Exodus
24 Then Jehovah sei lo Moses: “Iu go ap lo maunten witim Aaron, Nadab, and Abihu,+ and 70-fala elder blo olketa Israelite, and iufala mas standap farawe lelebet and baodaon for worshipim mi. 2 Moses nomoa mas kam klosap lo mi, Jehovah. Bat olketa man hia mas no kam klosap, and evri nara pipol mas no kamap witim hem.”+
3 Then Moses kam and storyim lo pipol hia evri toktok and evri judicial disison* blo Jehovah,+ and evriwan agree and sei: “Mifala willing for duim evriting wea Jehovah talem.”+ 4 So Moses raetem evri toktok blo Jehovah.+ Then hem wekap lo early morning and buildim wanfala altar and standapim 12-fala ston post wea stand for 12-fala tribe blo Israel lo botom lo datfala maunten. 5 Bihaen, hem sendem samfala young man blo Israel and olketa sakrifaesim olketa burnt offering* and olketa sakrifaesim tu olketa bull olsem peace offering*+ for Jehovah. 6 Then Moses tekem datfala blood and putim haf insaed olketa bowl, and nara haf lo blood hia hem splasim lelebet lo altar. 7 Then Moses tekem datfala buk blo covenant* and hem readim big for pipol hia.+ And olketa sei: “Mifala willing for duim evriting wea Jehovah talem, and mifala bae obeyim hem.”+ 8 So Moses tekem datfala blood and splasim lelebet lo pipol+ hia and sei: “Diswan hem blood blo covenant* wea Jehovah mekem witim iufala followim evri toktok wea iufala agree lo hem.”+
9 Moses, Aaron, Nadab, Abihu, and 70-fala elder blo olketa Israelite nao go ap, 10 and olketa lukim God blo Israel.+ And andanit tufala foot blo hem, hem samting wea luk olsem floor wea olketa wakem lo sapphire ston and wea klia olsem skae.+ 11 Hem no panisim olketa leader blo olketa Israelite,+ and olketa lukim datfala tru God insaed wanfala vision taem olketa gohed kaikai and drink.
12 Then Jehovah sei lo Moses: “Iu kam ap lo mi lo maunten and stap lo there. Mi bae givim iu olketa ston tablet wea mi raetem olketa law and komandment for olketa followim.”+ 13 So Moses witim servant blo hem Joshua+ getap, and Moses go ap lo datfala maunten blo datfala tru God.+ 14 Bat hem sei lo olketa elder hia: “Iufala weitim mitufala lo hia go kasem taem mitufala kam bak.+ Aaron and Hur+ bae stap witim iufala. Sapos eni case kamap iufala savve go lukim tufala.”+ 15 Then Moses go ap lo top blo maunten hia wea cloud hem kavarem.+
16 Glory blo Jehovah+ gohed for stap lo Maunt Sinai,+ and cloud hia hem kavarem for six days. Lo mek-seven day God story kam lo Moses from datfala cloud. 17 Lo eye blo olketa Israelite, glory blo Jehovah hem luk olsem wanfala big fire lo top blo datfala maunten. 18 Then Moses go insaed datfala cloud and go ap lo top blo maunten hia.+ And Moses stap lo datfala maunten for 40 days and 40 naet.+