NKHANI YOPFUNZIRA 21
Ko bukhu ya Chivumbulutso ifotokoza kuti imwepo munatsogolo iponi?
‘Ame! Bwerani Ambuya Yesu.’—CHIV. 22:20.
NYIMBO NA. 142 Tigwire Mwamphamvu Chiyembekezo Chathu
VOMWE TIPFUNZIREa
1. Ko wanthu ankufunika kusankhula pankhani ikulu iponi?
WANTHU ntsiku zino achadekana kusalula pankhani ikulu maninge. Chiri kwa iwo kusalula kukhala kusaidi ya Mulungu wolamulira chilengedwe chose, panango kukhala kusaidi ya Satana Ndyerekezi yemwe ni mdani wa Mulungu. Ni vosakwanisika kukhala ulibe mbali. Vomwe iwo angasankhule vingachitise kuti adzatambire moyo wosapera panango neye. (Mat. 25:31-33, 46) Nkati mwa ‘chisautso chikulu,’ Mulungu adzasaine kuti peno awapulumuse panango kundowadzonga basi.—Chiv. 7:14; 14:9-11; Ezek. 9:4, 6.
2. (a) Ko lemba ya Aheberi 10:35-39 inkutilimbikisa kuchita chani? (b) Ko bukhu ya Chivumbulutso ingatithandize tani?
2 Lewengani Aheberi 10:35-39. Peno imwepo mungasankhule kukhala kusaidi ya utongi wa Yahova, ndiye kuti mwasalula bwino maninge. Viri teno ndawa yakuti imwepo manje ndimwe wokonzeka kuthandizambo anango kuti asankhule bwino. Kuti mukwanise kuwathandiza, mungachite bwino kuphatisa basa bukhu ya Chivumbulutso nkuwauza vomwe virimo. Bukhu yokomedza mweyi ifotokoza bwinobwino vomwe vidzachitikire wanthu wotsutsana na Yahova, koma itsindika pomwe kuti wanthu wokhulupirika kwa iye adzatambire madaliso yazinji. Tingachite bwino kumbapfunzira vinthu vimwevi vomwe vidzachitikedi. Kuchita vimwevi kungatithandize kuti tipitirize kukhala wokhulupirika kwa Yahova, kuphatisa basa vomwe tinkupfunzira na kuthandizambo anango kuti asankhule bwino.
3. Ko tikambirane chani munkhani ino?
3 Munkhani ino tikambirane mibvunzo aya: Ko wanthu omwe ali kumbali ya Ufumu wa Mulungu adzatambire madaliso yaponi? Ndipo nchani chati chidzachitikire wanthu wothandizira chilombo chifuwira chofotokozewa m’bukhu ya Chivumbulutso?
MADALISO YOMWE WANTHU WOKHULUPIRIKA ADZATAMBIRE
4. Ko mtumi Yohane adawona gulu iponi yomwe yenze na Yesu kudzulu?
4 Mtumi Yohane adawona m’masomphenya magulu yawiri ya atumiki wokhulupirika wa Mulungu ndipo ankupasiwa moyo wosapera. Gulu yoyamba ni ya wa 144 000. (Chiv. 7:4) Iwo ankutengewa pano padziko yapasi kuti akakhale na Yesu kudzulu ndipo adzatongere pabodzi dziko yapasi. (Chiv. 5:9, 10; 14:3, 4) Yohane ankuwawona m’masomphenya ali pabodzi na Yesu pa Phiri ya Ziyoni.—Chiv. 14:1.
5. Ko manjemanjepa nchani chomwe chichitikire wodzozewa omwe adakali moyo padziko pano?
5 Kundochokera munthawe ya atumi, wanthu azinji akhala ankusankhiwa kuti akhale mu gulu ya wa 144 000. (Luka 12:32; Aro. 8:17) Koma mtumi Yohane adauziwa kuti ni wodzozewa ang’onong’ono omwe adzakhale adakali moyo padziko pano muntsiku zomalizira. Wodzozewa mwawa ‘omwe adakali pano padziko yapasi,’ adzatambire ‘chidindo’ chomalizira chowonesa kuti Yahova wawabvuma ndipo adzabule pa chisautso chikulu. (Chiv. 7:2, 3; 12:17) Nkati mwa chisautso chikulu, wodzozewa omwe adzakhale adakali padziko pano adzatengewe kuti akakhale na anzawo wa 144 000 omwe adafa ali okhulupirika. Iwo adzatongere pabodzi na Yesu mu Ufumu wa Mulungu.—Mat. 24:31; Chiv. 5:9, 10.
