Isaiah
39 Lo datfala taem, king blo Babylon, Merodach-baladan son blo Baladan, hem sendem olketa leta and wanfala present go lo Hezekiah,+ bikos hem herem dat Hezekiah bin sik and hem gud bak nao.+ 2 Hezekiah hapi for welkamim* olketa and showim lo olketa haos wea hem keepim olketa riches blo hem,+ olketa silver, olketa gold, balsam* oil, and olketa nara spesol oil, and ples wea hem keepim olketa weapon blo hem for faet, and evriting lo ples wea hem keepim olketa riches blo hem. Hezekiah showim lo olketa evriting lo haos* blo hem, and lo kingdom blo hem.
3 Bihaen datwan, profet Isaiah kam lo King Hezekiah and askem hem: “Wat nao olketa man hia kam talem, and wea nao olketa kam from?” So Hezekiah sei: “Olketa kam from wanfala farawe ples, wea hem Babylon.”+ 4 Then hem ask moa: “Wat nao olketa lukim lo haos* blo iu?” Hezekiah sei: “Olketa lukim evriting lo haos* blo mi. Mi showim evriting lo haos for keepim olketa riches blo mi, mi no haedem eni samting from olketa.”
5 So Isaiah sei lo Hezekiah: “Herem kam toktok blo Jehovah, komanda blo olketa army, 6 ‘Lukim! Taem bae kam wea evriting insaed haos* blo iu, and evri samting wea olketa grandadi blo iu bin hipimap kam kasem tuday bae olketa tekem go lo Babylon. No eniting bae stap,’+ Jehovah hem talem.+ 7 ‘And samfala lo olketa son blo iu wea bae born kam lo iu bae olketa tekem, and bae olketa kamap olketa hae official lo palace blo king blo Babylon.’”+
8 So Hezekiah sei lo Isaiah: “Toktok blo Jehovah wea iu talem lo mi hem stret.” Then hem sei moa: “Bikos, bae peace hem stap and evriting bae no olobaot lo taem* wea mi laef yet.”+