Deuteronomy

28 “And sapos iufala lisin lo voice blo Jehovah, God blo iufala, lo wei for obeyim evri komandment blo hem wea mi komandim lo iufala tuday, Jehovah, God blo iufala, bae mekem iufala hae winim evri nara nation lo earth.+ 2 Iufala bae kasem evri blessing hia gogo bae olketa winim iufala+ bikos iufala lisin lo voice blo Jehovah, God blo iufala:

3 “God bae blessim iufala lo taon blo iufala, and bae hem blessim iufala aotsaed lo taon blo iufala.+

4 “God bae blessim olketa pikinini* blo iufala,+ olketa garden blo iufala, olketa animal blo iufala, olketa young buluka and olketa young sheepsheep blo iufala.+

5 “God bae blessim basket blo iufala,+ and bowl blo iufala for pressim dough.+

6 “God bae blessim iufala taem iufala kam insaed, and hem bae blessim iufala taem iufala go aot.

7 “Jehovah bae mekem iufala winim olketa enemy blo iufala taem olketa againstim iufala.+ Olketa bae attakim iufala from wanfala direction, bat olketa bae ranawe from iufala lo sevenfala difren direction.+ 8 Jehovah bae blessim olketa stoahaos blo iufala+ and evri samting wea iufala duim, and hem bae blessim iufala lo land wea Jehovah, God blo iufala, hem givim lo iufala. 9 Jehovah bae mekem iufala kamap holy pipol blo hem,+ olsem hem promisim lo iufala+ bikos iufala gohed for obeyim olketa komandment blo Jehovah, God blo iufala, and wakabaot followim road wea hem markem. 10 Evri pipol lo earth mas lukim dat iufala garem nem+ blo Jehovah, and bae olketa fraetem iufala.+

11 “Jehovah bae blessim iufala for garem staka pikinini and staka animal and staka kaikai+ lo land wea Jehovah promisim lo olketa grandadi blo iufala for givim lo iufala.+ 12 Jehovah bae openem skae olsem wanfala man wea openem stoahaos blo hem wea fulap lo kaikai, for mekem rain foldaon lo land blo iufala lo season blo hem,+ and for blessim evri samting wea iufala duim. Staka nation bae kaon lo iufala bat iufala bae no need for kaon lo eniwan.+ 13 Sapos iufala gohed obeyim and followim olketa komandment blo Jehovah, God blo iufala, wea mi komandim lo iufala tuday, then Jehovah bae mekem iufala kamap hed and no kamap tail, and iufala bae garem hae position+ winim olketa narawan and no low position. 14 Iufala mas no go difren from evri toktok wea mi komandim lo iufala tuday, for go lo raet or go lo left.+ No wakabaot followim olketa narafala god or worshipim olketa.+

15 “Bat sapos iufala no laek lisin lo voice blo Jehovah, God blo iufala, and no obeyim evri komandment and evri law blo hem wea mi komandim lo iufala tuday, evri trabol hia bae kasem iufala gogo bae olketa winim iufala:+

16 “Trabol bae kasem iufala insaed lo taon blo iufala, and trabol bae kasem iufala aotsaed lo taon blo iufala.+

17 “Trabol bae kasem basket blo iufala,+ and bowl blo iufala for pressim dough.+

18 “Trabol bae kasem olketa pikinini* blo iufala,+ olketa garden blo iufala, and olketa young buluka and olketa young sheepsheep blo iufala.+

19 “Trabol bae kasem iufala taem iufala kam insaed, and trabol bae kasem iufala taem iufala go aot.

20 “Jehovah bae mekem trabol for kasem evri samting wea iufala trae for duim. Hem bae mekem iufala konfius and panisim iufala go kasem taem wea iufala bae finis bikos iufala duim olketa nogud samting and iufala lusim hem.*+ 21 Jehovah bae mekem iufala kasem nogud sik wea gohed for longtaem go kasem taem wea hem finisim iufala from land wea iufala bae onam.+ 22 Jehovah bae mekem iufala kasem sik tuberculosis, hae fever,+ fever from infection, hot,* olketa enemy bae attakim iufala,+ olketa kaikai wea iufala plantim bae hot wind spoelem and bae olketa garem disease.*+ Evri samting hia bae kasem iufala gogo iufala finis. 23 Skae blo iufala bae kamap copper, and earth blo iufala bae kamap iron.+ 24 Jehovah bae mekem asis and dust foldaon olsem rain from skae lo land blo iufala go kasem taem wea iufala finis. 25 Jehovah bae letem iufala for lus front lo olketa enemy blo iufala.+ Iufala bae attakim olketa from wanfala direction bat iufala bae ranawe from olketa lo sevenfala difren direction. Evri kingdom lo earth bae fraet fogud taem olketa lukim evri nogud samting wea happen lo iufala.+ 26 And dead body blo iufala bae kamap kaikai for evri bird lo skae and evri animal lo graon and no eniwan bae raosem olketa.+

