Wanthu 8 ndiwo adapulumuka

Nowa na banja yake, adangena mu chingalawa pabodzi na vinyama, pamwapo Yahova adafunga msuwo ndipo nvula idayamba kugwa. Nvula mwiyo yenze izinji ndipo chingalawa chidayamba kuyangalala. Patsogolo pake, madzi yadamiza dziko yose yapasi ndipo wanthu omwe enzelini m’chigalawa mumo adafa. Koma Nowa na banja yake adapulumuka ndipo iwo adakondwa maninge pakudziwa kuti adabvera Yahova.

Nvula mwiyo idagwa kwa ntsiku 40 usiku na masikati. Patsogolo pake, idaleka kugwa ndipo madzi yadayamba kuphwira. Manje chingalawa mwicho chidaima paphiri koma padziko yapasi penze pakali madzi yazinji. Ndipo Nowa na banja yake adapitiriza kukhala mu chingalawa mumo.

Madzi mwayo yambaphwira pang’onopang’ono. Nowa na banja yake adakhala mu chingalawa mumo nthawe ikulu yoposha gole. Patsogolo pake, Yahova adawauza kuti abule ndipo venze ninge kuti ankungena mu dziko inyowani. Iwo adatembeja maninge Yahova ndawa yowapulumusa ndipo adapereka ntsembe.

Yahova adakondwa maninge na ntsembe mweyi ndipo adapolomisa kuti adzaphatiselini pomwe basa chigumula podzonga vinthu padziko yapasi. Pakutsimikizira vimwevi, adachitisa kuti kudzulu kuoneke chitawaleza. Ko iwepo udachiwonako kale chitawaleza?

Patsogolo pake, Yahova adauza Nowa na banja yake kuti abeleke wana nkudzadza dziko yapasi.