NKHANI YOPFUNZIRA 50
Momwe chikhulupiriro na basa zake vitichitisira kukhala olungama
‘Fambani mwa chikhulupiriro ninge chomwe baba wathu Abulahamu wenze nacho.’—ARO. 4:12.
NYIMBO NA. 119 Tiyenera Kukhala Ndi Chikhulupiriro
VOMWE TIPFUNZIREa
1. Tikambaganizira va Abulahamu, ko tingadzibvunze mbvunzo uponi?
WANTHU azinji adabvako kale va mbiri ya Abulahamu, koma adziwalini vizinji va iye. Isepano tidziwa vizinji va munthu wotomolewa m’Baibolo moyu. Mwakulinganiza, tidziwa kuti Abulahamu adachemerewa kuti: ‘Ni baba wa ose omwe anachikhulupiriro.’ (Aro. 4:11) Panango imwepo mungadzibvunze kuti: ‘Ko inepano ningakwanise kukhala na chikhulupiriro cholimba ninge cha Abulahamu?’ Inde, vimwevi nivokwanisika.
2. Ndawa chani ni vodekana kupfunzira va chitsanzo cha Abulahamu? (Yakobo 2:22, 23)
2 Njira ibodzi yomwe tingakwanisire kukhala na chikhulupiriro ninge cha Abulahamu ni kupfunzira chitsanzo chomwe iye adatisiyira. Pambuyo pakuti watambira malamulo ya Mulungu, Abulahamu adafuluka nkukakhala kutali komwe kwa magole yazinji ambakhala m’mahema. Ndipo wenze wokonzeka kupereka ntsembe mwana wake yemwe ambamukonda maninge, Isaki. Vose vimwevi vimbawonesa kuti Abulahamu wenze na chikhulupiriro cholimba maninge kwa Yahova. Chikhulupiriro cha Abulahamu na basa zake vidachitisa kuti Yahova amubvume kukhala shamwali wake. (Werengani Yakobo 2:22, 23.) Yahova ankufuna kuti tose kuphatanidzapo imwepo pamwekha tikhale azishamwali wake. Ndipomwapa iye adauzira Paulo na Yakobo kuti anembe va chitsanzo cha Abulahamu m’Baibolo. Mu pfunziro mweyi tione vomwe tinkupfunzira pa lemba ya Aroma msolo 4 na Yakobo msolo 2 vokhudza Abulahamu. Mu misolo yawiri mwaya isepano tiwerenga vinthu vodekana maninge vokhudza Abulahamu.
3. Ko ni vesi iponi ya m’Baibolo yomwe Paulo na Yakobo adayiphata mawu?
3 Paulo na Yakobo pakunemba adaphata mawu ya pa Genesis 15:6, pomwe panena kuti: ‘[Abulahamu] adakhulupirira Yahova ndipo Mulungu adamuwona ninge wolungama.’ Kwa Yahova Munthu wolungama ni yemwe achachita chifuniro chake na kumukondweresa. Ni vabwino kudziwa kuti wanthu ochimwa ninge ise tingawonewembo na Mulungu kuti ndise olungama nakuti tilibe chilema. Ko imwepo mungakondelini kuti Yahova anenembo mawu ninge mwaya kwa imwepo? Kuti vimwevi vichitike naboni tione chifukwa chomwe chidachitisa Yahova kuchemera Abulahamu kuti ni wolungama na vomwe tingachite peno tinkufuna kuti Yahova ationembo tene.
KUTI TIKHALE OLUNGAMA TICHADEKANA CHIKHULUPIRIRO
4. Ko ni chani chomwe chingachitise Akhrisitu kukhala olungama?
4 Mu kalata yake yoyenda kwa Aroma, Paulo adafotokoza kuti wanthu tose ndise ochimwa. (Aro. 3:23) Manje vingakwanisike tani kuti Yahova awone wanthu anango ninge olungama komasoti alibe chilema? Kuti athandize Akhrisitu kubvesa mpfundo mweyi, Paulo adafotokoza va nkhani ya Abulahamu.
