Deuteronomy

16 “Lo month blo Abib,* iufala mas no forget for celebratem Pasova for Jehovah, God blo iufala,+ bikos lo month blo Abib, Jehovah, God blo iufala, hem tekem iufala kamaot from Egypt lo naet.+ 2 And iufala mas busarem Pasova offering for Jehovah, God blo iufala,+ from olketa sheepsheep and olketa buluka blo iufala,+ lo ples wea Jehovah chusim for nem blo hem stap.+ 3 Bihaen, iufala bae kaikaim datfala animal witim bred wea no garem yeast. Bihaen datwan, iufala mas no kaikaim eniting wea garem yeast+ for sevenfala day. Iufala mas kaikaim nomoa bred wea no garem yeast, olsem iufala duim taem iufala kwiktaem lusim land lo Egypt.+ Taem iufala duim datwan, bae iufala no forgetim hard taem wea kasem iufala. And bae iufala evritaem tingim hao God sevem iufala from land lo Egypt.+ 4 Iufala mas aotem eni yeast* from full territory blo iufala for sevenfala day,+ and no eni meat blo datfala animal wea iufala bae offerim lo evening mas stap go kasem next morning.+ 5 Iufala mas no sakrifaesim Pasova offering lo eni nara taon wea Jehovah, God blo iufala, hem givim lo iufala. 6 Bat iufala mas duim datwan lo ples wea Jehovah, God blo iufala, hem chusim for nem blo hem stap. Iufala mas sakrifaesim datfala Pasova offering lo evening lo semtaem wea sun go daon,+ olsem hem happen lo day wea iufala lusim Egypt. 7 Iufala mas roastim and kaikaim datwan+ lo ples wea Jehovah, God blo iufala, hem chusim,+ and lo morning iufala savve go bak lo olketa tent blo iufala. 8 Iufala mas kaikaim bred wea no garem yeast for sixfala day, and lo mek-seven day iufala mas celebratem wanfala holy assembly for Jehovah, God blo iufala. Iufala mas no duim eni waka.+

9 “Iufala mas kaontem sevenfala week. Iufala mas start kaontem sevenfala week start lo taem wea iufala start for harvestim grain lo field blo iufala.+ 10 Then iufala mas celebratem Festival blo Olketa Week for Jehovah, God blo iufala,+ taem iufala tekem kam voluntary offering,* fitim hao Jehovah, God blo iufala, hem blessim iufala.+ 11 And iufala mas hapi front lo Jehovah, God blo iufala, iufala and olketa son, olketa dota, olketa man slave, olketa woman slave, olketa Levite wea stap insaed olketa taon* blo iufala, olketa foreigner wea stap witim iufala, pikinini wea no garem dadi,* and olketa widow wea stap witim iufala, lo ples wea Jehovah, God blo iufala, hem chusim for nem blo hem stap.+ 12 No forget dat iufala slave lo Egypt bifor,+ and iufala mas barava obeyim olketa law hia.

13 “Iufala mas celebratem Festival blo Olketa Smol Leaf Haos*+ for sevenfala day taem iufala hipimap evri seed from ples for aotem grain from skin blo hem, and oil from ples for smasem olive frut and wine from ples for smasem olketa grape. 14 Iufala mas hapi taem iufala celebratem festival hia,+ iufala and olketa son, olketa dota, olketa man slave, olketa woman slave, olketa Levite, olketa foreigner wea stap witim iufala, pikinini wea no garem dadi, and olketa widow wea stap insaed olketa taon blo iufala. 15 Iufala bae celebratem festival+ hia for sevenfala day for Jehovah, God blo iufala, lo ples wea Jehovah chusim bikos Jehovah, God blo iufala, bae blessim evri samting wea iufala bae harvestim and evri samting wea iufala duim,+ and iufala bae hapi fogud.+

16 “Diswan nao thrifala taem evri year, wea evri male blo iufala mas kam front lo Jehovah, God blo iufala, lo ples wea hem chusim: lo Festival blo Bred wea No Garem Yeast,+ Festival blo Olketa Week,+ and Festival blo Olketa Smol Leaf Haos.*+ No eniwan lo olketa mas kam emti hand front lo Jehovah. 17 Jehovah, God blo iufala, hem givim iufala staka blessing, dastawe each wan lo iufala shud givim hem staka samting tu.+

18 “Iufala mas appointim olketa judge+ and markem olketa officer for each tribe lo evri taon* wea Jehovah, God blo iufala, hem givim for iufala, and olketa mas followim justice taem olketa judgem pipol. 19 Iufala mas no judgem narawan lo wei wea no stret,+ no fevarem eniwan,+ and no acceptim bribe bikos bribe hem blindim eye blo olketa wea wise+ and tanem toktok blo raeteous judge. 20 Justice nao iufala mas followim+ mekem iufala gohed for laef and onam land wea Jehovah, God blo iufala, hem givim lo iufala.

21 “Iufala mas no plantim eni tree for olsem wanfala post for worship*+ klosap lo altar wea iufala mekem for Jehovah, God blo iufala.

22 “Iufala mas no standapim tu eni ston post for worship+ bikos Jehovah, God blo iufala, hem barava heitim datwan.