27 “Jehovah bae mekem iufala kasem olketa boela wea kasem pipol lo Egypt, boela lo anus, rash, and skras lo skin. Bae evri sik hia no savve heal. 28 Jehovah bae mekem iufala karangge, blind,+ and konfius.* 29 Lo midolday iufala bae hol raon for faendem samting olsem wanfala blind man wea hol raon for faendem samting,+ and iufala bae no win lo eni samting wea iufala duim. Pipol bae evritaem trikim iufala and steal from iufala and no eniwan bae sevem iufala.+ 30 Iufala bae engage witim wanfala gele bat nara man bae reipim hem. Iufala bae buildim wanfala haos bat iufala bae no stap insaed.+ Iufala bae plantim grape planteison bat iufala bae no enjoyim frut blo hem.+ 31 Olketa bae busarem buluka blo iufala front lo eye blo iufala bat iufala bae no kaikaim eni part blo hem. Olketa bae stealim donkey blo iufala front lo iufala bat bae olketa no tekem kam bak lo iufala. Olketa enemy blo iufala bae tekem olketa sheepsheep blo iufala bat no eniwan bae helpem iufala. 32 Iufala bae lukim taem olketa bae givim olketa son and dota blo iufala lo nara pipol,+ and iufala bae evritaem laek for lukim olketa, bat hand blo iufala bae no garem paoa for duim eni samting. 33 Pipol wea iufala nating savve lo olketa bae kaikaim harvest blo iufala,+ and evri samting wea iufala mekem from wanem iufala harvestim, and pipol bae evritaem ravem iufala and treatim iufala nogud. 34 Evri samting wea eye blo iufala lukim bae mekem iufala feel nogud tumas.

35 “Jehovah bae mekem iufala kasem olketa boela wea soa tumas and no savve heal lo tufala knee and tufala leg blo iufala, start andanit lo foot blo iufala go kasem antap lo hed blo iufala. 36 Jehovah bae sendem iufala and king wea iufala markem for rulim iufala for go lo wanfala nation wea iufala and olketa grandadi blo iufala nating savve lo hem,+ and iufala bae worshipim olketa nara god lo there, olketa god wea pipol wakem from wood and ston.+ 37 Taem iufala kasem ples wea Jehovah sendem iufala go lo hem,+ olketa samting wea happen lo iufala bae mekem pipol seke fogud and bae olketa laf lo iufala* and bae olketa tok spoelem iufala.

38 “Iufala bae plantim staka seed lo garden, bat iufala bae harvestim lelebet+ kaikai nomoa bikos olketa locust* bae finisim garden blo iufala. 39 Iufala bae plantim and lukaftarem gud olketa grape planteison blo iufala, bat iufala bae no drinkim eni wine and no harvestim eni samting+ bikos worm bae kaikaim evriting hia. 40 Iufala bae garem olketa olive tree evriwea lo territory blo iufala, bat iufala bae nating oilim body blo iufala bikos olketa olive frut bae foldaon nating nomoa. 41 Iufala bae bornem olketa son and dota, bat olketa bae no stap witim iufala bikos pipol bae tekem olketa go olsem prisoner.+ 42 Barava staka insect* bae kaikaim evri tree blo iufala and evriting wea iufala plantim. 43 Foreigner wea stap witim iufala bae gohed for garem moa paoa, bat paoa wea iufala garem bae gogo daon. 44 Hem bae givim kaon lo iufala, bat iufala bae no givim kaon lo hem.+ Hem bae kamap hed, bat iufala bae kamap tail.+

45 “Evri trabol hia+ bae aftarem iufala, kasem iufala, and winim iufala, go kasem taem wea iufala finis+ bikos iufala nating lisin lo voice blo Jehovah, God blo iufala, and iufala nating obeyim olketa komandment and olketa law blo hem wea hem komandim lo iufala.+ 46 And evri samting hia bae kasem iufala and olketa pikinini blo iufala and bae olketa olsem wanfala saen and wanfala warning for olowe,+ 47 bikos taem iufala garem staka samting, heart blo iufala nating hapi for worshipim Jehovah, God blo iufala.+ 48 Jehovah bae sendem olketa enemy blo iufala for againstim iufala, and iufala bae waka for olketa+ taem iufala hangere,+ thirsty, no garem gud kaleko, and iufala short lo evri samting. Hem bae putim wanfala iron yoke* lo nek blo iufala go kasem taem wea hem finisim iufala.

