Olketa Man—Olketa Animal wea Moa Hae?
“Waswe, wanem iumi biliv abaotem hao laef hem start hem important?”
Wanfala girl wea hem 16 year from Brazil talem disfala kwestin long start long tok bilong hem abaotem disfala topic “Olketa Man—Olketa Animal Wea Moa Hae?” Teacher bilong hem invaetem hem for givim tok long class abaotem disfala kwestin, bihaen teacher kasem wanfala copy bilong English Wekap! bilong June 22, 1998, long datfala topic.
Disfala young Witness mekhae long hao disfala teaching bilong evolution wea sei laef kamap seleva hem mekem planti nogud samting kamap. Example, planti pipol tingse teaching bilong evolution mekem samfala for ting long war olsem wanfala part long wei for stragol olowe for stap laef, wea help for mekem wei for mekhae long color skin and gavman bilong man.
Student hia showimaot hao olketa man barava difren from olketa animal. Hem talem: “Olketa man nomoa savve mekem grow spiritual fasin. Olketa man nomoa trae for faendem mining and purpose bilong laef. Olketa man nomoa warim dae, and interest long hao olketa start, and garem feeling for want for stap olowe. Hem important tumas for iusim taem for faendemaot lelebet moa abaotem hao iumi start!”
Teacher hem praisem gudfala tok bilong hem. Hem sei disfala young girl hem win bikos hem interest for read. Long skul olketa savve long hem olsem wanfala girl wea laekem tumas for readim olketa Bible pablikeson olsem Wekap! and Wastaoa.
Olketa Witness Bilong Jehovah honest for ting strong long samting wea kamaot from idea bilong evolution long heart and mind bilong young pipol. From diswan, kongregeson wea disfala girl kaban witim hem encouragem olketa young Witness for givim wanfala copy bilong June 22, 1998, English Wekap! magasin long olketa teacher and skulfren bilong olketa. Olketa givimaot samting olsem 230 magasin long olketa difren skul long datfala taon. Hed bilong Science Department long wanfala skul peim subscription for Wekap! magasin.
Tru nao, wanem iumi bilivim abaotem start bilong laef bilong iumi hem important! Disfala young girl and olketa fren bilong hem showimaot hao wei for biliv long Creator hem mekem laef bilong olketa barava garem mining.