5. Ndawa chani Yahova adachemera Abulahamu kuti ni wolungama? (Aroma 4:2-4)
5 Pomwe Abulahamu ambakhala mudziko ya Kanani ni pomwe Yahova adanena kuti iye ni wolungama. Ndawa chani Yahova adanena vimwevi? Ko ni ndawa yakuti Abulahamu ambatewedza chilamulo cha Mose mosaphonyesa? Neye. (Aro. 4:13) Tinkudziwa vimwevi ndawa yakuti chilamulo cha Mose chidaperekewa kwa ntundu wa Aizirayeli magole 400 pomwe Mulungu wanenakale kuti Abulahamu ni wolungama. Manje ndawa chani Yahova adanena kuti Abulahamu wenze munthu wolungama? Yahova adawonesa kukoma ntima kosapera kwa Abulahamu ndipo adamunena kuti ni wolungama dawa ya chikhulupiriro chake.—Werengani Aroma 4:2-4.
6. Ndawa chani Yahova angachemere wanthu omwe alibe ungwiro kuti ni olungama?
6 Paulo adafotokoza kuti peno munthu anachikhulupiriro kwa Mulungu, ‘chikhulupiriro chake chimuchitisa kukhala wolungama.’ (Aro. 4:5) Paulo adafotokozapomwe kuti: ‘Nchibodzibodzimbo Davide ankunena va chimwemwe cha munthu yemwe Mulungu amuona wolungama, osati ndawa ya basa zomwe iye achachita: ‘Okondwa ni omwe akhululukiriwa vophonya vawo vosabvera malamulo ndipo machimo yawo yafuchiriwa; wodala ni munthu yemwe Yahova adzakumbukirelini machimo yake.’’ (Aro. 4:6-8; Sal. 32:1, 2) Mulungu akhululukira machimo ya wanthu omwe anachikhulupiriro. Iye akhululukiratu ndipo akumbukiralinipomwe vophonya vawo. Kwa iye wanthu mwawa ni olungama ndipo alibe chilema ndawa ya chikhulupiriro chawo.
7. Ndawa chani tinganene kuti atumiki okhulupirika wakumbuyo enze olungama?
7 Ni shuwadi kuti Abulahamu, Davide na atumiki anango wa Yahova adachemerewa kuti ni olungama. Olo venze teno iwo adapitiriza kukhala alibe ungwiro ndipo ambaphonyesa vinthu. Koma ndawa ya chikhulupiriro chomwe enze nacho Yahova ambawaona ninge alibe chilema makamaka akambalinganiza na wanthu omwe ambamutumikiralini. (Aef. 2:12) Mu kalata yake yoyenda kwa Aroma, Paulo adafotokoza kuti tichadekana kukhala na chikhulupiriro peno tinkufuna kukhala pa ushamwali na Mulungu. Ndipomwapa ninge Abulahamu na Davide tikakhala na chikhulupiriro kwa Yahova tingakhalembo azishamwali wake.
KO PALI KUBVERANA KUPONI PAKATI PA CHIKHULUPIRIRO NA BASA?
8-9. Ko ni maganizo yophonyeka yaponi yomwe yenzepo pa vomwe Paulo na yakobo adanemba, ndipo ndawa chani?
