First Chronicles

15 And hem gohed wakem olketa haos for hemseleva lo Taon blo David, and hem redyim wanfala ples for datfala Ark blo datfala tru God, and hem standapim wanfala tent for hem.+ 2 Then David sei: “Olketa Levite nomoa shud karem datfala Ark blo datfala tru God, and no eniwan moa, bikos Jehovah bin chusim olketa for karem datfala Ark blo Jehovah and for waka for hem for olowe.”+ 3 Then David kolem evriwan lo Israel for kam lo Jerusalem, for tekem Ark blo Jehovah go ap lo ples wea hem redyim for hem.+

4 David kolem kam olketa lo famili laen blo Aaron+ and olketa Levite.+ 5 From laen blo Kohath, hem Uriel wea hem leader, witim 120 lo olketa brata blo hem. 6 From laen blo Merari, hem Asaiah+ wea hem leader, witim 220 lo olketa brata blo hem. 7 From laen blo Gershom, hem Joel+ wea hem leader, witim 130 lo olketa brata blo hem. 8 From famili laen blo Elizaphan,+ hem Shemaiah wea hem leader, witim 200 lo olketa brata blo hem. 9 From famili laen blo Hebron, hem Eliel wea hem leader, witim 80 lo olketa brata blo hem. 10 From famili laen blo Uzziel,+ hem Amminadab wea hem leader, witim 112 lo olketa brata blo hem. 11 And tu, David kolem kam tufala priest hia, Zadok+ and Abiathar+ and olketa Levite hia, Uriel, Asaiah, Joel, Shemaiah, Eliel, and Amminadab, 12 and hem sei lo olketa: “Iufala nao hed lo olketa famili laen* lo tribe blo Levi. Iufala mekem iufala kamap holy, iufala and olketa brata blo iufala, and tekem Ark blo Jehovah, God blo Israel go ap lo ples wea mi redyim for hem. 13 From iufala no karem datfala ark lastaem,+ God blo iumi, Jehovah hem kros tumas lo iumi,+ bikos iumi no faendemaot tingting blo hem lo hao for karem datfala ark.”+ 14 So olketa priest and olketa Levite mekem olketa seleva kamap holy, for olketa tekem go ap Ark blo Jehovah wea hem God blo Israel.

15 Then olketa Levite karem datfala Ark blo datfala tru God lo tufala stik+ antap lo shoulder blo olketa, followim komand wea Jehovah bin talem lo Moses. 16 Then David talem olketa leader blo olketa Levite for appointim olketa brata blo olketa wea savve singsing for singsing big, witim olketa instrument for pleim music, olsem olketa string instrument, olketa harp,+ and olketa cymbal.+

17 So olketa Levite appointim Heman+ son blo Joel, and from olketa brata blo hem, Asaph+ son blo Berechiah, and from olketa brata blo olketa lo laen blo Merari, olketa appointim Ethan+ son blo Kushaiah. 18 And witim olketa hia, hem olketa nara brata blo olketa lo mek-tu grup.+ Olketa nao Zechariah, Ben, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, and Mikneiah, witim Obed-edom and Jeiel wea olketa security gard lo gate. 19 Olketa man for singsing hem Heman,+ Asaph,+ and Ethan, olketa pleim cymbal wea olketa wakem lo copper.+ 20 And Zechariah, Aziel, Shemiramoth, Jehiel, Unni, Eliab, Maaseiah, and Benaiah olketa pleim olketa string instrument followim tune blo Alamoth.*+ 21 And Mattithiah,+ Eliphelehu, Mikneiah, Obed-edom, Jeiel, and Azaziah olketa pleim olketa harp for followim tune blo Sheminith*+ for leadim olketa wea pleim music. 22 Chenaniah+ wea hem leader blo olketa Levite, hem nao lukaftarem waka for karem datfala ark, bikos hem savve tumas, 23 and Berechiah witim Elkanah, tufala gaedem datfala Ark. 24 Olketa priest hia Shebaniah, Joshaphat, Nethanel, Amasai, Zechariah, Benaiah, and Eliezer, waka blo olketa hem for blowim big olketa trumpet front lo Ark blo datfala tru God,+ and Obed-edom witim Jehiah tu waka blo tufala hem for gaedem datfala Ark.

25 Then David and olketa elder lo Israel and olketa leader blo wan thousand man, olketa wakabaot go ap for tekem kam ark blo covenant blo Jehovah from haos blo Obed-edom,+ and olketa hapi tumas.+ 26 From datfala tru God helpem olketa Levite wea karem datfala ark blo covenant blo Jehovah, olketa sakrifaesim sevenfala young bull and sevenfala man sheepsheep.+ 27 David witim evri Levite wea karem Ark, olketa for singsing, and Chenaniah wea lukaftarem waka for karem ark and olketa for singsing, olketa evriwan werem coat wea no garem sleeve wea olketa wakem lo gud quality material. And David werem tu ephod*+ wea olketa wakem lo linen kaleko. 28 Evri Israelite singaot from olketa hapi tumas,+ taem olketa tekem go ap ark blo covenant blo Jehovah. Olketa blowim olketa horn, olketa trumpet,+ witim saond blo olketa cymbal, olketa pleim laod olketa string instrument and olketa harp.+

29 Bat taem olketa tekem kam ark blo covenant blo Jehovah insaed Taon blo David,+ Michal+ dota blo Saul luk go daon from window and hem lukim King David jampjamp and hem celebrate, and hem start for ting daonem David lo heart blo hem.+