Fish wea Flae Long Deep Sea

OLKETA muv naes tumas midolwan olketa wata long coast and island bilong sea. Olketa stap long deep sea, nomata cold or hot lelebet, and long samfala lake and river tu. Wanem nao olketa hia? Olketa member bilong ray fish famili, fish bilong deep sea wea luk olsem olketa flae!

Iu no need for daeva long deep sea or go fishing for enjoyim naes lukluk bilong ray fish taem hem flae, and iu no need for insaed wata tu. Olsem Bart, wanfala marine biologist hem talem, olketa wea go long saedsea staka taem savve enjoy for lukim olketa ray fish wea garem wing flae aot from wata.

Staka handred kaen ray fish nao stap, wea size bilong olketa start from tu-thri centimeter go kasem tu-thri meter. Iu savve lukim wei wea hem semsem witim relative bilong hem shark. Egg bilong ray fish no olsem staka nara fish, hem grow insaed body bilong mami. Skates, wankaen ray fish, leim egg, bat olketa nara ray fish grow insaed body bilong mami and born kam olsem baby ray fish.

Stingray nao wankaen wea staka savve long hem, wea body bilong hem garem soft bon, witim fin long each saed start from hed go kasem end bilong tail. Samfala stingray sheip olsem diamond, samfala raon, and samfala olsem kite witim tail. Flat body bilong olketa mekem olketa muv isi insaed wata. Wei wea fin bilong olketa muv olsem wave givim olketa paoa for muv isi tumas insaed sea, wea olsem olketa flae. Taem olketa no swim, olketa leidaon haed long sand long botom sea.

Eye bilong olketa stingray stap antap hed bilong olketa and mouth bilong olketa stap andanit. Olketa garem strong teeth and mouth wea savve pisisim olketa shell. Dastawe hem enemy bilong oyster bed, from shellfish nao favorite kaikai bilong olketa. Man savve kaikaim stingray.

Disfala nem stingray kam from poison spine antap longfala tail bilong hem. Sapos man step antap, raf witim, or trae killim dae, tail bilong hem savve givim kill wea pain tumas and poison. Spine bilong olketa staka taem brek deep insaed garekil, wea mekem hem hard for aot and savve kosim bigfala infection sapos man no treatim gud. Sapos enitaem iu garekil from wanfala ray fish, wasim gud datfala garekil witim wata—nomata salt wata tu. Kwiktaem putim kill hia insaed barava hot wata. Hot wata hem killim dae poison and aotem pain. Then kwiktaem lukim doctor.

Nomata maet iu fraetem spine tail hia, stingray no min for killim man bat hem iusim tail sapos hem stap long danger nomoa. Bart, wea iumi storyim start long disfala article, faendem hao olketa stingray naes fogud taem hem and waef bilong hem swim witim olketa long wanfala area long Cayman Islands wea pipol savve feedim olketa. Hem sei: “Mifala nildaon long botom long wata wea 5 meter deep. Taem mifala start for feedim, olketa stingray hipap staka raonem mifala! Maet 30 or 40 stingray bilong evrikaen size nao raonem mifala. From olketa aftarem kaikai, olketa ray fish start long knee bilong mifala and kamap front long mifala and bak and ovarem hed bilong mifala, isisi swim witim mifala and tasim mifala for moa kaikai. Mifala sapraes long kwaetfala fasin bilong olketa naesfala animal hia. Olketa letem mifala rabem bele bilong olketa taem olketa swim antap mifala.” Bart sei olketa ray fish hia kamap kwaet tumas and olketa no attakim eniwan long full taem olketa pipol bin swim witim.

Olketa long iumi wea no savve daeva long deep sea savve lukim olketa ray fish long ples wea no deep or long wanfala glass pool raon long world. Staka glass pool stap wea man savve tasim olketa stingray, bat olketa aotem poison spine for safety reason. Ron Hardy, owner bilong Gulf World, long Panama City, Florida, hem sei: “Wanfala best example bilong paoa for showim olketa laef animal hem pool bilong mifala for tasim stingray. Pipol savve fraetem tumas olketa stingray bat iu shud lukim olketa change mind taem olketa lanem tru samting from mifala! Bihaen olketa tasim wanfala, olketa start for enjoyim lukluk and naesfala wei bilong ray fish. Samfala missim next show bilong dolphin from olketa laek stap witim stingray.”

Maet from distaem iu lanem samting abaotem olketa ray fish, fraet bilong iu katdaon. Bat remember, olketa savve haed insaed sand long botom long wata wea no deep. So taem iu wakabaot long kaen ples olsem, pusim leg insaed sand and sekem winim wei for liftim leg. Long disfala wei iu bae warnim olketa ray fish long kakam bilong iu and there nao no step antap long olketa and feelim pain bilong kill bilong disfala naesfala fish wea flae long deep sea.

[Piksa long page 16]

Stingray

[Piksa long page 16]

Pipol savve fraetem olketa stingray, bat tingting bilong olketa change taem olketa lanem tru samting

[Piksa long page 17]

Manta ray

[Credit Line]

© Francois Gohier/ Photo Researchers