49 “Jehovah bae sendem wanfala nation from farawe,+ from end blo earth for attakim iufala kwiktaem olsem wanfala eagle+ hem attakim animal wea hem laek kaikaim. Nation wea iufala bae no savve lo languis blo hem.+ 50 Nation wea hem raf and bae hem nating sorre lo man wea olo and olketa wea young.+ 51 Olketa bae kaikaim olketa pikinini blo olketa animal blo iufala, and evriting wea iufala plantim, go kasem taem iufala finis. Olketa bae no leavim eni grain, niu wine or oil, young buluka or sheepsheep for iufala, go kasem taem olketa distroem iufala.+ 52 Olketa bae raonem and attakim iufala and no letem iufala for kamaot from olketa taon* blo iufala lo evri ples lo land blo iufala, go kasem taem wea olketa hae and strongfala wall wea iufala trustim hem foldaon. Yes, bae olketa raonem and attakim iufala insaed evri taon lo evri ples lo land wea Jehovah, God blo iufala, hem givim lo iufala.+ 53 Then iufala bae kaikaim olketa pikinini* blo iufala seleva. Iufala bae kaikaim body blo olketa son and dota blo iufala+ wea Jehovah, God blo iufala, hem givim lo iufala bikos lo barava hard taem wea kasem iufala taem olketa enemy raonem and attakim taon blo iufala.

54 “Nomata man wea kaen tumas midolwan lo iufala bae hem nating sorre lo brata blo hem, or waef blo hem wea hem lovem tumas, or olketa pikinini blo hem wea stap yet, 55 and bikos olketa enemy raonem and attakim olketa taon blo iufala and iufala kasem hard taem from attak blo olketa, datfala man bae kaikaim olketa pikinini blo hem and nating sharem datwan witim eniwan.+ 56 And woman wea kaen tumas midolwan lo iufala wea no ting for putim foot blo hem lo graon bikos hem hae class woman+ bae hem nating sorre lo hasband blo hem wea hem lovem tumas or lo son blo hem or dota blo hem. 57 Nomata pikinini wea hem just bornem and placenta wea kamaot from bele blo hem bat hem bae no laek for sharem witim olketa. Hem bae kaikaim haed evri samting hia bikos olketa enemy wea raonem and attakim olketa taon blo iufala bae kosim barava hard taem, taem olketa attakim iufala.

58 “Sapos iufala no laek for followim evri toktok blo disfala Law wea stap insaed disfala buk,+ and iufala no fraet lo disfala nambawan nem+ wea fit for mekem man fraet, wea nem hia nao Jehovah,+ God blo iufala, 59 bae Jehovah mekem olketa barava nogud samting wea gohed for longtaem for kasem iufala and olketa pikinini blo iufala, and tu olketa nogud sik+ wea gohed for longtaem. 60 Hem bae mekem iufala kasem evri sik blo olketa lo Egypt wea iufala savve fraetem bifor, and bae iufala no gud bak from olketa sik hia. 61 And Jehovah bae mekem iufala kasem tu evri sik and nogud samting wea olketa no raet abaotem insaed disfala buk blo Law, go kasem taem wea iufala finis. 62 Nomata iufala kamap staka olsem olketa star lo skae,+ gogo tu-thri lo iufala nomoa bae stap+ bikos iufala nating lisin lo voice blo Jehovah, God blo iufala.

63 “And lo sem wei wea Jehovah hem hapi for mekem iufala garem staka samting and kamap staka, Jehovah bae hapi for distroem and finisim iufala. And hem bae aotem iufala from land wea iufala redi for onam.

64 “Jehovah bae mekem iufala go stap midolwan lo olketa nation, start lo wansaed blo earth go kasem narasaed blo earth,+ and taem iufala lo there iufala bae worshipim olketa god wea olketa wakem from wood and ston, wea iufala and olketa grandadi blo iufala nating savve lo olketa.+ 65 Iufala bae no stap lo peace midolwan lo olketa nation hia,+ and iufala bae no garem eni ples for foot blo iufala rest lo hem. And Jehovah bae mekem iufala garem heart wea wari,+ eye wea no lukluk gud, and iufala bae lus hope.+ 66 Laef blo iufala bae stap lo danger, and naet and day bae iufala fraet nomoa, and iufala bae no sure sapos iufala bae laef or nomoa. 67 From heart blo iufala bae wari fogud and bikos lo olketa samting wea eye blo iufala lukim, lo morning bae iufala sei, ‘Mi wish nomoa hem evening,’ and lo evening bae iufala sei, ‘Mi wish nomoa hem morning.’ 68 And Jehovah bae tekem iufala go bak moa lo Egypt lo ship, wea mi talem bae iufala no go bak lo there, and lo there bae iufala salem iufala seleva lo olketa enemy blo iufala for kamap slave blo olketa, bat no eniwan bae laek for peim iufala.”