitisa kuti abve nyota.​—Num. 20:1-5, 9-11.

w19.02 tsa. 13 ndi. 20-21

Khalani wopfatsa kuti mukondwerese Yahova

Pavidateno, Mose adakangira kukhala wopfatsa ndipo adakalipa. M’malo mowonesa chikhulupiriro nkuyankhula na mwala mobverana na malangizo yomwe Yahova adamupasa, Mose adakalipira wanthu wale ndipo adawonesa kuti iye ndiye angawapase madzi. Patsogolo pake adamenya mwala ule kawiri mwakuti madzi yadayamba kubula. Kudzikuza komasoti ukali vidamuchitisa kuti aphonyese vinthu. (Sal. 106:32, 33) Vomwe iye adachita pa kanthawe kamwaka vidachitisa kuti akangire kungena mu Dziko yopolomisiwa.​—Num. 20:12.

Ko tinkupfunzira chani pankhani mweyi? Chakuyamba, tichadekana kuyesesa nthawe zose kuti tikhale wopfatsa. Tikandodzilekerera pang’ono basi, tingayambe kudzikuza panango kuchita vinthu tiribe nzeru. Chachiwiri, munthu akakhala na nkhawa anganete, ndipomwapa timbayesese kukhala wopfatsa olo panthawe yomwe tapanikizika.

w09 9/1 tsa. 19 ndi. 5

Woweruza wachilungamo

Chakuyamba, Mulungu alibe kumuuzako Mose kuti ayankhule na wanthu panango kuti auze wanthu mwawo kuti ankupikisana na Yahova. Chachiwiri, Mose na Aroni adakangira kupereka ulemelero kwa Mulungu. Ndipomwapa Mulungu adawauza kuti: ‘Imwepo mulibe . . . kunilemekeza.’ (Numeri 20:12) Pakulewa kuti ‘tikubulisireni madzi,’ Mose ambathandauza kuti iye na Aroni, ndiwo ati apase madzi wanthu, osati Mulungu. Chachitatu, chilango chomwe Mulungu adawapasa chenze chobverana na chomwe adaperekako m’mambuyo. Vimwevi vikanati kuchitika, Mulungu alibe kubvuma kuti wanthu womwe alibe kubvera angene mu Dziko ya Kanani. Ndipomwapa iye adachitambo chibodzi-bodzi na Mose na Aroni. (Numeri 14:22, 23) Chachinayi, Mose na Aroni enze atsogoleri wa ntundu wa Izirayeli. Vomwe vimbachitika ni vakuti, wanthu waudindo akaphonyesa chinthu, Mulungu ambawaimba mulandu ukulu.​—Luka 12:48.

Mpfundo zothandiza

w14 6/15 tsa. 26 ndi. 12

Ko imwepo muchawona wanthu ofoka ninge momwe Yahova achawawonera?

Pa vose mwevi vomwe Aroni adachita, Yahova adakafuna adakamulanga nthawe mweyo. Koma iye adadziwa kuti Aroni wenzelini munthu woipa ndipo ndiyelini adayambisa mabvuto mwaya. Vinkuwoneka kuti Aroni ambaphonyesa vinthu ndawa yopanikizika panango kutewera vomwe wanthu anango angada. Koma iye ambabvuma kuphonya kwake ndipo ambatsutsanalini na viweruzo va Yahova. (Eks. 32:26; Num. 12:11; 20:23-27) Yahova ambaganizira maninge chikhulupiriro cha Aroni na kulapa kwake na moyo wose. Payadapita magole yazinji, wanthu ambakumbukira basi kuti Aroni pabodzi na wana mwake enze wanthu ogopa Yahova.​—Sal. 115:10-12; 135:19, 20.

19-25 ABRIL

CHUMA CHOGUMANIKA M’MAWU YA MULUNGU | NUMERI 22-24

‘Palibe chingakangise Yahova kutidalisa’

bt tsa. 53 ndi. 5

Kulengeza ‘ntontholo wabwino wolewa va Yesu’

Ninge nthawe ya atumi, ntsiku zino wanthu wa Mulungu achasiyalini kulalikira ndawa yodzudziwa. Nthawe zizinji, Akhrisitu achachichimiziwa kuchoka kumalo yanango nkukakhala yanango, kudjeri panango ku dziko inango, ndipo vimwevi vichachitisa kuti ntontholo wabwino wa ufumu ufalikire kumadera yomwe ayenda. Mwakulinganiza, pa nthawe yankhondo yachiwiri yapadziko yose, Mboni za Yahova zimbalalikira basi podiya kuti zenze m’madjeri yodzudzirako wanthu ya chipani cha Nazi. Muyuda munango yemwe adagumana na Mboni kudjeri muko adanena kuti: ‘Mboni za Yahova zomwe zenze mudjeri zenze zolimba moyo maninge, ndipo vimwevi vidanitsimikizira kuti vomwe ambakhulupirira vimbachokeradi m’Malemba, ndawa ya vimwevi inembo nidakhala Mboni.’

