Samting Hem Missim Long New York City

SAEN antap hem barava showaot klia long wanfala long olketa factory building bilong Watchtower Society long Brooklyn, New York, start kam from 1950. Disfala saen talem pipol wea go and kam, olketa tourist and narafala pipol wea go pas for readim Bible evriday. Disfala leta, wea kam from wanfala youngfala Witness girl, showimaot hao datfala saen hem gudfala reminder.

“Mi story witim wanfala skulfren bilong mi abaotem wanem mi laek for duim taem mi finisim secondary skul. Mi start for tok abaot Bethel, headquarter bilong Olketa Witness Bilong Jehovah, and hem barava hapi tumas. Hem talem mi hao hem stap long New York City for full laef bilong hem. Famili bilong hem no strong tumas long religion, bat evri morning taem hem luk aotsaed long window, hem lukim wanfala saen wea sei ‘Readim Word Bilong God Holy Bible Evriday.’ So evriday hem readim Bible bifor hem go long skul.

“Bihaen hem lusim datfala City, hem sei samting wea hem missim long New York City hem hao taem hem wekap, hem no savve lukim datfala reminder for readim Bible bilong hem. Bat bikos long datfala saen antap long Watchtower building, hem getius for readim Bible bilong hem, so hem go ahed for readim Bible evriday!”

Hem gud tumas for startim day witim wei for readim lelebet part long Word bilong God! Taem iu duim olsem, iu bae barava tinghae long word bilong aposol Paul: “Olketa holy raeting . . . wea fit for mekem iu wise for salvation thru long faith long Christ Jesus.”—2 Timothy 3:15-17.