Jephthah Talem Wanfala Promis

Olketa Israelite lusim Jehovah moa and start for worshipim olketa false god. Taem olketa Ammonite attakim and faetem olketa Israelite, olketa false god hia nating duim eniting for helpem olketa. For staka year nao olketa Israelite safa. Gogo olketa sei lo Jehovah: ‘Mifala sin nao. Plis sevem mifala from olketa enemy blo mifala.’ Olketa Israelite distroem olketa idol blo olketa and start for worshipim Jehovah moa. Jehovah no laek lukim olketa gohed safa.

Olketa Israelite chusim wanfala strong man for faet, wea nem blo hem Jephthah for leadim olketa for faet againstim olketa Ammonite. Jephthah sei lo Jehovah: ‘If iu helpem mi for win lo disfala faet, mi promis taem mi kam bak, bae mi givim lo iu first wan wea kamaot from haos blo mi for meetim mi.’ Jehovah herem prea blo Jephthah and helpem hem for winim datfala faet.

Taem Jephthah kam bak, dota blo hem nao first wan wea kam for meetim hem. Hem nomoa only pikinini blo Jephthah. Hem dance and pleim tambourine. Wat nao Jephthah bae duim? Hem tingim promis wea hem talem and sei: ‘Oh dota blo mi! Iu brekem heart blo mi. Mi mekem promis finis lo Jehovah. For keepim datfala promis, mi mas sendem iu for go waka lo tabernacle lo Shiloh.’ Bat dota blo Jephthah sei lo hem: ‘Dadi, sapos iu promis finis lo Jehovah, iu mas duim nao wanem iu promisim. Mi laek askem wanfala samting lo iu, letem mi go stap seleva for tufala month lo olketa maunten witim olketa gelfren blo mi.’ Dota blo Jephthah faithful for waka lo tabernacle for full laef blo hem. Evri year, olketa fren blo hem savve go lo Shiloh for visitim hem.