LESON 6
Wanem Nao Hope for Man wea Dae Finis?
1. Wanem gud nius nao Bible talem abaotem man wea dae finis?
Taem Jesus arrive long Bethany wea klosap long Jerusalem, fren bilong hem Lazarus dae for fofala day finis. Jesus go long grev witim tufala sista bilong Lazarus, Martha and Mary. No longtaem nomoa, staka pipol hipap kam nao. Masbi Martha and Mary hapi tumas taem Jesus mekem Lazarus laef bak!—Readim John 11:21-24, 38-44.
Martha savve finis long gud nius wea olketa Holy Raeting storyim abaotem man wea dae finis. Hem savve long future Jehovah bae mekem olketa wea dae finis for laef bak long earth.—Readim Job 14:14, 15.
2. Man wea dae finis hem hao?
God sei long Adam: “Iu dust nomoa and iu bae go bak long dust.”—GENESIS 3:19.
God wakem olketa man from dust. (Genesis 2:7; 3:19) Iumi no garem soul wea no savve dae. So no eni part long iumi hem gohed for laef bihaen iumi dae. Taem man dae, brain bilong hem no waka and hem stop nao for tingting. Dastawe bihaen Lazarus laef bak, hem no storyim eni samting abaotem taem hem dae, bikos man wea dae no savve long eni samting.—Readim Psalm 146:4; Ecclesiastes 9:5, 6, 10.
Waswe, bihaen man hem dae, God mekem hem for safa long fire? From Bible showimaot man wea dae finis no savve long eni samting, datfala teaching abaotem hellfire hem laea teaching wea spoelem God. God nating laek for mekem man safa long fire.—Readim Jeremiah 7:31.
Watchim disfala video Man wea Dae Finis Hem Hao?
3. Waswe, man wea dae finis savve story witim iumi?
Man wea dae finis no savve toktok or herem eni samting. (Psalm 115:17) Bat samfala nogud angel savve story witim pipol and laea for sei olketa nao man wea dae finis. (2 Peter 2:4) Jehovah tambuim wei for trae story witim man wea dae finis.—Readim Deuteronomy 18:10, 11.
4. Hu nao bae laef bak?
Staka million pipol wea dae finis bae laef bak long earth. Nomata pipol wea no savve long God and wea duim rabis samting, olketa tu bae laef bak.—Readim Luke 23:43; Acts 24:15.
Olketa wea laef bak bae garem chance for lanem tru samting abaotem God, and for obeyim and showimaot faith long Jesus. (Revelation 20:11-13) Olketa wea laef bak and duim gud samting bae hapi for stap olowe long earth.—Readim John 5:28, 29.
5. Wei wea man bae laef bak showimaot wanem abaotem Jehovah?
Man fit for laef bak bikos God sendem Son bilong hem for dae for iumi. So wei wea man laef bak showimaot Jehovah lovem iumi and hem kaen tumas. Hu nao iu barava laek for lukim taem olketa wea dae finis bae laef bak?—Readim John 3:16; Rome 6:23.