Isaiah
46 Bel hem baodaon,+ Nebo hem bend go daon.
Olketa putim olketa idol hia antap lo olketa animal, olketa animal wea karem hevi samting,+
Olsem olketa hevi basket antap olketa animal wea taed finis.
2 Olketa bend go daon and baodaon semtaem.
Olketa no savve rescuem olketa hevi samting hia,*
And olketa seleva tu go prisoner.
3 “Lisin lo mi, iufala lo laen* blo Jacob, and iufala pipol* blo Israel wea stap yet,+
Iufala wea mi sapotim start taem iufala born, and lukaftarem taem iufala lo bele yet.+
4 Go kasem taem iufala olo, bae mi no change.+
Go kasem taem iufala gray hair, mi bae gohed for lukaftarem iufala.
Olsem mi bin duim, bae mi karem iufala and lukaftarem iufala and rescuem iufala.+
5 Hu nao bae iufala markem mi witim, or mekem mi olsem hem or comparem mi witim,+
Mekem mitufala shud semsem?+
6 Samfala pipol olketa aotem staka gold from paos blo olketa.
Olketa weighim silver lo scale.
Olketa haerem wanfala man wea savve wakem samting lo metal, and hem mekem for kamap wanfala god.+
Then olketa baodaon lo hem, ia, olketa worshipim.*+
7 Olketa liftim antap lo shoulder blo olketa.+
Olketa karem and putim lo ples wea olketa markem for hem, and hem standap lo there.
Hem no muv from ples wea hem stap.+
Olketa krae go lo hem, bat hem no ansarem olketa.
Hem no savve sevem eniwan wea kasem trabol.+
8 Tingim olketa samting hia, and iufala mas no fraet.
Putim lo heart blo iufala, iufala wea duim sin.
9 Tingim olketa samting wea happen lo bifor* kam,
Hao mi nao God, and no eni narawan hem stap.
Mi nao God, and no eni narawan stap wea olsem mi.+
10 From bifor kam yet mi talemaot finis samting wea bae kamaot,
And from longtaem kam finis olketa samting wea no happen yet.+
11 Mi kolem kam wanfala big bird from ples wea sun kamap,*+
From wanfala farawe ples wanfala man for followim disison* blo mi.+
Mi talem finis, and bae mi mekem for hem happen.
Mi planim finis, and mi tu bae mi duim.+
12 Lisin lo mi, iufala wea heart blo iufala hem strong,
Iufala wea go farawe from olketa samting wea raeteous.
13 Mi mekem finis raeteous fasin blo mi for kam klosap.
Hem no farawe,
And bae mi no delay for sevem pipol.+
Mi bae sevem Zion, and givim naes samting blo mi for Israel.”+