Isaiah
27 Lo datfala day, Jehovah bae tekem big, sharp, and strongfala sword blo hem,+
And tane go lo Leviathan,* datfala snek wea muv kwiktaem,
Lo Leviathan, datfala snek wea savve twistim body blo hem,
And hem bae killim dae bigfala animal hia wea stap lo sea.
2 Lo datfala day iufala singsing for hem:*
“Wanfala grape planteison wea garem staka grape for mekem wine!+
3 Mi Jehovah, mi nao lukaftarem hem.+
Evritaem mi watarem hem.+
Mi protectim hem lo naet and lo day,
Mekem no eniwan savve kam for spoelem hem.+
Hu nao bae kam witim olketa smol tree wea garem nila, and olketa rabis grass for againstim mi lo taem blo faet?
Bae mi stepim olketa and bonem olketa evriwan lo fire.
5 Sapos nomoa, letem hem hol strong lo sef ples blo mi.
Letem hem kam mek peace witim mi,
And peace nao hem kam for mekem witim mi.”
6 Lo olketa day wea kam Jacob bae grow and garem rut,
Israel bae garem flaoa and niu sut,+
And olketa bae fulimap land hia lo staka kaikai.+
7 Waswe, fitim for olketa whipim nogud lo hem olsem?
Or hao, fitim for olketa killim hem dae olsem pipol blo hem wea olketa dae lo faet?
8 Iu bae tok strong lo hem olsem iu raoa witim hem taem iu sendem hem go.
Bae iu aotem hem lo day wea east wind hem blow, from iu barava kros.+
9 So from diswan, iu bae forgivim sin blo Jacob,+
And diswan nao wanem bae happen taem iu tekem aot sin blo hem:
Hem bae mekem evri ston lo altar
For olsem olketa white chalk wea pisis gogo asis nomoa stap,
And olketa post for worship* or olketa incense stand bae no stap.+
10 Bikos datfala strong taon bae hem stap emti,
Olketa ples wea animal kaikai lo hem bae olketa lusim and stap nating nomoa olsem wilderness.+
Young buluka bae kaikai and leidaon lo there
And bae finisim olketa branch blo hem.+
11 Taem olketa niu branch blo hem kamap drae,
Olketa woman bae kam and brekem aot olketa,
For mekem fire lo olketa.
Bikos pipol hia no savve minim samting.+
Dastawe Man wea Wakem olketa bae no showim mercy lo olketa,
And Man wea formim olketa bae no kaen lo olketa.+
12 Iufala pipol blo Israel, lo datfala day, Jehovah bae aotem frut from datfala River* wea ran go kasem Valley* lo Egypt,+ and hem bae hipimap each wan lo iufala.+ 13 Lo datfala day, olketa bae blowim wanfala big horn,+ and olketa wea distroe lo land blo Assyria+ and olketa wea stap olobaot lo land blo Egypt,+ bae kam and baodaon lo Jehovah lo datfala holy maunten lo Jerusalem.+