Wanfala Prison Gard Lanem Truth

Wanfala servant gele wea demon stap lo hem, hem stay lo Philippi. Datfala demon iusim gele hia for talem samting wea bae happen lo future, and olketa boss blo disfala gele kasem staka selen from datwan. Taem Paul and Silas kam lo Philippi, for staka day nao hem followim tufala lo evri ples wea tufala go. Datfala demon mekem hem for singaot olsem: ‘Olketa man hia wakaman blo Most Hae God.’ Gogo, Paul sei lo datfala demon: ‘Lo nem blo Jesus, iu kamaot from gele hia!’ Datfala demon lusim gele hia nao.

Taem olketa boss blo gele hia luksavve bae olketa no kasem eni selen moa from hem, olketa kros fogud. So olketa tekem Paul and Silas go lo olketa magistrate and sei: ‘Olketa man hia brekem law and mekem evriwan lo full taon for feel nogud!’ Olketa magistrate hia givim order for olketa whipim tufala nogud and putim tufala lo prison. Then prison gard putim tufala lo wanfala cell wea dark tumas wea stap midol lo prison, and putim tufala lo stock.

Paul and Silas gohed singsing for praisem Jehovah and olketa nara prisoner herehere lo tufala. Seknomoa, lo midol naet wanfala strong earthquake sekem datfala prison. Evri door lo prison hem open, and evri chain wea olketa taengem lo olketa prisoner hem aot and olketa stock hem open. Datfala prison gard ran go midol lo datfala prison and lukim olketa door hem open finis. Hem tingse evri prisoner ranawe finis, so hem tekem wanfala sword and laek for killim hemseleva dae.

Semtaem nomoa, Paul singaot big olsem: ‘No killim iuseleva! Mifala evriwan lo hia nomoa!’ Datfala prison gard ran go insaed and nildaon front lo Paul and Silas. Then hem ask olsem: ‘Wat nao mi mas duim for mi sev?’ Tufala sei lo hem: ‘Iu and famili blo iu mas biliv lo Jesus.’ Then Paul and Silas story abaotem Jehovah lo olketa, and datfala prison gard and full famili blo hem olketa baptaes.