Adamu na Hava alibe kubvera Mulungu

Ntsiku inango Hava ali yekha, nyoka idabwera nkuyamba kuyankhula naye. Idamubvunza kuti: ‘Ko ni shuwadi kuti Mulungu adakulambizani kuti ayi kudya vipaso va m’muti uliwose m’munda momu?’ Hava adadawira kuti: ‘Neye adandotilambiza vipaso va muti ubodzi wokha, ndipo adati tikadzadya vipatso mwivo tidzafe.’ Manje nyoka mwiyo idalewa kuti: ‘Imwepo mudzafelini ndipo mukadya vipaso mwevi mudzalingane na Mulungu.’ Ko vimwevi venze chaivo? Neye, yenze bodza. Koma Hava adakhulupirira vomwe nyoka mweyo idanena. Padayamba kunyang’anisisa vipaso ivo adayamba kuvisirira, manje adatyola chipaso cha m’muti moyu nkudya, patsogolo pake adapasambo Adamu. Adamu ambadziwa kuti akaleka kubvera Mulungu adzafe. Koma iyembo adadya.

Maulo ya ntsiku mwiyo, Yahova adayankhula na Adamu na Hava. Adawabvunza ndawa chani alibe kumubvera, Hava adalewa kuti nyoka ni yomwe yamuchitisa ndipo Adamu adalewa kuti Hava ni yemwe adamuchitisa. Ndawa ya kusabvera kwawo moku, Yahova adawathamangisa m’munda wa Edeni. Kuti ayi kuti abwereremo pomwe ndipo Yahova adaikha angelo komasoti chibemba chongaka moto pamalo yongenela m’munda mumo.

Yahova adalewa kuti nyoka nayombo idzalangiwe. Koma yenzelini nyoka chaiyo yomwe imbayankhula na Hava. Ndawa Yahova alibe kulenga nyoka kuti zimbayankhule. Ndipomwapa mngelo woipa ni yemwe adachitisa kuti nyoka iyankhule, adachita vimwevi pakufuna kunamiza Hava. Mngelo moyu ni Satana Ndyerekezi. Kutsogolo Yohova adzamudzonge, kuti ayi kuti ambanamize pomwe wanthu.