Isaiah
50 Diswan nao wanem Jehovah hem talem:
“Wea nao divorce certificate+ blo mami blo iufala, wea mi bin sendem hem aot?
Or which wan lo olketa wea mi garem kaon lo hem nao mi salem iufala go lo hem?
Lukim! Bikos lo rong blo iufala seleva+ nao mi salem iufala,
And mi sendem mami blo iufala go, bikos lo sin blo iufala seleva.+
2 Then, why nao no eniwan lo hia taem mi kam?
Why nao no eniwan ansarem mi taem mi singaot?+
Hao, hand blo mi hem short for sevem iufala,
Or mi no garem paoa for rescuem iufala?+
Lukim! Mi draem ap sea witim kros blo mi.+
Mi mekem olketa river for olketa kamap desert.+
Olketa fish rotten bikos no eni wata,
And olketa dae bikos no eni wata for olketa drinkim.
3 Mi kavarem skae lo thik cloud,+
And mi mekem kaleko for sorre for kavarem olketa.”
4 Sovereign Lord Jehovah nao bin trainim tongue blo mi for toktok,+
Mekem mi savve hao for story lo* man wea taed witim gudfala toktok.+
Hem wekapem mi evri morning.
Hem openem ear blo mi for lisin olsem samwan wea redi for lane.+
Mi no tane go difren.+
6 Mi tanem go baksaed blo mi for olketa wea whipim mi
And cheeks blo mi for olketa wea pullim aot beard blo mi.
Mi no haedem feis blo mi from olketa samting wea mekem mi shame, and from olketa wea spit lo mi.+
7 Bat Sovereign Lord Jehovah bae helpem mi.+
Dastawe bae mi no shame bikos lo nogud samting wea kasem mi.
Dastawe mi strongim miseleva, olsem strongfala ston for feisim olketa,+
And mi savve pipol bae no mekem mi shame.
8 Man wea talemaot mi raeteous, hem stap klosap.
Kam iumi standap tugeta.*
Hu nao garem case againstim mi?
Letem hem kam lo mi.
9 Lukim! Sovereign Lord Jehovah bae helpem mi.
Hu nao bae talemaot dat mi guilty?
Lukim! Evriwan lo olketa bae olsem wanfala kaleko wea hem old nao.
Wanfala moth bae kaikaim olketa gogo olketa finis.
10 Hu lo iufala nao fraet lo Jehovah
And savve lisin lo voice blo servant blo hem?+
Hu nao wakabaot lo ples wea barava dark, ples wea no eni laet hem stap?
Hem mas putim trust blo hem lo nem blo Jehovah, and barava depend lo God blo hem.
11 “Lukim! Iufala evriwan wea laetem wanfala fire,
Iufala wea mekem olketa sismol fire flae olobaot,
Iufala wakabaot lo laet wea kam from fire blo iufala,
Midolwan lo olketa sismol fire wea iufala mekem for laet big.
Diswan nao wanem iufala bae kasem from hand blo mi:
Iufala bae leidaon witim bigfala pain.