Mek-tu Leta for Olketa Corinthians
10 Mi, Paul, mi laek for story lo iufala followim mildness* and kaeness blo Christ.+ Samfala lo iufala sei mi man wea wik taem mi stap witim iufala,+ and mi man for tok stret taem mi no stap witim iufala.+ 2 Mi hope dat taem mi arrive, olketa wea sei mifala followim tingting blo man olketa change finis, mekem mi no need for tok strong lo olketa. 3 Nomata laef blo mifala hem semsem olsem evri nara pipol, mifala no faet olsem pipol lo disfala world. 4 Bikos olketa weapon blo mifala for faet hem no blo disfala world,+ bat mifala iusim olketa paoaful weapon wea God givim+ lo mifala for distroem olketa samting wea strong olsem taoa. 5 Mifala distroem olketa idea and olketa praod tingting wea againstim knowledge blo God,+ and mifala kontrolem evri idea olsem wanfala prisoner mekem olketa savve obeyim Christ, 6 and mifala redi for panisim eniwan wea gohed for no obey,+ bat firstaem iufala mas pruvim dat iufala obey lo evri samting.
7 Iufala judgem samting followim wat iufala lukim nomoa. Sapos eniwan hem barava sure hem blo Christ, hem mas tingim moa disfala tru samting: Mifala tu blo Christ olsem hem. 8 Nomata mi lelebet ova tumas for tok praod abaotem paoa wea Lord givim lo mifala for strongim iufala and no for daonem iufala,+ bae mi no shame lo datwan. 9 Bikos mi no laek for mekem iufala tingse olketa leta wea mi raetem hem for mekem iufala fraet. 10 Bikos olketa sei: “Olketa toktok insaed olketa leta blo hem, hem deep and paoaful, bat sapos iu lukim hem, hem man wea wik nomoa and toktok blo hem iusles tu.” 11 Man wea talem kaen toktok olsem mas savve dat samting wea mifala raetem insaed leta blo mifala, bae mifala duim taem mifala arrive.+ 12 Mifala no laek for comparem mifala seleva witim olketa wea savve tok praod abaotem olketa seleva.+ Taem olketa markem olketa seleva witim olketa standard blo olketa seleva, and taem olketa comparem olketa seleva witim olketa seleva, datwan showim olketa no garem wei for minim samting.+
13 Bat mifala bae no tok praod abaotem olketa waka wea aotsaed lo territory wea mifala kasem assignment for duim, bat mifala bae tok praod abaotem olketa waka wea insaed lo territory wea mifala kasem assignment* from God for duim, and iufala tu insaed lo assignment hia.+ 14 For tok stret, mifala no ova baondri taem mifala kasem iufala, bikos mifala nao first wan for talemaot gud nius abaotem Christ+ lo iufala. 15 Mifala no tok praod abaotem olketa waka blo narawan wea hem aotsaed lo territory wea mifala kasem assignment for duim, bat mifala hope dat taem faith blo iufala gohed for kamap strong, waka wea mifala duim bae kamap big tu, insaed lo territory blo mifala. Then mifala savve duim staka nara waka moa 16 bikos mifala laek talemaot gud nius lo olketa nara kantri moa mekem mifala bae no tok praod abaotem olketa waka wea olketa narawan duim lo territory blo olketa. 17 “Bat man wea tok praod, hem mas tok praod abaotem Jehovah.”*+ 18 Bikos Jehovah* appruvim man wea hem recommendim,+ bat hem no appruvim man wea recommendim hemseleva.+