6-7. (a) Ko patsogolo pake Yohane adawona gulu iponi, ndipo tinkupfunzira chani kwa iwo? (b) Ndawa chani wa ‘gulu ikulu’ na wodzozewa omwe adakali padziko pano achadekana kukomedzewa na Chivumbulutso msolo 7?
6 Yohane padamaliza kuwona gulu ya kudzulu, adawona pomwe gulu ikulu. Mosiyana na gulu ya 144 000, gulu mweyi ni yosawerengeka. (Chiv. 7:9, 10) Ko tinkupfunzira chani kwa iwo? Yohane adauziwa kuti: ‘Amwawa ni wale omwe abula pa chisautso chikulu ndipo awatcha mikanjo yawo na kuyachenesa m’magazi ya Mwanawankhosa.’ (Chiv. 7:14) Akandodzabula pachisautso chikulu, wanthu wa ‘mugulu ikulu’ mweyi adzakhale pano padziko yapasi ndipo adzakondwe na madaliso yazinji.—Sal. 37:9-11, 27-29; Miy. 2:21, 22; Chiv. 7:16, 17.
7 Peno tidasankhuliwa kuti tidzayende kudzulu panango kudzakhala pano padziko yapasi, ko tinkukwanisa kudziwonambo pafoto mweyi ya Chivumbulutso msolo 7? Tichadekana kumbadziwona kuti tilimo. Imweyi idzakhale nthawe yokomedza maninge kwa magulu yose mwaya ya atumiki wa Yahova. Tidzakondwe kuwona kuti tidachita bwino kukhala kusaidi ya Yahova. Ko bukhu ya Chivumbulutso inkutiuza pomwe chani pankhani ya chisautso chikulu?—Mat. 24:21.
VOMWE VIDZACHITIKIRE WANTHU WOTSUTSANA NA MULUNGU
8. Ko chisautso chikulu chidzayambe tani, ndipo wanthu adzachite tani?
8 Munkhani yapita tidapfunzira kuti manjemanje maboma yandale ya dziko ino yadzacheneke Babulo Nkulu, yemwe ni chimake cha kupemphera konama padziko yose. (Chiv. 17:16, 17) Vimwevi vidzachitise kuti chisautso chikulu chidzayambe. Ko vimwevi vidzathandize kuti wanthu ayambe kutumikira Yahova? Neye. M’malo mwakuti iwo achite vimwevi, bukhu ya Chivumbulutso msolo 6 inkulewa kuti panthawe yoshupa mweyi, wanthu wosatumikira Yahova adzathembe wandale na wamalonda omwe ankulinganiziwa na mapiri kuti adzawathandize. Pakuti wanthu mwawa adzakhale kuti alibe kusalula kukhala kusaidi ya Ufumu wake, Yahova adzawawone kuti ni wotsutsa.—Luka 11:23; Chiv. 6:15-17.
9. Ko atumiki wa Yahova adzasiyane tani na wanthu anango nkati mwa chisautso chikulu, ndipo nchani chomwe chidzawachitikire?
9 Atumiki wa Yahova adzachite vinthu vosiyana maninge na wanthu anango nkati mwa chisautso chikulu. Iwo ndiwo wokha omwe adzapitirize kutumikira Mulungu pano padziko yapasi na kulamba kuthandizira ‘chilombo.’ (Chiv. 13:14-17) Kutsimikiza kwawo kutumikira Yahova kudzachitise kuti wanthu ayambe kuwazonda. Ndipo vidzachitise pomwe kuti magulu ya wanthu yayambe kuukira atumiki wa Mulungu padziko yose. Ulosi wenze udalewa kale kuti kuukira kumoku kudzakhale kwa Gogi wa Magogi.—Ezek. 38:14-16.
10. Ko lemba ya Chivumbulutso 19:19-21, inkuwonesa kuti Yahova adzateteze tani wanthu wake?
10 Manje Yahova adzachite chani atumiki wake akadzayamba kuukiriwa? Iye ankutiuza kuti: ‘Ukali wangu udzabule.’ (Ezek. 38:18, 21-23) Msolo 19 wa Chivumbulutso unkutifotokozera vati vidzachitike patsogolo pake. Yahova adzatumize Mwana wake kuti ateteze wana wake na kudzonga adani wake. Yesu pabodzi na ‘masocha yake’ ya 144 000 adzathandizane pakucheneka adani mwawa. (Chiv. 17:14; 19:11-15) Ko nkhondo mweyi idzabwerese phindu iponi? Idzathandize kuti adani wose wa Yahova achenekewe.—Lewengani Chivumbulutso 19:19-21.