8 Kwa magole yazinji akuluakulu wa vipembedzo atsutsana kuti chodekana maninge ni chiponi, chikhulupiriro panango basa. Anango achapfunzisa kuti, tichadekana kukhulupirira ambuya wathu Yesu Khrisitu kuti tidzapulumuke. Panango imwepo mudabvakokale anango ankunena kuti: “Bvuma Yesu ndipo iwepo udzapulumusiwe.” Matchetchi yazinji yaphatisa basa mawu ya Paulo yakuti: ‘Mulungu awona munthu kukhala wolungama osati ndawa ya basa zake.’ (Aro. 4:6) Anango achatsutsa nkunena kuti: “Imwepo mungapulumusiwe” mukambazungira malo yomwe matchetchi yachati ni yochena panango mukambachita vinthu vabwino. Ndipo anganenepomwe vomwe viri pa Yakobo 2:24 pomwe pachati: ‘Munthu aonewa kuti ni wolungama ndawa ya basa zake osati ndawa ya chikhulupiriro chokha.’
9 Ndawa ya maganizo yosiyana mwaya, ofufudza Baibolo anango adanena kuti vomwe Paulo na Yakobo adanena vokhudza chikhulupiriro na basa vitsutsana. Mobverana na wa mvipembedzo anango, Paulo ambakhulupirira kuti munthu achadekana kukhala na chikhulupiriro kuti akondwerese Mulungu ndipo Yakobo ambakhulupirira kuti munthu achadekana kuchita basa zabwino kuti akondwerese Mulungu. Wofufudza Baibolo munango adati: “Yakobo ambabvesalini kuti ndawa chani Paulo adanena kuti munthu achadekana kukhala na chikhulupiriro kuti akhale wolungama.” Kunena shuwa Yakobo ambabverananavolini vomwe Paulo ambafotokoza. Koma vomwe Paulo na Yakobo adanemba vidachita kuuziriwa na Yahova. (2 Tim. 3:16) Ndipomwapa pankudekana kufotokozewa bwinobwino kusiyana komwe kulipo pa vomwe Paulo na Yakobo adafotokoza. Manje vofotokozewa m’makalata ya Paulo na Yakobo ndivo vati vitithandize kubvesesa bwinobwino mpfundo mweyi.
Paulo adafotokozera Akhrisitu wa Chiyuda omwe ambakhala ku Roma kudekana kwa kukhala na chikhulupiriro pa kusachita basa zomwe chilamulo cha Mose chimbafuna (Onani ndime 10)b
10. Ko ni ‘basa’ ziponi zomwe Paulo ambanena? (Aroma 3:21, 28) (Onani pomwe foto.)
10 Ko ni ‘basa’ ziponi zomwe Paulo ambafotokoza pa Aroma 3 na 4? Iye ambafotokoza makamaka va ‘basa zomwe chilamulo chimbanena.’ Iye ambafotokoza va chilamulo chomwe chidaperekewa pa phiri ya Sinai. (Werengani Aroma 3:21, 28.) Vinkuwoneka ninge mu nthawe ya Paulo, Akhrisitu anango wa Chiyuda ambashupika kutsimikizira kuti chilamulo cha Mose na basa zake chenze chidaleka kuphata basa. Ndawa ya vimwevi Paulo adaphatisa basa chitsanzo cha Abulahamu. Kuti akhale wobvumizika na kukhala olungama kwa Yahova vimbathembalini ‘basa zomwe chilamulo chimbafuna’ koma chikhulupiriro. Vimwevi ni vokomedza maninge kwa isepano ndawa vichatipfunzisa kuti tikakhala na chikhulupiriro kwa Mulungu na kwa Yesu Khrisitu, isepano tidzakhale obvumizika kwa Mulungu ndipo tidzawonewe olungama.
Yakobo adafotokozera Akhrisitu kuti achadekana kuwonesa chikhulupiriro na ‘basa’ zake mwa kuchita vabwino na kukonda ose munjira yolingana (Onani ndime 11-12)c
11. Ni khaindi iponi ya ‘basa’ zomwe Yakobo ambanena?
11 Mwanjira inango ‘basa’ zomwe Yakobo adanena pa msolo 2 ni ‘basalini zomwe chilamulo chimbafuna’ zomwe Paulo adanena. Yakobo ambanena va basa yomwe Akhrisitu achadekana kuchita ntsiku na ntsiku. Ni basa mwezi zomwe zichawonesa kuti Mkhrisitu anachikhulupiriro chaicho kwa Mulungu panango neye. Naboni tiwone vitsanzo viwiri vomwe Yakobo adaphatisa basa.