it-2 tsa. 717

Uzende

Uzende wotsutsana na Yahova. Balamu ambafuna maninge kutemberera Aizirayeli kuti apasiwe mali na Mpfumu Balaki ya ku Mowabu. Koma Yahova adamukangisa. Pakulewa va Balamu mtumi Petulo adanemba kuti ‘nyama yosayankhula yotakula ntolo idayankhula ninge munthu na kukangisa vochita vauzende va mneneri mwaule.’ Pakulewa va uzende wa Balamu, mtumi Petulo adaphatisa basa mawu yachigiriki yakuti pa·ra·fro·ní·a, yomwe yachathandauza ‘kusokonezeka.’​—2Pe 2:15, 16; Nu 22:26-31.

Mpfundo zothandiza

w04 8/1 tsa. 27 ndi. 2

Mpfundo zikulu-zikulu za m’bukhu ya Numeri

22:20-22—Ndawa chani ukali wa Yahova udamugakira Balamu? Yahova wenze adauza mneneri Balamu kuti osati atemberere Aizirayeli. (Numeri 22:12) Koma Balamu adatengana na amuna wa Balaki anacholinga chotemberera Aizirayeli. Balamu ambafuna kukondweresa mpfumu ya Mowabu kuti apasiwe mali. (2 Petulo 2:15, 16; Yuda 11) Olo panthawe yomwe Balamu angachichimiziwa kudalisa Aizirayeli m’malo mowatemberera, iye ambafuna kukondweresa mpfumu mwa kupereka maganizo yakuti akazi womwe achatumikira Baala anyengerere amuna wachiizirayeli. (Numeri 31:15, 16) Ndipomwapa ukali wa Mulungu udagakira Balamu ndawa ya dyera yake yomwe idamuchitisa vachinyengo.

26 ABRIL–2 MAIO

CHUMA CHOGUMANIKA M’MAWU YA MULUNGU | NUMERI 25-26

‘Ko munthu m’bodzi angachinjise vinthu?’

lvs tsa. 118 ndi. 1-2

‘Thawani chigololo!’

PESHIKADOLI akafuna kupha ntsomba, ayenda komwe angagumane tsomba zomwe ankufuna. Aponya medzo kudikhira kuti tsomba idye, ikadya achakwekwetera panja mwakankulumize.

Wanthumbo angakashiwe munjira mweyi. Mwakulinganiza, Aizirayeli padandosala pang’ono kungena mu Dziko yopolomisiwa adamanga nsasa muchigwa cha Mowabu. Mpfumu ya ku Mowabu idapolomisa munthu munango dzina yake Balamu kuti adzamupase mali zizinji akakwanisa kutemberera Aizirayeli. Padakangira kuwatemberera, adagumana njira inango yomwe idakachitisa Aizirayeli kudzibweresera wokha mabvuto. Iye adasalula njira yabwino yowayesera. Adatumiza atsikana wa ku Mowabu kuti ayende komwe Aizirayeli ambakhala kuti akanyengerere amuna.​—Numeri 22:1-7; 31:15, 16; Chivumbulutso 2:14.

lvs tsa. 119 ndi. 4

‘Thawani chigololo!’

Ko ndawa chani Aizirayeli azinji adachita vomwe Balamu ambafuna? Ndawa yakuti ambandoganizira vomwe iwo angada ndipo adayebwa vose vomwe Yahova adawachitira. Koma penze vifukwa vizinji vomwe vidakawachitisa kukhala wokhulupirika kwa Yahova. Mwakulinganiza, adawapulumusa ku ukapolo ku Iguputo, ambawapasa vakudya mchipululu ndipo adawatsogolera soti pa nthawe mwaiyi pomwe enze adasala pang’ono kungena mu Dziko yopolomisiwa. (Aheberi 3:12) Koma iwo adayebwa vose nkuyamba kuchita chigololo. Mtumi Paulo adanemba kuti: ‘Tisambachite chigololo, ninge momwe anango adachitira chigololo nkuphewa.’​—1 Akorinto 10:8.

Mpfundo zothandiza

it-3 tsa. 694

Malire

Vinkuwoneka kuti kagawidwe ka malo ya madzinza adakachita munjira ziwiri zomwe ni kuchita mayere na kuyendera kukula kwa dzinza. Panango mayere mwaya ambayachitira pafupi na malo yomwe dzinza idakatambira. Mayere mwaya yambathandiza kudziwa kuti ko malo ya dzinza yagwera kumachibese, kumaulo, ku norte panango ku sul, dera ya mapiri panango kunsererembwe. Yahova ndiye ambatsogolera mayere mwaya kuti paleke kukhala kugegedzana panango djerasi pakati pa madzinza.​—Miy 16:33.