IKANDODZAMALA NKHONDO, ADZACHITIKE UKWATI
11. Ko bukhu ya Chivumbulutso inkufotokoza kuti nchani chomwe chidzatikondwerese maninge?
11 Ndoganizani momwe atumiki wokhulupirika adzabvere kuwona kuti adani wa Mulungu adzongewa koma iwo apulumusiwa. Imwiyi idzakhale nthawe yokomedza maninge! Ni shuwadi kuti kudzongewa kwa Babulo Nkulu kudzachitise kuti tidzakondwe. Koma pali pomwe chinthu chinango chomwe chidzatikondwerese maninge. (Chiv. 19:1-3) Bukhu ya Chivumbulutso inkufotokoza kuti chinthu chimwechi chidzakhale ‘ukwati wa Mwanawankhosa.’—Chiv. 19:6-9.
12. Mobverana na Chivumbulutso 21:1, 2, ko ukwati wa Mwanawankhosa udzachitike nthawe yanyi?
12 Ko ukwati moyu udzachitike nthawe yanyi? Wa 144 000 adzatengewe nkuyenda kudzulu nkhondo ya Arumagedo ikanati kuchitika. Koma sikuti ukwati wa Mwanawankhosa udzachitikiretu panthawe mweyi. (Lewengani Chivumbulutso 21:1, 2.) Ukwati wa Mwanawankhosa udzachitike Arumagedo ikadzamala nkuchosa pomwe adani wa Mulungu padziko yose yapasi.—Sal. 45:3, 4, 13-17.
13. Ko omwe adzachite ukwati moyu adzaphindule tani?
13 Ko omwe adzachite ukwati moyu adzaphindule tani? Ninge mwaviriri kuti ukwati uchitisa kuti mwamuna na nkazi wake akhale obvana maninge, ukwati wa Mwanawankhosa udzachitise kuti Yesu abvane maninge na wa 144 000 omwe ali ninge ‘nkwatibwi’ kwa iye. Ukwati moyu udzakwanirise makonzedwe yotonga dziko yapasi kwa magole 1000.—Chiv. 20:6.
THAUNDI YA ULEMELERO NA TSOGOLO YANU
Msolo 21 wa bukhu ya Chivumbulutso unkufotokoza va kamadzi ‘kochokera kwa Mulungu.’ Nkati mwa magole 1000, kamadzi mwaka kadzabwerese madaliso yazinji kwa wanthu wobvera (Onani ndime 14-16)
14-15. Ko wa 144 000 ankulinganiziwa na chani mu msolo 21 wa Chivumbulutso? (Onani foto ya pakhava.)
14 Patsogolo pake, msolo 21 wa Chivumbulutso unkulinganiza wa 144 000 na thaundi yokhuza yochemerewa kuti ‘Yerusalemu Unyowani.’ (Chiv. 21:2, 9) Maziko ya thaundi mweyi yakonzewa na minyala 12 yonembapo ‘madzina 12 ya atumi wa Mwanawankhosa.’ Ndawa chani vimwevi vinkumukomedza maninge Yohane? Ndawa yakuti iye ankuwonambo dzina yake ili nembewe paminyala mwaya. Umoyu wenze mwayi ukulu maninge kwa iye.—Chiv. 21:10-14; Aef. 2:20.
15 Thaundi mweyi ni yosiyana maninge na mathaundi yanango. Kumoku kunamisewu yagolide, misuwo yokwana 12 yokonzewa na minyala yodula, vipupa vokonzewa na minyala yabwino ndipo vose ni vopimiwa bwino maninge. (Chiv. 21:15-21) Koma Yohane ankuwona kuti pali chinthu chinkushota. Iye ankutifotokozera kuti: ‘Nilibe kuwonako kachisi kumoku, ndawa yakuti Yahova Mulungu Wamphanvu zose na Mwanawankhosa ndiwo kachisi wake. Ndipo thaundi mweyi ifunikalini dzuwa kuti ivunike ndawa ulemelero wa Mulungu na wa Mwanawankhosa unkuvunika kale.’ (Chiv. 21:22, 23) Wanthu wokhala mu Yerusalemu Unyowani moyu ali pabodzi na Yahova. (Aheb. 7:27; Chiv. 22:3, 4) Viri teno ndawa yakuti Yahova na Mwana wake Yesu ndiwo kachisi wa thaundi mweyi.
