Kwestin From Reader

Haomas samting nao wanfala faithful Christian waef shud duim for faet againstim wanfala divorce wea hasband nao startim?

Taem human marit hem start, God hem sei hao wanfala hasband and waef mas “stap” tugeta. (Genesis 2:18-24) Olketa human kamap no perfect, and olketa problem saed long marit nao kamaot from diswan, bat God still laekem olketa marit partner for stap tugeta. Aposol Paul raetem: “Long olketa marit pipol mi givim instruction, hem no mi bat Lord, wanfala waef mas no lusim hasband bilong hem; bat sapos hem lusim hem, hem mas no marit moa or hem mas go bak moa long hasband bilong hem; and wanfala hasband mas no lusim waef bilong hem.”—1 Corinthians 7:10, 11.

Toktok hia showimaot hao midolwan olketa man wea no perfect samfala taem wanfala marit partner disaed for lusim narawan. Olsem example, Paul hem sei sapos wanfala marit partner lusim narawan, tufala evriwan “mas no marit moa.” Why nao olsem? Bikos, nomata marit partner lusim narawan, tufala go ahed olsem stap tugeta long eye bilong God. Paul savve talem diswan bikos Jesus markem rul for Christian marit: “Eniwan wea divorcem waef bilong hem, wea no bikos long fornication [Greek, por·neiʹa], and maritim narawan hem duim adultery.” (Matthew 19:9) Yes, only faondeson for divorce saed long Bible wea savve finisim marit hem “fornication,” hem nao, dirty fasin saed long sex. Luk olsem, long olketa wea Paul story abaotem, no eniwan long tufala duim dirty fasin, so taem hasband or waef go aot, marit hem no finis long lukluk bilong God.

Then Paul hem story abaotem taem wea wanfala tru Christian garem marit partner wea hem no biliv. Tingim toktok bilong Paul: “Sapos datwan wea no biliv hem go, letem hem go; wanfala brata or sista hem free long samting olsem, bat God hem kolem iufala long peace.” (1 Corinthians 7:12-16) Wanem nao wanfala faithful waef savve duim sapos wanfala hasband wea no biliv lusim hem, and maet hem lukaotem wanfala divorce saed long law?

Waef maet laekem hem for stap witim hem. Maet waef lovem hem yet, luksavve long feeling for each other and need saed long sex, and bae hem tingim tu hao hem and eni smol pikinini bilong tufala needim help saed long material samting. Hem maet hope tu hao, bihaen samfala taem, hasband bilong hem maet kamap wanfala wea biliv and sev. Bat, sapos hem duim samting for finisim marit (for samting wea no garem faondeson long Bible), datfala waef savve “letem hem go,” olsem Paul raetem. Diswan bae semsem tu sapos wanfala hasband wea biliv no followim tingting bilong God long marit and hem strong for go aot.

Bat, long taem olsem, waef maet lukim need for protectim hemseleva and olketa pikinini. Hao nao olsem? Hem bae laek for keepim olketa pikinini bilong hem wea hem lovem mekem hem go ahed for showimaot love bilong wanfala mami, trainim olketa saed long fasin, and mekem grow insaed long olketa faith wea garem faondeson long olketa gudfala Bible teaching. (2 Timothy 3:15) Divorce hia maet spoelem hem saed long law. So, maet hem duim samting seleva saed long law for protectim hemseleva and for mek sure hem bae fit for lukim pikinini and for mek sure hasband hia wea ranawe from famili bilong hem garem responsibility for saportim famili bilong hem. Long samfala ples, wanfala woman wea faet againstim wanfala divorce savve saenem olketa legal pepa wea talemaot hu nao bae keepim pikinini and saport saed long selen, and long semtaem no agree witim divorce wea hasband laekem. Bat long samfala ples, toktok bilong olketa pepa mekem hem luk olsem hem agree witim disfala divorce; so, sapos hasband bilong hem guilty long adultery, then wei wea waef saenem olketa pepa olsem bae showaot hem rejectim hem.

Planti long community and kongregeson bae no savve long full story, olsem sapos olketa kasem divorce wea fitim Bible. Bifor hem kasem taem olsem, hem bae gud sapos waef talem long presiding overseer and wanfala elder moa long kongregeson (wanfala leta hem moabeta) tru story abaotem diswan. Diswan minim tru story stap redy sapos eni kwestin kamap—long datfala taem or bihaen.

Letem iumi go bak long toktok bilong Jesus: “Eniwan wea divorcem waef bilong hem, wea no bikos long fornication, and maritim narawan hem duim adultery.” Sapos wanfala hasband guilty long dirty fasin saed long sex bat hem laek for stap marit long waef bilong hem, then waef hia (wan wea no garem blame long example bilong Jesus) mas chus for forgivim hem and go ahed for sharem marit bed witim hem or for rejectim hem. Sapos hem willing for forgive and stap witim hasband bilong hem saed long law, hem no kamap dirty from hem duim diswan.—Hosea 1:1-3; 3:1-3.

Taem hasband wea duim adultery lukaotem wanfala divorce, waef maet still willing for forgive, and hem hope for hasband kam bak. Hemseleva nao mas disaed, saed long conscience and living bilong hem, for faet againstim divorce wea hasband startim or nomoa. Long samfala ples wanfala woman wea faet againstim wanfala divorce maet fit for saenem samfala pepa wea talem hu nao bae keepim pikinini and saportim saed long selen bat no showimaot hem agree witim divorce; sapos hem saenem olketa pepa olsem diswan bae no showaot hem rejectim hem. Bat, long samfala ples wanfala waef wea faet againstim wanfala divorce maet need for saenem olketa pepa witim toktok wea sei hem agree witim divorce; sapos hem saenem diswan bae showimaot hem rejectim guilty hasband bilong hem.

For stopem eni chance for rong mining kamaot, hem bae gud sapos long taem olsem tu hem givim wanfala leta long olketa elder long kongregeson wea talemaot olketa samting wea go ahed and tingting wea bihaenem. Hem savve raetem hao hem talem hasband hem willing for forgivim hem and for stap olsem waef bilong hem. Diswan bae minim olketa kasem divorce wea no followim wanem hem laekem; so winim wei for rejectim hasband bilong hem, hem still redy for forgive. Bihaen hem mekem klia hao hem willing for forgive and stap marit, eni pepa wea hem saenem for stretem samting saed long selen and/or hu nao bae keepim pikinini nomoa bae no showaot hem rejectim hasband bilong hem.a

From hem talemaot klia hem willing for forgive nomata bihaen long wanfala divorce, hem and hasband bilong hem bae no free for maritim narawan. Sapos waef, partner wea no garem blame wea offer bilong hem for forgive hasband rejectim, bihaen disaed for rejectim hem from hem duim dirty fasin, tufala evriwan bae free. Jesus showim hao partner wea no garem blame garem raet for disaedem diswan.—Matthew 5:32; 19:9; Luke 16:18.

[Footnote]