5 “Iu bae tekem best flour and beikem lo 12-fala raon bred wea garem hol lo midol. Iu mas mekem each bred from tu kilo* blo best flour. 6 Iu bae hipimap olketa bred hia lo tufala set, sixfala lo each set,+ antap lo datfala tebol wea olketa mekem from pure gold, front lo Jehovah.+ 7 Iu mas putim pure frankincense* antap each set, and datwan bae olsem bred for wanfala token offering*+ for Jehovah wea fire bonem. 8 Lo evri Sabbath day, hem mas evritaem arrangem datfala bred front lo Jehovah.+ Datwan hem wanfala covenant wea stap for olowe wea mi mekem witim olketa Israelite. 9 Datfala bred hem for Aaron and olketa son blo hem,+ and olketa bae kaikaim bred hia lo holy ples+ bikos hem samting wea barava holy, and hem blo priest from olketa offering for Jehovah wea fire bonem. Diswan hem wanfala law wea stap for olowe.”