Ko ni mbani womwe adzaphindule na madaliso yomwe yali ninge ‘kamadzi’ na ‘miti’? (Onani ndime 16-17)
16. Ko wanthu adzaphindule tani nkati mwa magole 1000 ya Ufumu wa Mulungu?
16 Ni vabwino maninge kuti wodzozewa ambaiganizire thaundi mweyi. Olo omwe adzakhale padziko yapasi angachite bwino kumbaiganizirambo. Viri teno ndawa yakuti nkati mwa magole 1000, Yerusalemu Unyowani udzabwerese madaliso yazinji kwa wanthu wokhala padziko yapasi. Yohane adawona madaliso mwaya yankuyerera ninge ‘kamadzi ka madzi ya moyo.’ Ndipo mbali zose za kamadzi mwaka ‘zinamiti yamoyo’ yobala vipaso ‘vopolesa makhaindi yose ya wanthu.’ (Chiv. 22:1, 2) Panthawe mweyo, wanthu wose adzaphindule na madaliso mwaya. Pang’ono na pang’ono, Yahova adzathandize wanthu wobvera kuti akhale pomwe wangwiro. Kudzakhale kulibe matenda, kuwawiwa panango kulira.—Chiv. 21:3-5.
17. Mobverana na Chivumbulutso 20:11-13, ni mbani yemwe adzaphindule na madaliso ya nkati mwa magole 1000?
17 Ko ni mbani wati adzaphindule na madaliso mwaya? Wanthu woyamba kuphindula nayo ni wale womwe adzapulumuke pa Arumagedo pabodzi na wana wawo womwe adzabadwe mudziko inyowani. Koma bukhu ya Chivumbulutso msolo 20 inkupolomisa pomwe kuti wanthu womwe adamwalira adzamukisiwe. (Lewengani Chivumbulutso 20:11-13.) Wanthu ‘wolungama’ omwe adafa ali wokhulupirika na ‘wosalungama’ omwe adaferamo osakhala na mwayi wodziwa Yahova, adzamukisiwe kuti adzakhale pano padziko yapasi. (Mac. 24:15; Yoh. 5:28, 29) Ko vimwevi vinkutanthauza kuti wanthu wose ali m’manda adzamukisiwe nkati mwa magole 1000 ya Ufumu wa Mulungu? Neye. Wale omwe adalamba kutumikira Yahova akanati kufa adzamukisiwelini. Viri teno ndawa enze nawo mwayi wochinja koma adachita kusaina kuti ankufunalini kudzakhala na moyo mparadaiso padziko yapasi.—Mat. 25:46; 2 Ates. 1:9; Chiv. 17:8; 20:15.
CHIYESO CHOMALIZIRA
18. Ko moyo udzakhale tani pakudzamala kwa magole 1000?
18 Pakudzamala kwa magole 1000, wanthu wose wokhala padziko yapasi adzakhale wangwiro. Palibe pomwe wati adzabonere na mabvuto yobwera ndawa ya uchimo wa Adamu. (Aro. 5:12) Mabvuto yose yomwe Adamu adayambisa yadzachosewe. Vimwevi vidzachitise kuti pakudzamala kwa magole 1000 mwaya wanthu wose ‘adzakhale na moyo’ wangwiro.—Chiv. 20:5.
19. Ndawa chani padzakhale chiyeso chomalizira?
19 Tinkudziwa kuti Yesu adakhala wokhulupirika kwa Mulungu podiya kuti Satana ambamuyesa. Koma ko wanthu wochimwa ise tingakwanisembo kukhala okhulupirika kwa Mulungu podiya kuti Satana ankutibweresera mayesero yazinji? Yakadzamala magole 1000 Satana nkuchosewa kuphompho, aliyese afunika kudzawonesa yekha kuti ni wokhulupirika kwa Yahova. (Chiv. 20:7) Wanthu omwe adzakhale wokhulupirika pachiyeso chimwechi chomalizira, adzapasiwe moyo wosapera na ufulu uzinji. (Aro. 8:21) Koma wanthu womwe adzapanduke adzachenekewe pabodzi na Satana.—Chiv. 20:8-10.
20. Ko munkubva tani mukaganizira maulosi yabwino ya m’bukhu ya Chivumbulutso?
20 Ko imwepo munkubva tani na vomwe takambirana m’bukhu ya Chivumbulutso? Ko munkukwanisa kuwona momwe mudzabvere yakadzakwanirisika maulosi mwaya? Ko vinkukupasanilini mphanvu yochemererambo anango kuti ayambe kutumikira Yahova? (Chiv. 22:17) Manje pakuti takambirana vinthu vabwino vomwe vidzachitike kutsogolo, ndise wokondwa ndipo tingalewembo ninge Yohane yemwe adati: ‘Ame! Bwerani Ambuya Yesu.’—Chiv. 22:20.
NYIMBO NA. 27 Ulemelero wa Ana a Mulungu Udzaonekera
[Mawu ya m’nyantsi]
a Ino ni nkhani yomalizira pa ndandanda ya nkhani zofotokoza bukhu ya Chivumbulutso. Munkhani ino tiwone kuti wanthu wokhulupirika kwa Yahova anatsogolo yabwino, koma wanthu wotsutsana na utongi wake adzachenekewe mochitisa manyazi.