Isaiah
6 Lo year wea King Uzziah hem dae,+ mi lukim Jehovah sidaon lo wanfala throne wea barava hae,+ and botom haf lo kaleko blo hem fulimap temple. 2 Olketa seraph stap raonem hem, each seraph garem sixfala wing. Each wan kavarem feis witim tufala wing, and kavarem leg witim nara tufala wing, and nara tufala wing for flae.
3 And each wan singaot go lo narawan and sei:
“Holy, holy, holy, Jehovah, komanda blo olketa army.+
Full earth hem fulap lo glory blo hem.”
4 And saond blo singaot hia* mekem frame lo olketa door hem seksek, and smoke fulap lo datfala haos.+
5 Then mi sei: “Sorre tumas lo mi!
Mi barava no fit for laef,
Bikos mi man wea toktok blo mi no klin,
And mi stap witim pipol wea toktok blo olketa no klin.+
Bikos mi lukim finis King, Jehovah, komanda blo olketa army!”
6 Then wanfala seraph flae kam lo mi, and hem iusim tongs for holem wanfala chakol wea laet+ wea hem tekem kam from altar.+ 7 Hem tasim mouth blo mi and sei:
“Lukim! Diswan hem tasim lips blo iu finis.
Iu no guilty nao,
And God forgivim finis sin blo iu.”
8 Then mi herem voice blo Jehovah hem sei: “Hu nao bae mi sendem, and hu nao bae go for iumi?”+ And mi sei: “Mi lo hia! Sendem mi!”+
9 And hem sei, “Iu go and sei lo pipol hia:
‘Bae iufala herem staka taem,
Bat bae iufala nating minim.
Bae iufala lukim staka taem,
Bat bae iufala nating savve lo eni samting.’+
10 Mekem heart blo pipol hia for sat,+
Mekem ear blo olketa for no lisin,+
And satem tufala eye blo olketa,
Mekem olketa no savve lukluk witim eye blo olketa
And for herehere lo ear blo olketa,
Mekem heart blo olketa no minim samting
For mekem olketa no kam bak and kasem healing.”+
11 So mi sei: “O Jehovah, bae go kasem wat taem?” Then hem sei:
“Go kasem taem olketa taon distroe and no eniwan stap lo olketa
And no eniwan stap lo olketa haos
And land hem distroe and stap emti.+
12 Go kasem taem Jehovah muvim olketa man go farawe+
And emti area lo datfala land hem kamap big go moa.
13 “Bat smol namba* blo pipol bae still stap lo land hia, nomata olsem, bae hem bone olsem wanfala big tree and wanfala oak tree wea bihaen olketa katem daon, stump blo hem nomoa stap. Wanfala holy seed* bae kamap stump blo hem.”