Adamu na Hava padathamangisiwa m’munda wa Edeni, adakhala na wana azinji. Mwana wawo woyamba wenze Kaini ndipo wachiwiri wenze Abele. Kaini wenze mulimi, koma Abele wenze nyakabusa.

Ntsiku inango, Kaini na Abele adapereka ntsembe kwa Yahova. Ko unkudziwa kuti ntsembe ni chani? Ni mphaso yapadera. Yahova adakondwa na ntsembe ya Abele, koma alibe kukondwa na ntsembe ya Kaini ndipo Kaini adakalipa maninge. Yahova adamuuza kuti afunikalini kukalipa maninge ndawa yakuti angachite chinthu choipa koma Kaini alibe kubvera.

Manje, Kaini adauza Abele kuti: ‘Nabo kumunda.’ Ali kumunda muko, adayamba kumumenya m’bale wake mpakana kumupha. Ko Yahova adachita tani? Adamulanga Kaini pakumuthamangisira kutali ndipo alibe kukwanisa pomwe kubwerera kwawo.

Ko tinkupfunzira chani pa nkhani mweyi? Nthawe zinango tingakwinyilire vikakhala kuti vinthu viribe kufamba momwe isepano tinkufunira. Koma tikaona kuti tayamba kukalipa maninge, panango anango akatipasa malangizo, tifunikalini kupitiriza kukhala na ukali kugopera kuti tingayambe kuchita vinthu voipa.

Pakuti Abele ambakonda maninge Yahova komasoti ambachita vinthu vabwino, Yahova adzamuyebwelini adzamumukise kuti adzakhale pomwe na moyo mu paradaiso.

Kuyenda kwa nthawe, wanthu adawanda padziko yapasi, koma azinji ambachita vinthu voipa. Olo angelo anango enzepomwe woipa, iwo adachoka kudzulu nkubwera padziko yapasi. Ko unkudziwa ndawa yake angelo mwawa adachitira vimwevi? Ambafuna kuti akhale na mathupi ninge ya wanthu, na cholinga chakuti adzalowole akazi padziko yapasi.

Angelo mwawa padalowola akazi mwawo, adabereka wana. Wana mwawo enze ataliatali komasoti wamphanvu maninge ndipo ambaboneresa wanthu anango. Yahova alibe kubvuma kuti vimwevi vipitirize, manje adaganiza vobweresa chigumula panango kuti chinvula champhanvu kuti chidzonge wanthu woipa mwawo.

Koma penze munthu munango yemwe ambachitalini vinthu voipa ndipo ambakonda maninge Yahova dzina yake wenze Nowa. Iye wenze na nkazi na wana amuna atatu ndipo madzina yawo enze Semu, Hamu na Yafeti. Ndipo wose mwawa enze olowola. Yahova adauza Nowa kuti akonze chingalawa kuti iye na banja yake adzapulumukiremo. Chingalawa mwicho chimbawoneka ninge chibokosi chikulu chomwe chingakwanise kuyangalala pa madzi. Yahova adauzapomwe Nowa kuti angenese vinyama vizinji n’chingalawa mumo kuti nazombo zidzapulumuke.

Nthawe mwiyo, Nowa adayamba kukhoma chingalawa ndipo iye na banja yake adaphata basa mweyi kwamagole 50. Pakukonza chingalawa mwicho adatewedza malangizo yose ya Yahova. Pa nthawe mwiyo, Nowa ambachenjeza pomwe wanthu kuti kunkubwera chigumula, koma palibe yemwe adabvera.

Patsogolo pake, idafika nthawe yakuti angene mu chingalawa mumo. Mu msolo unkubwera tidzawone vomwe vidachitika.