Psalm
For director. Blo David, wea olsem wanfala reminder.*
70 O God, iu sevem mi.
O Jehovah, kwiktaem for helpem mi.+
2 Olketa wea lukaotem mi for killim mi dae
Bae olketa mas shame and pipol ting daonem olketa.
Olketa wea hapi taem mi kasem trabol
Olketa nao mas ranawe bikos olketa shame.
3 Olketa wea gohed for sei: “Hem nao ia! Hem nao ia!”
Olketa bae shame and ranawe.
4 Bat olketa wea laek savve lo iu
Mas feel gud and hapi lo iu.+
Olketa wea laekem tumas wanem iu duim for sevem pipol, bae evritaem sei:
“God nao mas kasem bignem!”