Ko Munkukumbukira?

Ko imwepo mudawerenga mosamala Ntsanja za ulonda za gole ino? Peno nteno, yesani kudawira mibvunzo aya:

Ko tingaphindule tani tikambamala nthawe tinkuyankhula na Yahova, kumubvesera na kuganizira va iye?

Tingasankhule vochita mwanzeru, kupfunzisa bwino wanthu ndipo tiyamba kukonda maninge Yahova.—w22.01, tsa. 30-31.

Ni phindu iponi yatingagumane tikambathemba Yahova na omwe ankumuimira?

Ino ndiyo nthawe yofunika kumbakhulupirira maninge kuti Yahova achita bwino vinthu. Tingachite vimwevi mwa kupewa kunyozera makonzedwe ya akulu. Tikachita teno, chikadzayamba chisautso chikulu tidzakwanise kubvera malangizo ya akulu podiya yawoneke ninge yosabveka.—w22.02, tsa. 4-6.

Ndawa chani mngelo adauza Zekariya va ‘chingwe cha m’misiri womanga nyumba mudjanja ya Zerubabele’? (Zek. 4:8-10)

Masomphenya mwaya yadatsimikizira atumiki wa Mulungu kuti kachisi adzamaliziwe kumangiwa ndipo udzakhale wobverana na mpfundo za Yahova.—w22.03, tsa. 16-17.

Ko tingakhale tani ‘chitsanzo chabwino . . . mu kayankhulidwe’? (1 Tim. 4:12)

Timbayankhule bwino na wanthu mu utumiki, timbaimbe na moyo wose, kupereka ndemanga nthawe zose pa misonkhano, kupewa kunama ndipo timbayankhule volimbikisa anzathu, osati kuwanyoza.—w22.04, tsa. 6-9.

Ndawa chani tingalewe kuti vilombo vinayi voimira mafumu votomolewa pa Danieli msolo 7 ni vibodzibodzi vomwe vinkutomolewa pa Chivumbulutso 13:1, 2?

Chilombo chotomolewa pa Chivumbulutso 13 chinkuimiralini boma ibodzi basi ninge ya Roma. Koma chinkuimira maboma yose yandale yomwe yankutonga padziko yapasi.—w22.05, tsa. 9.

Nchani chatingachite kuti tiwonese kuti tikhulupirira kuti Mulungu ni wachilungamo?

Munthu akatiyankhula kuipa panango kutichitira vinthu voipa, osati timbamusungire chakumoyo, koma timbasiye nkhani yose m’manja mwa Yahova. Iye ndiye yekha yemwe adzamalise mabvuto yose yoyambisiwa na uchimo.—w22.06, tsa. 10-11.

Ko m’bale yemwe ankupereka pemphero pamisonkhano ambakumbukire chani?

Ambadziwe kuti nthawe ya pemphero ni nthawelini yopereka malangizo kumpingu panango kuchita vilengezo. Makamaka ikakhala pemphero yofungulira misonkhano, afunikalini kuyankhula ‘mawu yazinji.’ (Mat. 6:7)—w22.07, tsa. 24-25.

Ko lemba ya Yohane 5:29 inkutanthauza chani ikambati ‘omwe adachita voipa adzamukisiwe kuti aweruziwe’?

Sikuti adzaphewe panango kuwaimba mulandu ndawa ya voipa vadachita kalekale. Akadzati amukisiwa, adzapfunzisiwe ndipo vomwe adzachite patsogolo pake ndivo vati vidzachitise kuti apitirize kukhala na moyo panango neye.—w22.09, tsa. 18.

Ko J. F. Rutherford adawalimbikisa chani abale na alongo pansonkhano womwe udachitika mu Setembro 1922?

Pa nsonkhano womwe udachitika ku Cedar Point, Ohio, EUA, iye adalewa kuti: “Ufumu unkutonga ndipo imwepo ndimwe nzika zake. Ndipomwapa, lengezani, lengezani, lengezani va Mpfumu na Ufumu wake!”—w22.10, tsa. 3-5.

Ko lemba ya Yesaya msolo 30 inkufotokoza njira zitatu ziponi zomwe Mulungu achatithandizira kuti tipirire?

Msolo moyu ufotokoza kuti (1) iye abvesera mapemphero yathu, (2) atitsogolera, ndipo (3) atidalisa manjeuno ndipo adzatidalise pomwe kutsogolo.—w22.11, tsa. 9.

Ndawa chani tingalewe kuti mawu ya pa Salimo 37:10, 11, 29 yadakwanirisika kalekale ndipo yadzakwanirisike pomwe kutsogolo?

Vomwe Davide adanemba vidakwanirisikiradi Aizirayeli panthawe yomwe Solomo ambatonga. Koma Yesu pangafotokoza va Paradaiso wa kutsogolo, adaphata pomwe mawu ya mu vesi 11. (Mat. 5:5; Luka 23:43)—w22.12, tsa. 8-10, 14.