MSOLO 28
Wonesani kutembeja pa vomwe Yahova na Yesu adakuchitirani
Ko imwepo muchabva tani shamwali wanu akakupasani mphaso yabwino maninge? Mosakaika, vichakuchitisani imwepo kukhala wokondwa. Ndipo muchakhala na shungu yakufuna kuwonesa shamwali wanu kuti munkutembeja mphaso yomwe wakupasani. Yahova na Yesu adatipasa mphaso ikulu maninge yomwe tingaitambire. Ko mphaso yake ni iponi? Ndipo tingawonese tani kuti ndise wotembeja ndawa ya mphaso mweyi?
1. Ko ni njira ibodzi iponi yatingawonesere kutembeja pa vomwe Mulungu na Khrisitu adatichitira?
Baibolo ichapolomisa kuti: ‘Aliyese wowonesa chikhulupiriro mwa [Yesu]’ angakhale nawo moyo wosapera. (Yohane 3:16) Ko kuwonesa chikhulupiriro kuchatanthauza chani? Kuchatanthauza vizinji osati kundokhulupirira chabe mwa Yesu? Tichadekana pomwe kuwonesa chikhulupiriro pa vomwe tichasalula na vomwe tichachita. (Yakobo 2:17) Tikambawonesa chikhulupiriro chathu pa vomwe tichayankhula na vomwe tichachita, tichalimbisa ushamwali wathu mwa Yesu na Ababa wake Yahova.—Lewengani Yohane 14:21.
2. Ko ni chochitika chapadera chiponi chomwe chichatithandiza isepano kuwonesa kutembeja kwathu pa vomwe Yahova na Yesu adachita?
Usiku iye akanati wafa, Yesu adauza ateweri wake va njira inango yomwe angawonesere kutembeja pa ntsembe yake. Iye adayambisa mwayi wapadera womwe Baibolo ichachemera kuti ‘chakudya chamaulo cha Ambuya’ chomwe chichadziwika kuti chikumbuso cha impfa ya Yesu. (1 Akorinto 11:20) Yesu adayambisa mwambo moyu kuti atumi wake na Akhrisitu chaiwo wose adakabwera patsogolo pawo ambakumbukire kuti adapereka moyo wake ndawa ya ise. Mobvera na vimwevi, Yesu adalamula kuti: ‘Pitirizani kuchita vimwevi pakunikumbukira.’ (Luka 22:19) Imwepo mukambagumanika pa Chikumbuso, muchawonesa kuti munkutembeja pa chikondi chikulu chomwe Yahova na Yesu anacho kwa ise.
PFUNZIRANI VIZINJI
Wonani njira zinango zoingizira zomwe mungawonesere kutembeja pa chikondi chikulu chomwe Yahova na Yesu adawonesa. Wonani kudikana kokumbukira impfa ya Khrisitu.
3. Kutembeja kuchatichitisa kuti tichitepo kanthu
Ganizirani kuti munthu munango wakupulumusani ku impfa. Ko imwepo mungaebwe mwakankulumize pa vomwe munthu ule wakuchitirani? Panango mungawonese njira zinango zowonesa kuti iye adziwe kuti ndimwe wotembeja pa vomwe wakuchitirani?
Isepano moyo wathu uchathemba Yahova. Lewengani 1 Yohane 4:8-10, ndipo patsogolo pake kambiranani mibvunzo aya:
Ndawa chani ntsembe ya Yesu ni mphaso yapadera?
Ko imwepo muchabva tani pa vomwe Yahova na Yesu adakuchitirani?
Ko tingawonese tani kutembeja pa vomwe Yahova na Yesu adachita kwa ise? Lewengani 2 Akorinto 5:15 na 1 Yohane 4:11; 5:3. Mukamaliza kulewenga lemba iliyose, kambiranani mbvunzo uyu:
Mobverana na lemba mweyi, ko tingachite chani chowonesa kuti ndise wotembeja?
4. Tewedzerani Yesu
Njira inango yamungawonesere kutembeja ni kutewedzera Yesu. Lewengani 1 Petulo 2:21, ndipo patsogolo pake kambiranani mbvunzo uyu:
Ko ni mwanjira iponi yamungawonesere kuti munkutewedza mapazi ya Yesu mosamala?
Yesu ambakonda Mawu ya Mulungu, ambalalikira va ntontholo wabwino na kuthandiza anango
5. Mbagumanikani pa chikumbuso chokumbukira impfa ya Khrisitu
Kuti muwone vomwe vidachitika pomwe adayamba mwambo moyu wokumbukira impfa ya Yesu m’maulo, lewengani Luka 22:14, 19, 20. Patsogolo pake kambiranani mibvunzo aya:
Ko nchani chidachitika pa chakudya cha m’maulo cha Ambuya?
Ko nkate na vinyu vichaimira chani?—Wonani vesi 19 na 20.
Yesu ambafuna kuti ateweri wake ambachite mwambo wokumbukira impfa yake kabodzi pagole. Ndawa ya vimwevi, Mboni za Yahova zichasonkhana pabodzi gole iliyose kuti zikumbukire impfa ya Khrisitu munjira yomwe iye adalamulira. Pfunzirani vizinji va kudikana kwa nsonkhano moyo, wonesani VIDIYO. Ndipo patsogolo pake kambiranani mbvunzo uyu.
Ko nchani chichachitika pakukumbukira impfa ya Yesu?
Nkate na vinyu ni vizindikiro chabe. Nkate uchaimira thupi yangwiro ya Yesu yomwe adaipereka ndawa ya ise. Ndipo vinyu uchaimira magazi yake
WANTHU ANANGO ACHATI: ‘Vomwe munthu achadekana kuchita kuti apulumusiwe ni kundokhulupirira Yesu.’
Ko imwepo mungaphatise basa tani Yohane 3:16 na Yakobo 2:17 pakuwonesa kuti pachadekana vizinji?
CHIGWATO
Tichawonesa kutembeja pa vomwe Yesu adatichitira mwa kuwonesa chikhulupiriro mwa iye na kugumanika pa Mwambo wokumbukira impfa yake.
Kubwerezera
Ko kuwonesa chikhulupiriro mwa Yesu kuchatanthauza chani?
Ko imwepo mungakonde kuwonesa tani kutembeja kwanu pa vomwe Yahova na Yesu adachita kwa imwepo?
Ndawa chani ni vodikana kugumanika pa mwambo wokumbukira impfa ya Khrisitu?
KUTI MUDZIWE VIZINJI
Ko impfa ya Khrisitu ichatilimbikisa kuchita chani?
Pfunzirani vizinji va chikhulupiriro na momwe tingachiwonesere.
‘Kuwonesa chikhulupiriro m’mapolomisi ya Yahova’ (Nsanja ya Olonda ya Outubro 2016)
Nkhani yakuti ‘Ninkudzibva kuti ndine wakuchena, nilibe nkhawa ndipo ndine wokhutira,’ wonani momwe kupfunzira va ntsembe ya Khrisitu kudakhudzira moyo wa m’mayi munango.
‘Baibolo ichachinja wanthu’ (Nsanja ya Olonda ya 1 Agosto, 2011)
Pfunzirani ndawa yake wanthu adikidiki achadya vizindikiro pa chikumbuso.