16 “Lo datfala taem mi givim disfala instruction lo olketa judge blo iufala, ‘Taem iufala deal witim eni case between pipol blo iufala, iufala mas judgem case hia followim justice,+ nomata sapos case hia hem between tufala Israelite, or between wanfala Israelite and wanfala foreigner wea stap witim iufala.+ 17 Iufala mas no fevarem eniwan taem iufala judge.+ Iufala mas lisin lo man nating olsem hao iufala lisin lo man wea garem bignem.+ Iufala mas no fraetem eniwan+ bikos iufala representim God taem iufala judge.+ And sapos eni case hem hard tumas for iufala, iufala mas tekem kam lo mi, and bae mi nao deal witim datwan.’+