12. Ko Yakobo adafotokoza tani nkhani ya kubverana komwe kulipo pakati pa chikhulupiriro na basa? (Onani pomwe foto.)
12 Muchitsanzo choyamba, Yakobo adafotokoza kuti Mkhrisitu achadekana kukonda ose munjira yolingana. Iye adaphatisa basa chitsanzo cha munthu yemwe ambakonda maninge munthu wolemera koma ambanyoza munthu wosauka. Yakobo adafotokoza kuti munthu moule ambadzinena kuti anachikhulupiriro koma vomwe abachita vimbasiyana na vomwe ambanena. (Yak. 2:1-5, 9) Chitsanzo chachiwiri, Yakobo adanena va ‘m’bale panango mulongo yemwe alibe vovala na vakudya vokwana,’ koma munthu yemwe anavo neye kumuthandiza. Munthu moyu podiya anene kuti anachikhulupiriro koma vochita vake viwonesa kuti iye alibe chikhulupiriro. Viri ninge Yakobo ankunena kuti: ‘Chikhulupiriro chomwe chilibe basa zake ni chakufa.’—Yak. 2:14-17.
13. Ko ni chitsanzo chiponi chomwe Yakobo adaphatisa basa chowonesa kuti tinkudekana kukhala na chikhulupiriro na basa zake? (Yakobo 2:25, 26)
13 Yakobo adafotokoza va Rahabi kuti ni chitsanzo chabwino cha chikhulupiriro chomwe chidawonesewa na basa zake. (Werengani Yakobo 2:25, 26.) Rahabi wenze adabva va Yahova ndipo ambadziwa kuti iye ankuthandiza Aizirayeli. (Yos. 2:9-11) Ndipomwapa iye adawonesa chikhulupiriro chake mwa basa zake pakuteteza azondi awiri wa Aizirayeli omwe moyo wawo wenze pa ngozi. Ndawa ya vimwevi, nkazi wochimwa moyu yemwe wenzelini Muyizirayeli adawonewa wolungama ninge momwe Yahova adawonera Abulahamu. Chitsanzo cha Rahabi chitipfunzisa kuti chikhulupiriro chathu chichadekana kuwonesewa na basa zake.
14. Ndawa chani tinganene kuti Paulo na Yakobo ambatsutsanalini?
14 Ndipomwapa Paulo na Yakobo ambafotokoza kubverana komwe kulipo pakati pa chikhulupiriro na basa koma mu njira zosiyana. Paulo ambauza Akhrisitu Wachiyuda kuti iwo angakwaniselini kukhala obvumizika kwa Yahova peno ankundochita basa zachilamulo cha Mose. Yakobo ambanena kuti Akhrisitu ose achadekana kuwonesa chikhulupiriro chawo pakuchita vinthu vabwino kwa anango.
Ko chikhulupiriro chanu chikulimbikisani kuphata basa zomwe zichakondweresa Yahova? (Onani ndime 15)
15. Ni mwanjira iponi momwe tingawonesere chikhulupiriro na vochita vathu? (Onani pomwe mafoto.)
15 Yahova ambatanthauzalini kuti tionewe olungama tichadekana kuchita ndendende vomwe Abulahamu adachita. Kunena shuwa pananjira zizinji zomwe tingawonesere kuti tinachikhulupiriro na basa zathu. Tikambatambira abale na alongo anyowani mu mpingu, kuthandiza omwe ankulimbana na mabvuto na kuchita vinthu vabwino kwa wanthu wa m’banja yathu. Imweyi ni khalidwe yomwe Yahova ayibvuma ndipo ayidalisa. (Aro. 15:7; 1 Tim. 5:4, 8; 1 Yoh. 3:18) Njira inango yabwino maninge yomwe tichawonesera chikhulupiriro chathu ni kulalikira mwakhama va ntontholo wabwino. (1 Tim. 4:16) Tose isepano tingawonese mwa vochita vathu kuti tinachikhulupiriro chakuti mapolomisi ya Yahova ni chaiyo ndipo vose vomwe iye achachita kwa isepano ni vabwino. Tikachita vimwevi tingakhale otsimikiza kuti Mulungu adzatione olungama ndipo tidzakhale azishamwali wake.
