Chewing Gum Bilong Distaem and Bifor
FROM MAN WEA RAET FOR WEKAP! LONG MEXICO
START KAM BIFOR pipol laekem wei for chewim gum. Pipol bilong Greece bifor savve chewim juice bilong mastic tree. Olketa Aztec chewim tzictli, or chicle, from datfala sapodilla tree. And olketa Native pipol bilong America long New England teachim pipol wea go stap long there hao for chewim juice bilong spruce tree. Long olketa first year bilong 1800, first chewing gum wea olketa mek bisnis long hem long United States hem kam from juice bilong spruce. Bihaen, wei for chewim paraffin wax wea olketa mekem swit hem kamap big.
Olketa sei kaen chewing gum wea iumi garem distaem hem kamap long last part bilong mek-19 century. Taem Santa Anna president bilong Mexico bifor, stap long prison long United States, olketa lukim hem chewim olketa pis chicle wea hem tekem kam witim hem from Mexico. Wanfala man long America wea savve wakem samting luksavve hao diswan hem samting wea planti pipol bae laekem sapos hem mekem swit and teist naes, so hem tekem kam chicle long United States for mekem chewing gum.
Chicle hem white juice wea kam from sapodilla, wanfala tree wea garem leaf olowe wea olketa kolem chewing gum tree. Hem tree wea grow long Gran Petén, tropical rain forest long north Guatemala, Belize, and long Yucatán Peninsula long Mexico. Insaed samfala area long there, winim seventi-faev sapodilla tree nao grow insaed wan acre. Long season bilong rain, olketa man for kolektem chicle, wea olketa kolem olketa chiclero, savve katem body bilong datfala sapodilla, diswan mekem juice for isisi ran kamaot and go insaed container wea olketa putim long botom bilong tree. Then olketa tekem diswan, boelem go kasem taem hem redy, and then divaedem long olketa blok for sellim. Nomata distaem olketa bisnis wea wakem chewing gum still iusim chicle—especially olketa chewing gum wea olketa sei hem natural—start kam long olketa year bilong 1940, United States planti taem iusim olketa synthetic product.
Why nao staka pipol laek for chewim gum? Planti chewim gum for mekem mouth smel gud and for keepim teeth klin bihaen olketa kaikai long ples wea bihaen hem bae hard for olketa brushim teeth.a Samfala narawan savve chewim gum for mekem olketa relax and for helpem olketa for tingting strong. Tru nao, from olketa luksavve hao wei for chewim gum savve katem daon wari and mekem man wekap, Army bilong U.S. savve givim chewing gum for olketa soldia taem olketa go faet insaed first and mek-tu world war, and distaem tu olketa savve putim witim olketa ration bilong olketa soldia taem olketa go faet. Samfala trak draeva faendem hao, for mekem olketa no sleep, wei for chewim gum hem winim wei for drinkim coffee. Pipol wea trae for lusim smoke faendem hao wei for chewim gum savve helpem olketa. Planti iusim tu olsem wei for stopem feeling for laek kaikai olowe—insaed each pis gum hem garem samting olsem tenfala calorie nomoa.
Bat, planti pipol no laekem wei for chewim gum. And samfala taem wei for chewim gum no showimaot respect. So sapos iu laekem disfala wei from bifor and distaem tu for chewim gum, iu mas iusim gudfala tingting.b
[Olketa Footnote]
a Taem man chewim gum hem savve mekem mouth healthy from hem mekem mouth garem moa spit, wea help for faet againstim acid wea spoelem teeth. Olketa Dentist sei sapos man laek for protectim teeth bilong hem for no rotten, hem shud iusim chewing gum wea no garem sugar.
b Warning: Mas no swallowim chewing gum, from hem savve blokem olketa ples insaed bele and nek. And tu, wei for chewim gum olowe savve mekem level bilong mercury kamap hae from metal insaed cement wea olketa putim long hol bilong teeth.
[Piksa long page 23]
Olketa Chiclero katem body bilong sapodilla tree
[Credit Line]
Copyright Fulvio Eccardi/vsual.com