Leson From Olketa Seaman

FOR sail seleva long open sea savve mekem man barava taed. Wei for barava taed wea mekem man no feelim eni samting savve mekem seaman for no garem klia tingting for disaed, gogo hem mek mistek or disaed rong. From diswan nao, hem tinghae long waka bilong anka long sea. Diswan letem boat for no float olabaot long danger wei taem seaman wea taed hem rest and kasem bak strong. Long semtaem, anka long sea hem forcem front long boat for point go long wind and olketa wave and diswan keepim boat stedy.

Olsem olketa seaman feisim olketa danger long sea, olketa Christian evritaem feisim olketa hevi bilong disfala world and savve kasem feeling for laek rest. Tru nao, wantaem Jesus talem olketa disaepol bilong hem: “Kam, iufala seleva nomoa, long wanfala kwaet ples and rest lelebet.” (Mark 6:31) Distaem, samfala maet tekem samfala week for travel or spendem weekend long difren ples for relax witim famili bilong olketa. Olketa taem olsem savve mekem man feel gud and kasem bak strong moa. Bat, hao nao iumi savve mek sure iumi sef long spiritual wei long taem olsem? Wanem nao savve kamap spiritual anka bilong iumi long sea for helpem iumi for no float olabaot and mekem iumi stap stedy?

Jehovah long wei wea kaen tumas givim wanfala help for iumi. Hem nao holy Word bilong hem, Bible. Thru long wei for readim evriday, iumi savve stap klosap long Jehovah and nating float awe from hem. Kaonsel bilong hem savve mekem iumi stedy and mekem iumi fit for stand strong long olketa test bilong Satan and world bilong hem. Wei wea iumi evritaem keepim program bilong Bible reading, nomata long taem iumi missim schedule, savve olsem spiritual anka bilong iumi.—Joshua 1:7, 8; Colossians 2:7.

Man wea raetem Psalm hem remindim iumi hao “hapi nao man” wea “hem hapi long law bilong Jehovah, and hem read smol long law bilong Hem day and naet.” (Psalm 1:1, 2) For readim Word bilong God evritaem savve mekem iumi kasem “hapi” long wei for feel gud and kasem strong moa for go ahed long Christian wei.