CHIDIKHIRO NI CHODEKANA KUTI TIKHALE NA CHIKHULUPIRIRO
16. Ni chidikhiro chiponi chomwe Abulahamu wenze nacho chomwe chidamuthandiza kukhala na chikhulupiriro?
16 Msolo 4 wa Aroma ufotokoza chinthu chinango chomwe tingapfunzire kwa Abulahamu, chomwe ni kufunika kwa chidikhiro. Yahova adapolomisa kuti ndawa ya kukhulupirika kwa Abulahamu ‘makhaindi yose’ yadzadalisiwe. Ganizirani momwe Abulahamu adakhalira wokondwa pomwe adabva vimwevi! (Gen. 12:3; 15:5; 17:4; Aro. 4:17) Koma nthawe idapita, Abulahamu wenze na magole 100 ndipo Sara wenze na magole 90 akalibe mwana. M’maganizo mwa wanthu venze vosakwanisika kuti Abulahamu na Sara akhale na mwana. Ndipo chimwechi chenze chiyeso kwa Abulahamu. ‘Koma ndawa ya chidikhiro iye adakhala na chikhulupiriro chakuti adzakhale baba wa makhaindi yazinji.’ (Aro. 4:18, 19) Pakumalizira mwana yemwe ambamudikhira adabadwa, ndipo Abulahamu adakhala baba wa Isaki.—Aro. 4:20-22.
17. Ko tinkudziwa tani kuti tingawonewe olungama na Mulungu na kukhala azishamwali wake?
17 Ninge momwe tawonera isepano tingakhale obvumizika kwa Yahova na kuonewa olungama ninge Abulahamu. Shuwadi, Paulo adafotokoza vizinji va nkhani mweyi pomwe adati: ‘Mawu mwaya yalibe kunemberewa Abulahamu yekha, koma ‘yadanemberewapomwe isepano’ omwe tidzawonewe teneuyu ndawa tikhulupirira iye yemwe adamukisiwa, Yesu.’ (Aro. 4:23, 24) Ndipomwapa ninge Abulahamu, isepano tichadekana kukhala na chikhulupiriro cholimba na basa zake komasoti chidikhiro. Paulo adapitiriza kunena va chidikhiro chathu pa Aroma msolo 5, ndipo ni vimwevi vomwe tidzawone mu pfunziro yomwe inkubwera.
NYIMBO NA. 28 Tikhale pa Ubwenzi ndi Yehova
a Isepano tinkufuna kukhala obvumizika kwa Yahova na kuwonewa olungama na iye. Mobverana na vomwe Paulo na Yakobo adanemba m’makalata yawo, tiwone kuti ndawa chani tichadekana kukhala na chikhulupiriro na basa zake peno tinkufuna kukhala obvumizika kwa Yahova.
b MAWU YOFOTOKOZERA MAFOTO: Paulo adafotokozera Akhrisitu Wachiyuda kuti tichadekana kukhala na chikhulupiriro osati ‘basa zomwe chilamulo chimbafuna,’ ninge kuphatisa basa usalu wa girini pa chovala, kukondwerera pasika na kusamba mwamwambo.
c MAWU YOFOTOKOZERA FOTO: Yakobo adalimbikisa abale kuwonesa chikhulupiriro pa basa zawo zabwino na kuthandiza osauka.